Press "Enter" to skip to content

Rai ban khang pyndonkam Plastic ha baroh ki jaka hapoh u pud ka KHADC

Shillong, Nailur 13 : Ka Khasi Hills Autonomous District Council (KHADC) ka la rai ban khang pyndonkam Plastic ha baroh ki jaka ba hap hapoh u pud u sam jongka naduh mynta ka sngi ka 13 trik Nailur 2019.
ïa kane ka rai la shim da ka Executive Commitee (EC) kaba la ïa kynduh haka 10 tarik mynta u bnai hapoh ka jingïalam u Chief Executive Member (CEM) u bah Teinwell Dkhar. La wanrah ïa kane ka mat hapoh ka EC da u EM Trade bah Paul Lyngdoh.
Kat kum ka jingpynbna ba la pynmih da ka KHADC mynta ka sngi la pynpaw ba ka Council ka shim khia haduh katta katta hadien ba ka la ïohi ïa ka jingpyndonkam plastic ki bym pyut da kiba bun ki dukan, ki restaurant, ha ki ïew ki hat ka la wanrah ka jingktah jur ïa ka mariang na ka jingrong noh jong ki nala sha ki wah, ki dam. Ym tangba ka ktah ïa ka mariang hynrei ka ktah ïa ka jingkoid jingkhiah jong ki briew, ki mrad bad wat ki doh um ruh.
Kumta khnang ban ïada ïa ki briew, ki mrad ki mreng, ki doh um bad ïa ka mariang ka EC ka la rai ban khang pyndonkam Plastic ha baroh ki Hima, ki Elaka, ki Raid ba pynïaid da ki Syiem, ki Sirdar, ki Lyngdoh, ki Wahadadar ba hap hapoh u pud ka Council. Ka KHADC ka leh ïa kane kat kum ka aiñ The Environment Protection Act 1986 bad ka The Plastic Waste Managment Rules 2016. Ki jaka baroh hapoh u pud u sam ka KHADC kin long beit ki ‘No Plastic Zone”.
Halor kane la maham ïa baroh ki trai dukan, ki trai restaurant, ki nongshong die madan bad ïa baroh hi ba kim bit shuh ban dang pyndonkam plastic bad lada jia pynkheiñ ïa kane ka hukum kin ngat ha ki bor bad kyndon ba pyrkhing jong ka aiñ.
Ka KHADC ka kyntu ruh ïa baroh ki Syiem, ki Sirdar, ki Lyngdoh, ki Wahadadar, ki Sordar, ki Rangbah Shnong bad ïa ki paidbah hi baroh ban ïatrei lang namar kane ka dei na ka bynta ka jingbha bad jingmyntoi jong baroh. ïa kane ka jingpynbna la soi ruh da u CEM ka KHADC hi.