Press "Enter" to skip to content

111.85 klur pan ka sorkar na ka CWC ban ïada shlei um ha Balat

Shillong, Nailur 13 : U Myntri Rangbah ka jylla u Conrad K Sangma u la pyntip ba ka sorkar jylla ka la dep phah ïa ka Detail Project Report (DPR) sha ka Central Water Commission (CWC) na ka bynta ban ïada ïa ka jingshlei bad khlong ka um ha ka wah Umngi naduh Balat shaduh Lalpani ha ka jingmang kaba 111.85 klur tyngka.
ïa kane u la ïathuh haba jubab ïa ki jingkylli ba la wanrah da u MLA ka Mawsynram u bah H.M Shangpliang hapoh ka ïing dorbar thawaiñ ka jylla mynta ka Sngi Thohdieng.U la ïathuh ba ka jinghap ban pynlut kloi ban ïada ïa ka jingklong ka um ha ka jinglut ba 1.75 klur tyngka ruh la dep phah sha ka sorkar .
Ha kaba ïadei bad ka jingjulor ne ka jingshah khlong ha ka umsaw ha ka wah Umngi naduh u 2018-19 kata ha Balat, Dangar bad Lalpani, u Myntri Rangbah u la ïathuh ba ha Balat ka jingshah khlong ka khyndew ka dei na ki bynta ka diang jongka wah naduh ka khyndew jongka Puja Commitee haduh ka jaka ïa kynduh bad ka wah Dakini. Ka jaka ka long kumba 500 metre ei ei. U la ïathuh ba kam shym la don ka jingjulor ha Dangar lait noh tang ka jingtwa ka khyndew. Kumjuh ruh ha Lalpani ka jingjulor ka long tang narud ka wah bad ym shym la don satia ba iap ne mynsaw jong ki briew ne mrad ruh.