Press "Enter" to skip to content

Lynïar ki paidbah nongleit nongwan ba la sniew palat ka surok ha ki bynta lad Shillong-Laitkor

Shillong, Nailur: Na ka liang ki paidbah nongleit nongwan kiba hap ban ïaid lyngba napoh lad Shillong -Laitkor ka lynti ka ban leit sha ka jaka Air Force bad Shillong Peak View Point, khamtam kito ki nongshong shnong kiba don ha kine ki thaiñ kila hap ban ïai mad ïa ka jingeh ha ka liang ka leit ka wan namar ka jingsniew palat jong katei ka lynti surok kaba la buh jingma ruh wat ïa ki mynsiem briew.
Na ka liang ki paidbah nongshong shnong jong ka thaiñ kiba hap ban ïaid lyngba kane ka surok man la ka sngi kila pynpaw ba ka jingsniew palat kane ka surok kala buh ka jingeh bad ka jingma kaba khraw na ka bynta jong ki.
Watla kane ka dei ka surok kaba kongsan bha ha ka leit ka wan kaba man la sngi, hynrei kila ong ba na ka liang ka sorkar bad ki bor ba dei khmih kila shu sngap mynthi bad leh kyllut ïa kane ka jingud jingnam jong ki paidbah nongshong shnong jong kane ka thaiñ.
Shuh shuh kila ong ruh ba ka jingïaid lyngba jong ki trok kit mar man la ka sngi khamtam ki trok heh bun shaka kiba pynkit ïa ki tiar khia jong ka tnat shipai Air Force kiba ïaid lyngba kane ka surok namar ka pynsuk shibun ban ïaid lyngba ka lad Shillong kala nang pynjulor bad pynsniew shuh shuh ïa kane ka surok kaba la dep julor lypa.
Kumta halor kane ka jingeh na ka liang ki paidbah nongshong shnong jong kane ka thaiñ sa shisien pat ki kyrpad jur ïa ka sorkar jylla lyngba ka tnat ba dei khmih ba kan shimkhia lem bad ban shna pynbha noh mardor ïa kane ka surok khnang ba kan ym buh jingeh ne jingma ïa ki paidbah nongleit nong wan kiba hap ban ïaid lyngba jong kane ka surok.