Press "Enter" to skip to content

Kyntu ka HNYF ïa ka Sorkar ban thung da ka Komiti halor ka Article 371

Shillong, Nailur, 13: Ka Hynñiewtrep National Youth Front (HNYF) ka la kyntu ïa ka Sorkar Jylla ban thung da ka Komiti ka ban bishar bniah halor ka jingwanrah ka MLA jong ka East Shillong, ka Dr. M. Ampareen Lyngdoh ïa ka Article 371 hapoh ka Dorbar Synrai jong ka Iingdorbar Thawaiñ ka Jylla.
“Ngi pynpaw ka jingsngewkmen ïa ka MLA jong ka East Shillong Constituency ka la pynsngew ïa ka histori jong ka Bri u Hynñiewtrep hapoh ka Iingdorbar Thawaiñ ka Jylla, ngi kyntu ruh ïa kiwei pat ki MLA jong ka Iingdorbar ba kin shimkhia halor kane ka mat kaba kongsan bad ka Sorkar Jylla ruh ka dei ban pyrkhat biang halor ka jingkyntait ban thung ïa ka Komiti ka ban bishar sani halor kane ka mat ba ka Dr. Ampareen ka la wanrah hapoh ka Iingdorbar Thawaiñ, namarba lada ki jingthoh kiba la kdew ha ka Instrument of Accession and Annexed Agreement la pyntreikam ha ki kyndon jong ka Riti Synshar kum ka Article 371 kan rah ïa ka kyrdan jong ka Iingdorbar Thawaiñ,” ong u Secretary ka Seng u Bah Sadon Kupar Blah.
“Kum ka jingpynkynmaw ïa ka Sorkar India, ka HNYF ka kwah ban kdew ba kum ki paidbah jong ka Bri u Hynñiewtrep ngim pat ïasoi satia ïa kano kano Dulir pynïasoh bad ka India (Instrument of Merger) hynrei ngi shu long tang shi bynta jong ka dewbah India lyngba ka Instrument of Accession da ka jingngeit ba ka Sorkar India kan pdiang ïa ka jingrung sha ka India halor ki kyndon ba la ïasoi ha ka Annexed Agreement kaba kdew shai ba ka Iingdorbar Thawaiñ jong ka Sorkar India kan peit tang ïa ka tnat Ïada Ri, ka Pisa bad ka Communication,” la ong une u nongïalam ka Seng.
“Ka Dulir Instrument of Accession ka dei tang ka jingïasoi kaba neh tang ar snem, namarkata, katkum ka Standstill Agreement, hynrei ban kut ka por, ha ka kyrteng jong kawei ka ri ïa ki khyndew ka shyiap jong ngi la shu dakhol da kaba pynkheiñ ïa ki kyndon jong ka Dulir IOA kaba kynthup ïa ka Annexed Agreement bad ka Standstill Agreement,” u la bynrap.
“Namarkata, kum ka Jylla jong ki riewlum ritpaid ngi ïaid beit shakhmat ba ngi dei ban don ïa ka jingïada lyngba ka riti synshar ha ka dur jong ka Art 371 khnang ba ngin dup lah ban ïoh ïa ka jingïada lyngba ka riti synshar ha kaba ïadei bad ka khyndew ka shyiap, ki marpohkhyndew, ka snap bad ki hok longtrai kum ki riewlum ritpaid ha ka jingshah tynjuh ki ban wan na ka CAB bad ka NRC,” u la bynrap.
“Ngi kyrmen ba ki nongmihkhmat jong ngi bad ki paidbah kin kyrshan ïa kaba ka Dr. Ampareen Lyngdoh ka la rah ïa kane ka mat ïatai hapoh ka Iingdorbar Thawaiñ ka Jylla,” u la ong.