Press "Enter" to skip to content

Wat ju kynnoh ba ngi khlem shimkhia ban talasi mynder, ong ka Anti Infiltration

Nongpoh, Nailur 10: Shisngi hadien ba ki nongïalam ka Confederation of Ri Bhoi People (CORP) ki la pynmih ïa ka jingkynnoh halor ka jingbym shimkhia da ki bor pulit ka tnat Anti Infiltration Check Gate kim shym la shimkhia tikna ban pyndep ïa ka kamram ban pyrkhing bad ban khynra ïa ka jingrung jingmih ki bar jylla shapoh ka jylla Meghalaya, na ka liang katei ka tnat ka la pynmih ïa ka jingpynshai ba katei ka jingkynnoh da katei ka seng ka long ka bym don nongrim.
Na ka liang ki bor pulit jong ka tnat Anti Infiltration Check Gate, lyngba u Bah I. Iawphniaw kum u nongpeit nongkhmih katei ka khyrdop, u la pynshai ba katei ka jingkynnoh da ki nongïalam ka CORP halor ka jingbym shimkhia da ka tnat Infiltration ban pyrkhing bha halor ka jingpyrshang rung tuh ki bar jylla ka long ka bym don nongrim bad u la pynshai ruh, ba kum ka tnat hi ka da treishitom ban peitngor bad ruh ban pyrkhing ïa ka rung ka mih jong ki bar jylla khamtam hadien ka jingpynmih jong ka Assam ïa ka thup jong ka NRC.
U Bah Iawphniaw u la ïathuh ruh, ba kum ka tnat treikam kaba peit ba khmih bad kaba peitngor bha ïa ka jingrung ki bar jylla ki mynder ri shapoh ka jylla, tang mar ïa ioh jingtip halor ka jingpynmih ka sorkar Assam ïa ka thup NRC, mar mar hi ka la sdang ban nang pyrkhing shuh shuh ban peitngor ïa ka jingrung jingmih ki bar jylla lane ki mynder ri shapoh kane ka jylla ha kaba la pyrkhing ruh ymtang ïa ka jingïaid jingieng jong ki lyngba ki kali kamai kum ki tourist taxi, ki sumo, ki trok bad wat na ki auto rickshaw ban tehlakam ïa ka jingpyrshang rung tuh jong ki mynder ri lane ki bar jylla.
Shuh shuh ruh, kum u nongpeit nongkhmieh ka tnat Infiltration u la pynpaw ïa ka jingsngewkhia kaba jur hadien ka jingkynthoh kaba la pynmih da ki nongïalam ka CORP kiba la kynthoh halor ka rukom treikam ka tnat Infiltration ban pyrkhing ïa ka rung ka mih ki bar jylla shapoh ka jylla, hynrei kum ka tnat kaba don ka jingkitkhlieh na ka bynta ban pyrkhing ïa kane ka jingrung jingmih ki bar jylla, ka la ïa treilang ruh bad ki bor pulit ka District khamtam na ka liang ka ophis u Superintendent of Police u la phah ruh ïa ki bor pahara kaba pyrkhing ban ïa treilang bad ka tnat Infiltration ban pyrkhing ïa ka rung ka mih ki bar jylla, u la bynrap.Kumban shu pynkynmaw, ki nongïalam jong ka CORP ha ka step jong ka sngi nyngkong ha ka por kumba 4 baje eiei, ki la ioh ban bat ïa ki ar tylli ki night super kiba la kit palat 70 ngut ki bar jylla ha Umiam bad hadien ka jingtohkit ki la lap ba kitei ki bar jylla kim shem la don ïa kino kino ki kot ki sla ban pynshisha ba ki dei ki nongshong shnong ba pura ka Ri India khamtam hadien ka jingpynmih ka sorkar Assam ïa ka NRC ha kaba palat 19 lak ki nongshong shnong ki la shah weng na kane ka thup.
Halor kane ka jingioh bat jong ki nongïalam ka CORP, Khrumdiengiei Circle ha ka jingïatreilang bad ka Eastern Zone ïa kitei ki bar jylla bad hadien ka jingbym don kot don sla ki la pynphai noh ïa kitei ki bar jylla Assam, da kaba kynthoh ruh, ba na ka liang ki bor treikam ka Infiltration kim shem la pyrkhing ba ïa ka rung ka mih ki bar jylla watla katei ka bus ka la dep ban ïaid lyngba katei ka khyrdop kaba don ha Byrnihat.