Press "Enter" to skip to content

Rah ka skul Church of God ha ka ïakop rwai bala pynlong da ka Phudmuri Presbyterian HSS

Shillong, Nailur : Ka Church of God Higher Secondary School, Mawlai Nongkwar ka la jop bad wan nyngkong ha ka jingïakop rwai ka ‘Inter School Singing Competition’ ba la pynlong da ka Phudmuri Presbyterian HSS kum shi bynta jong ka jingrakhe ïa ka Jubili Rupa ba la pynlong ha School Auditorium hall jong kane hi ka skul hynne ka sngi, katba ka Phudmuri Presbyterian HSS ka la wan Baar bad ka Sacred Heart Girls HSS ka la wan balai.
Ha kane ka jingïakop rwai ki la don baroh hynniew tylli ki skul ba la shim bynta kaba kynthup ïa ka Phudmuri Presbyterian HSS, kaba pynïaid, ka Mawlai Presbyterian HSS, Iewrynghep, OM Memorial HSS, Kyntonmassar, Church of God HSS, Sacred Heart Girls HSS, Mawlai Phudmuri, ka Shullai SS, Mawroh bad Mawlai Christian SS, Motsyiar.
U MDC ka Mawhati conctituency, u bah Charles Marngar, u la long u Kongsan ha kane ka sngi.Haba ai jingkren kum u kongsan u la pynpaw ïa ka jingkmen ba u la ïoh ban don bynta lang ha kane ka jingrakhe dap arphewsnem jong ka skul.
“Nga kmen ba nga la ïoh ïa kane ka kabu ban ia don ryngkat bad ka skul haba rakhe ïa ka jubili rupa bad nga dap da ka jingsngewnguh halor ka jingkhot sngewbha ka jong ki nong pynïaid skul ïa nga,” ong u bah Charles.
Ha kaba ïaroh ïa ka hall kaba thymmai ba ka Phudmuri Presbyterian HSS ka don u kongsan u la ong, “Ha constituency ba nga don, ngim don kum kane ka hall ba ka Presbyterian skul ka don bad kaba dei ka constituency kaba bun bha ki jingeh, kaba dang donkam shibun ki kam pynroi.” Ha ka juh ka por u la pyrto ïa ki nongshim bynta kiba la wan ïashim bynta ha kane ka lympung ïakop rwai.
Ka jingkyntu kynpham kaba hakhmat eh ka jong u MDC ïa ki khynnah ka long ba ki dei ban pyndonkam hok ïa ka sap kaba ki don.“Pyndonkam hok ïa ka sap ba U Blei u ai ïa phi, lada phi don ka sap, pynlut por bad practice bha ba phin nang tbit,” ong u MDC Mawhati bad u la bynrap, “Phi dei ban long kiba ïaishah naba kane ka dei kaba donkam bha ha ka jingim jong phi ba phin don na ka bynta ban kiew.”
Kumba shu kdew ka Phudmuri Presbyterian HSS ka la plie pyrda ïa ka jubili rupa ha ka 24 tarik u ïaïong, 2019 bad katkum ka principal ka kong Phila Rynjah, ka la ïathuh ba kin pynhap pyrda ïa kane ka jingrakhe lashem snem u 2020 ha u bnai Jymmang bad u Chief Minister Conrad Sangma u lah ban wan ban pynkut ïa kane ka jingrakhe jong ka skul kum u kongsan.
ïa ki khusnam sha ki nongjop la sam da u kongsan bah Charles Marngar, u bah SS Nongdhr bad u bah WL Mawlong.Ha kane ka sngi la don ryngkat ki dkhot ka Managing committee, ki nonghikai, ki khynnah skul bad kiwei.