Press "Enter" to skip to content

7 klur tyngka la mang ban lait jingshlei um ki surok Nongpoh

Shillong: Ka sorkar pdeng lyngba ka National Highway Authority of India (NHAI) ka la mang kumba 7 klur tyngka na ka bynta ban pynbha ïa ki nala bad ki muri ha surok bah National Highway ha Nongpoh, khnang ba na ka jingshlei um.
Ïa kane la ïathuh da u Bah Prestone Tynsong, Myntri ka tnad PWD haba jubab ïa ka Call Attention Notice ba la wanrah da u MLA Nongpoh, u Bah Mayralborn Syiem, ha ïingdorbar thawaiñ ha ka sngi thohdieng.
U Myntri u la ïathuh ruh ba ïa ka Tender na ka bynta kane ladep khot bad shen yn sa pyntrei noh ïa ka kam.
Ha shuwa jong kane, u MLA Nongpoh, haba wanrah ïa ka Call Attention Notice halor ka khubor ba la mih ha Mawphor ha ka 11 tarik mynta u bnai haor ka jingshlei um ka Shnong Umlyngkdait , u la ong ba um pat ju shem hangno hangno ruh ba ki nala um kin ïaid na jrong ka surok pat napoh. Nalorkata ruh, ki muri ruh kim
biang ka rukom pynïaid lain. Dei namar kane ka daw ba tang shu slap malu mala ruh la shlei um ki surok. U la pynpaw ka jingsngewkhia halor kane, namar ka Nongpoh kadei ka lynti bah ban rung sha ka nongbah jong jylla bad sha kiwei kiwei de ki jylla jong ka ri India.
U Bah Syiem, u la kyntu ruh ïa ka sorkar ba kan peit bha ha kiwei de ki jaka, kumba ka la shlei um ha Nonglyngkdait ha kine ki sngi baladep, tang na i slap iba rit.
Halorkane, u Bah Tynsong, u la ong ba kane ka Shnong ka long kham hapoh bad kumta ka um kaba tuid na ki surok ka rung sha kane ka shnong bad khamtam eh ka um kaba tuid na ki wah rit ba marjan. Halor kane ruh, u la ïathuh ba la phah jurip ïa ki Engineer ban leh ïa kaba donkam.