Press "Enter" to skip to content

Lait tuh ka ‘Official Letter’ na ka tnat Special Branch jong ka West Jaiñtia Hills sha Whatapps

Jowai, Nailur 12: Ka long kaei kaei kaba sngewkhia haduh katta ba ki kot ki sla Sorkar ne ki Official Letters ki la lait tuh ne leak sha ki social media wat na ka ophis jong u Superintendent of Police West Jaiñtia Hills District, kaba ha ka jingshisha ka la dei ban long ka tnat kaba adkar bha ïa ki kot ki sla namar ka long ka tnat kaba khmih ïa ka shongsuk shongsaiñ jong ka district bad ka jylla hi baroh.
Kane ka la paw tyngkrein mynta ka sngi haba la pynsaphriang paidbah lyngba ka Whatapps ïa kawei ka shithi kaba u Deputy Commissioner jong ka West Jaintia Hills u la phah sha kopi sha u SP jong ka West Jaiñtia Hills District.
Katkum katei ka shithi u DC u la ong ba ka ophis jong u ka la ïoh jingtip ba ki don ki jingpynsaphriang lyngba ki lad pathai khubor bad ka la don ruh ki company kiba thoh sha ki Waheh Chnong na ka bynta ban ai jinghikai (Skill Training) ban trei shabar ka jylla. Kumta la kyrpad ïa ki kmie ki kpa bad ïa ki samla wad kam ban long kiba husiar ban yn pdiang khlem ka jingtip kaba bniah khnang ban lait na ka jingshah thok bad shah pyndonkam bakla, kut ka shithi.
Halor katei ka shithi, u SP ula bhah ia ka sha tnat DSB ne District Special Branch bad ka tnat DSB ka la pdiang ia katei ka shithi bad buh ia ka ha ka file no. DSB/JWI/X-I-10/2019/2209 Dated 3.9.2019.
Katei ka shithi kam long satia kaba ktah ïa ka ïap ka im jong no jong no hynrei ka long kaei kaei kaba sngewkhia pat ba kumno katei ka shithi bad u file number ka lait tuh ne leak sha ki paidbah na ka tnat DSB.