Press "Enter" to skip to content

Shen yn pyntreikam ïa ka Solid Waste Management Rules 2016 ha Nongpoh

Nongpoh, Nailur 13: Kum shi bynta ban wan rah ïa ka khuid ka suba ha ka sor Nongpoh hi baroh kawei, ka Nongpoh Town Committee ka la rai ban pyntreikam noh ïa kawei na ka kyndon aiñ ba la tip kum ka Solid Waste Management Rules, 2016 ha baroh ki Shnong kiba hap hapoh ka Nongpoh Town Committee.
Haba ïa kren bad u Nongthoh khubor, u Secretary ka Nongpoh Town Committee, u Bah Rayonald Kharkamni, u la ong ba ka daw kaba la pynlong ïa ka Nongpoh Town Committee ban pyntreikam noh ïa katei ka aiñ ka dei kawei na ka thong ba ka Town Committee ka angnud ban pynlong ïa ki Shnong kiba hap hapoh ka town ba kin long kiba khuid kiba suba.
U la ïathuh ruh kane ka Solid Waste Management Rules, 2016 ka dei ruh shi bynta kum kawei na ka hukom baron barom ka National Green Tribunal ha kaba ka thong hi ka long ban wan rah ïa ka khuid ka suba.
“Kum ban pyntip paidbah, ka Nongpoh Town Committee ryngkat ka jingïatrei lang bad ka ophis ka Deputy Commissioner ka Ri Bhoi, ka tnad PHE bad ka Urban Affair ki la pynlong ki prokram ai jinghikai sha ki Shnong bapher bapher ban pynsngewthuh halor ka jingthmu jong katei katei ka aiñ ba la tip kum ka Solid Waste Management Rules, 2016 kaba long ka khuid ka suba ha baroh ki Shnong ba hap ha ka Town” ong u Bah Kharkamni.
U la ïathuh ruh ka daw kaba la pynlong ban iaid shuwa sha ki paidbah ban pynsngewthuh halor kane ka ain, ka dei namar ba lada ki paidbah ki pynkhein ïa katei ka kyndon aiñ kin ngat ha ka jingpynshitom lyngba ka kuna kaba T. 5000 haduh 25000 lane wat ban shah set along.
Ha kawe ka bynta, na ka liang ka Town ka ai ruh ka jingkhublei kaba kyrpang sha ka Auto Association kiba la don bynta ban wan rah ïa ka khuid ka suba ha ka sor Nongpoh bad kum ka town ka khmih lynti ba kino kino ki kynhub lane ki seng ba kina ka jingiatrei lang kumba la leh da ka Auto Association ban wan rah ïa ka khuid ka suba ha ka sor Nongpoh, ong u Bah Kharkamni.
Shuh shuh, ban pynbit pynbiang ïa ka rukom ban lum ïa ki jaboh jabain na ka sor Nongpoh, ka Nongpoh Town Committee ka la dep ruh ban thung kawei ka Sub Committee halor ka Solid Waste ha kaba ka kamram jong kane ka Committee ka long ban lum ki khajna na ka bynta ban pynkhuid ne lum ïa ki jaboh ba mih na ka sor Nongpoh, u la bynrap.
Khatduh eh, u Bah Kharkamni u la pan ruh ka jingiatrei lang na ki paidbah, ki samla, ki longkmie bad ki nongshong shnong hi baroh kawei ba kin don lang kata ka jingkitkhlieh na ka bynta ban pynlong ïa ki Shnong kiba hap hapoh ka town kiba khuid ba suba. Ha kaba ïa dei bad kane ka bynta la ïathuh ruh ba ka DC ka la lum ïa ka jingïakynduh lang ka Nongpoh Town Committee, ki Rangbah Shnong bad ki Nongïalam Shnong bad ruh ki ophisar na ka Pollution Board, Forest, PHE bad Urban kin wan ban shim bynta ha kane ka jingialang khnang ban ai ka jingtip kaba bniah halor kane ka Solid Waste Management Rules, 2016.