Press "Enter" to skip to content

Kem ki Pulit ïa ki poiwir Nigeria ba prong tuh sha India na Bangla

Khliehriat, Nailur, 13: Lai ngut ki bar ri, kiba kynthup ïa arngut na ka ri Nigeria bad uwei pat na ka ri Ivory Coast ki la shahkem noh ha ki Pulit jong ka East Jaiñtia Hills District ha jingkhynra bad talasi mynder hynnin ka sngi palei.
Ïa une u nong Ivory Coast la tip kyrteng kum u Koman Daniel, 21 snem ka rta, u khun jong u (L) Norbert Kman, uba dei na ka shnong Amorka jong ka Jylla Anambra. Katba ïa kine ki arngut na ka ri Nigeria la tip kyrteng kum u Nnyigide Jamina Okechukwu,48 snem ka rta u khun jong u (L) Micheal Nnyigide na ka shnong Ojo, Lagos jong ka Jylla Akuchukwu bad ïa uwei pat la tip kyrteng kum u Okeke Ifechukwu John, 27 snem ka rta, u khun jong u John Okeke na ka shnong Azia, Ihiala jong ka Jylla Anambra.
Ha kane ka jingkhynra bad talasi kali ba la lam khmat da u Superintendent of Police ka East Jaiñtia Hills u Vivekanand Singh, ki Pulit ka East Jaiñtia Hills ki la bat ïa kine ki lai ngut ha Khliehriat katba dang shong ha kawei ka Bos Night Super kaba wan na Silchar sha Guwahati halor ka nongrim ba kim don ïa ka Passport kaba biang ban wan rung sha India.
Kine ki lai ngut ha ka jingïakren bad ki lad pathai khubor ki la ïathuh ba ki la wan na Africa sha Bangladesh da kaba pynbiang ïa ka Visa namarba ki leh ïa ki kam khaii jaiñ bad na Bangladesh ki la shu wan prongtuh sha India da kaba ïaid lyngba ïa ki surok khlaw bad da kaba jam ruh ïa ki wah kiba heh haduh ba kin da poi sha Tripura, India haduh hynnin ka step sngi palei.
Kine ki lai ngut ka la ïathuh ruh ba ki la shong da ka liengsuiñ na Nigeria ban leit sha Ethiopia bad leit pat sha Thailand bad na Thailand sha Bangladesh. Na Bangladesh ki la ïaid da ka kjat haduh Tripura ha kaba kawei ka kali na Tripura ka wan on ïa ki ha Silchar bad na Silchar pat ki la shnong da kawei ka Bos Night Super bad ynda poi ha Khliehriat ki Pulit ki dang pynlong ïa ka jingkhynra bad talasi kali ki la lap ïa kine ki lai ngut bad ha ka jingtohkit la lap ba kim don satia ïa ka Passpost kaba biang ban wan sha India.
Na ka met jong kine ki lai ngut ym shym la ïoh kurup eiei hynrei tang khyndiat eh ki pisa US Dollar, ki don ruh ka Pass Port ba la ïoh jingbit ban leit sha Bangladesh kaba la jan kut por.
Ïa kitei ki lai ngut, la kem noh da ki Pulit bad la register case ha Khliehriat Police Station hapoh ka kyndon ain 14/14A/14C jong ka Foreigner’s Act bad ka jingtohkit ïa ki ka dang ïaid shakhmat.