Press "Enter" to skip to content

Ka Thma ka Jylla pyrshah ïa u Droks

Ka Jylla Meghalaya ka dei kawei na ki Jylla bala tip ha kylleng ba ka dei kata ka Wet State ne ka Jylla ba tuid da ka kyiad kat shaba phai hynrei mynta katba nang tyllun ka por, ka Jylla kala sdang ban ïoh sa ka nam ‘Drugs State’ namar ka jingnang jyllei u Droks bad ki Nongdih Droks kiba la don mynta ha manla ki shnong ki Thaw khamtam ha Nongbah Shillong. Jan manla ki thlïew Ïing ka Jylla ki khih khuslai mynta namar u Droks ba ki sheptïeng ïoh ki Khun ba ieid ba thoiñ jong ki, kin long ki mraw ha u droks uban sa pynjot bad pynsnïew ïa ka longrynïeng bad ka ïing ka sem jong ki.
Ka Jylla kala sakhi mynta ïa ka jingjyllei jong u droks bad kala ïohi ruh ba une u jingdih pynbuaid ula ïoh ban rung ha manla ki shnong ki thaw ha kaba ki Khun Samla Kynthei bad Shynrang, kila ngop. Ka jingïoh rung jong u drok bad ka jing jyllei jong u ha ka Imlang sahlang ka dei namar ka jingnang bun ki nongdih droks haba kat shaba phai mynta la shu suba beit ïa ki samla ba ki dei ki nongdih droks. Ki Nongdih Droks kila nang multiply man ka sngi bad kane ka jingmultiply jong ki, kala wanrah ïa ka ïew kaba heh ha kaba ki Nongkhaïi kim shlan shuh ban pynpoi ïa u droks wat hapdeng shibun ki dïengpyngkiang.
Ban ratdïengkhong ïa u droks hi kam dei ka kam kaba suk bad ka pyrthei baroh kawei ka dum ka buit ka stad kumno ban pyn duh jait ïa une u jingdih uba snïew na ka imlang sahlang hynrei kumba long ha Jylla, ka thma ban ialeh pyrshah ïa une u jingdih ka shong eh ha ki Kmie ki Kpa, ki Hynmen ki Para ryngkat ka jingkyrshan ba borbah jong ka Sorkar Jylla bad ka jingiatrei borbah jong ki Pulit ne ki kynhun Sengbhalang, ki Dorbar Shnong bad kiwei kiwei. Na ka sngi sha ka sngi, ki kot khubor kila shu dap ïa ki jingthoh shaphang ka jingkem ïa ki nongkhaïi droks, ki nongdih droks kumta ter ter hynrei katno eh kane ka jingkem kan wanrah ïa ka jingmyntoi ne kan pynbha pat ïa ki samla kiba la long mraw ha une u jingdih. Ka jingnang jyllei ki nongdih bad nongkhaïi droks hangne ha Jylla bad ha ka Ri baroh kawei, ka dei ruh namar ka jingtlot palat ka Aiñ ban tehlakam ïa kane ka kam be-aiñ.
Ban kem ïa ki Nongdih ne Nongkhaïi Droks kam dei satia ka kam kaba eh hynrei kam dei ruh ka kam kaba suk ïa ki bor ka Aiñ ba kin set phatok ne set along ïa ki namar baroh ki tip ba ka jingma ka ap lada shim ïa kat kane ka sienjam haba lei lada pynsajia ïa kito ki samla kiba la shah shong kulai ha u droks. Kaei ka ban jia ïa kine ki samla lada duh droks tang shisngi, kumno kin leh ïalade bad wat ka jingjia ka bym sngewtynnad ka lah ban jia ruh. Dei namar kata ka daw ba ki Pulit ki shem jingeh bha ban tehlakam lait noh tang da kaba shu kem, phah sumar ha Shillong Civil Hospital bad sa pyllait noh tang hadien shisngi arsngi duh ba kin leit phai shala ïing.
Kane ka jingeh jong ki Pulit ka lah ban sting iar satang lada ka Sorkar Jylla ka shimkhia lang bad ban iadon bynta shitrhem ha aban ïakhun ïa ka thma pyrshah ïa u droks. Ka Jylla haduh mynta kam pat don satia ïala ka jong ka Rehabilitation Centre ne ki jaka ai jingsumar sukher ïa ki samla bala ngop ha u droks lait noh tang ki jaka jong ki kynhun sengtreimon sngewbha ne ki kynhun shimet. Kumba long ka Juvenile Home kaba la buh kyrpang na ka bynta ki Khynnah kiba leh kam bymman, kumta ruh ka donkam ïa ka Jylla ba kan buh noh ïa ki along ba kyrpang na ka bynta ki nongdih droks ki ban long ha kajuh ka por kum ki rahabilitation Centre ban ïoh ïasyllok ïa ki samla ba kin phai dien biang sha ka lynti kaba bha. Kane ka dei ka jingdonkam ba kyrkieh eh ha ka Jylla khnang ba ka Jylla kan sa ïohi ïa ka jingkylla haba phai sha u droks.
Ka jingbym don ki Rehabilitation Centre ka Sorkar bad ka jingkiar jong ki Pulit ban set along ïa ki nongdih droks, ka dei kawei ka daw kaba nang pyn multiply ïa ka jingdon ki nongdih droks bad ka ju long ka rukom ruh ba haba ka aiñ ka jem mano hi ban shep tïeng ïa ka. Kaba ima eh ka jinglong jingman hangne ka dei ka jingjyllei ki nongdih droks bad kumjuh ruh ki Nongkhaïi ha kaba la shem ba bun ki samla bala ngop, kim dei shuh tang ki nongdih hynrei kila kylla long ruh ki nongkhaïi ban pynïaid ïew ïa une u jing dih na kawei ka jaka sha kawei pat bad dei namar ba u droks ula ïoh rung mynta ha manla ki shnong ki Thaw.
Ki Kmie ki Kpa ki dei kiba hakhmat eh ban shim ïa ka lyngkor kaba khia ba kin long kum ki nongpeit pyrman, kin sneng kin kraw, kin pynbeit ïa ki lynti ba bakla jong ki Khun ki Kti da ka lynti kaba dei bad khamtam ba ki dei ban kynmaw ba ka jingieid khun kam dei pat ban wanrah ïa ka jingjot jong ki Khun. Mano bym ieid ïa ki Khun ki Kti hynrei haba ieid dei ruh ban pynlut por bad ki Khun haba sneng ba kraw, ban kdew ïa ki lynti kiba dei bad kiba bakla bad ban donbynta beit bad ki ha kano kano ka kam ba ki leh.
Nalor ki Kmie Kpa, donkam ruh ïa ki Dorbar Shnong, ki Seng Longkmie, ki Seng Samla ban ïapeit pyrman lang ïa ka ïaid ka ïeng jong ki Khun Samla ka Shnong bad ban shim ïa ka lyngkor ban pynlong ïa ka jingïasyllok haba shem ïa ki samla kiba bakla ha ka lynti ïaid khnang ba kin lait na ki jingmlien kiba snïew. Ki Dorbar Shnong, ki Seng Longkmie bad ki Seng Samla ruh ki dei ban shim ïa ka bynta ban long ki Nongri Nongiada ïa ka Shnong ka Thaw da kaba ïaid pahara miet la bad sngi hapoh ka Shnong ka Thaw khnang ban nym ai jaka rieh ïa ki Nongleh bymman ba kin rung ne don hapoh ka Shnong.
Ka Jylla ka ïohi mynta ïa ka jingma kaba khraw, kaba ap ïa ka Jylla lada ym lah ban tehlakam noh ïa ka jingrung jingmih jong u droks bad ka jingnang jyllei jong ki nongdih bad nongkhaïi droks namar khlem pep ka por kan sa poi ba ki samla kin nym shlan ruh wat ban rah sa ïa ki tiar siat tiar pynmynsaw ban iada ïalade na ki jingma kiba ap hakhmat jong ki haba ki pynïaid ïew ïa u droks hapoh ka imlang sahlang.