Press "Enter" to skip to content

Ap ka tnad PWD ïa ka mang tyngka na ka sorkar ban pynbha ïa ki surok

Nongstoiñ, Nailur 13: Halor ki jingsniew jong ki surok ka thaiñ Nongstoiñ bad ha West Khasi Hills, na ka liang ka jong u EE PWD Bah A.B Umdor, u la ai ka jingpynshai ba na ka lïang ka Office ryngkat bad u MLA Bah Macmilan Byrsat, ki la leh shitom katba lah ban pan sanction na ka sorkar bad ki la dep ban phah ïa ki estimate halor ki surok bapher bapher kiba hap hapoh ka nongbah bad ruh shabar nongbah Nongstoiñ.
Ïa kine ki surok ruh la shna estimate ban maramot da ka rong ym da ka khyndew bad ki maw. Hynrei tang ïa ka surok Nongstoiñ-Rambrai la estimate ban maramot tang da ka khyndew bad ki maw bad ruh ban iuh pynskhem da ka roller.
Na ka liang jong u haba ïakren bad ki nongïalam jong ka Western Youth Fedration (WYF) seng kmie ha ka sngi palei, u la pynpaw ïa ka jingsngew bynñiaw ba naduh ba u wan ban shimti ïa kane ka Office hapoh Nongstoiñ, u la lap bad ïohi da la ki jong ki khmat ba ka jingsahdien bad jingsniew jong ki surok hapoh ka Nongstoiñ West Khasi Hills District ki la long shaba palat, khamtam ka Nongstoiñ kaba dei ka Headquarter jong ka District baroh kawei. U la pynpaw ruh ba na ka liang ka office ka la dep ban pynbiang lut ïa ki jingdonkam bad mynta ka shong sa ha ka sorkar lano ba kan pyllait pisa bad trei noh ïa kine ki surok.
Halor kane, ka seng ka pynpaw ka jingai khublei ïa ka jingshimkhia jong u EE PWD (Road) bad u nongmihkhmat jong ka thaiñ, ba ki la trei shitom ban pynbiang ïa ki jingduna ha ka liang ki surok hapoh ka West Khasi Hills baroh kawei, ïa kaba ki paidbah ki la mad ïa ki jingeh baroh shi katta.
Ka seng ka kyrmen skhem ruh ba u MLA un shimkhia ban kyrpad ïa ka sorkar ban pynkloi noh ban pyntrei ïa kine ki surok, namar ki paidbah ki la kwah ban lait noh ïa kine ki jingeh kiba ki la mad baroh shi katta. Ki da kwah ruh ba kin wan urlong noh hapoh ka dong ka thaiñ, na ka bynta ban pynsuk ïa ki nongshong shnong ha ka ïaid ka ieng, namar kine ki surok ki dei ki budlum ka kamai kajih bad ka ïoh ka kot.
Kumban shu pynkynmaw ba dang ha ka 20 tarik u Jylliew mynta u snem, ki nongïalam ka seng ki la leit ban ïakynduh bad buh jingthoh hakhmat u EE PWD (Road) halor kine ki jingeh ba ki paidbah ki ïakynduh, khamtam ïa ka surok Nongstoiñ haduh Kynroh kaba la sniew sha ba palat.
Hynrei hynnin ka sngi palei, na liang ka seng ha ka jingïalam u samla Mawkordor Kharsyiemlieh u ba dei u President ka seng kmie, ka la ïoh ban ïa kren sani bha halor kane ka jingeh ba ki paidbah jong ka dong bad ka thaiñ ki la ïakynduh lah da ki bun bun snem. Ka seng ha ka jingïakynduh markhmat ka la ïoh ban pynpaw ruh hakhmat u EE ka tnad PWD, ban buddien biang halor ka jingdawa ban maramot pynbha ïa ka surok Nongstoiñ shaduh shnong Kynroh, Rambrai bad hapoh ka nongbah Nongstoiñ, kiba la sniew shaba palat eh.