Press "Enter" to skip to content

Yn nang pynjur jingïakhih ki nongshet ja Mid Day Meal ha Jaiñtia

Jowai, Nailur, 13: Ka synjuk jong ki nongshet ja sngi ïa ki khynnah skul-All Jaintia Mid-Day Meal Workers Union, Jowai (AJMMWU) ka la rai ban nang pynjur jingïakhih ban pynbor ïa ka sorkar jylla ban pynïoh ïa ka jingdawa ka jong ki kaba kynthup ïa ka jingkyntiew ïa ka Tulop (honorarium) bad kiwei kiwei ki hok ba ki dei ban ïoh.
Ïa kane ka rai ka synjuk jong ki nongshet ja sngi ki khynnah skul ki la shim hadien ka jingïaid paidbah ba jai jai (Peace Rally) kaba long ha sor Jowai ha ka sngi Thohdieng. Kane ka jingïaid paidbah ka la sdang naduh na Mihmyntdu, Ladthadlaboh, Ïawmusiang, Chutwakhu, Mission Compound, Iongpiah bad la pynkut ha madan Tpep Pale.
Da ki hajar ngut ki nongshet ja sngi (AJMMWU) kaba hap ha ka shatri jong ki All Jaiñtia Muster Roll Workers and Labour Union, Jowai (AJMRWLU) ki la mih sha surok ryngkat bad ki jingthoh kiba dawa ïala hok na ka sorkar, ban ai ka juh ka jingsiew ïa ka juh ka jait kam bad ban kyntiew ïa ka honorarium bad kiwei kiwei.
U President jong ka All Jaiñtia Muster Roll Workers & Labour Union, u Khroo Lamsalangki Pariat ula ong ba ka kane ka synjuk ka la dep ai dorkhat bad pynkynmaw ruh ïa u Myntri Rangbah ka Jylla halor ka jingdawa kyntiew ïa ka tulop jong ki nongshet ja sngi, hynrei wat hadien lai bnai naduh ba ki la ai dorkhat ha u bnai Jylliew 03 la leh bymsuidñiew ban pynïoh ïa ki mat jingdawa jong ki nongshet ja sngi.
“Ngi la dawa na ka Myntri Rangbah ka Jylla ban kyntiew ïa ka nong jong ki nongshet ja sngi na ka T.1000/- sha ka T.5000/- shibnai ban kham bit kham biang ka jingïoh bai bylla jong ki nongshet sngi,” la ong u Ma Khroo Lamsalangki Pariat.
“Ngi la dawa ruh ba ka sorkar kan siew tulop na ka bynta ka 12 bnai ha ka 10 bnai ha ka shi shem bad ban siew tista bad ka shuti haba pang ba shitom bad kha khun,” ong u ma Pariat
Kawei na ka longkmie kaba shet ja sngi na ka thain Laskeiñ, ka kong Lam Jingied Lapasam ka la ong “Naduh ka 8 baje mynstep ngi sdang ban pynbiang ïa ka bam ka dih ki khynnah skul ha manla ki skul bad lada ngi bakla ngi shah mai shah kynhied, katba ka tulop ne ka nong jong ngi ka shong tang T.30 shisngi.”
“Ngim don por shuh ban peit ïa ki khun ki kti jong ngi namar ka kam kadei kaba khia, hynrei ka sorkar ka la lehbeiñ bad kam khein briew ïa ngi,” Ong ka Kong Lam Jingieid bad kyntu ïa baroh ki para nongshet ban ieng ha ka nongrim da ka mynsiem kaba tylli ban dawa na ka sorkar ban pynïoh ïa ka tulop khnang ba kin kham bit kham biang.
Kiwei kiwei ki jingdawa kane ka synjuk ki nongshet ja kadei ban kyrpad ïa ka sorkar pynithuh ne ai jngbit ba ki nongshet ja kin long ki dkhot jong ka Meghalaya Building & Others Constructions Welfare Board lane ban pynrung ha ki Health, Social and Pension scheme kiba peit da ka sorkar.
Ka Synjuk ka la rai ban shong jingïalang ha kine ki khyndiat sngi bad kan sa pynbna ïa kiwei pat ki lad jingïakhih ban pynkohnguh ïa ka sorkar ban ïoh ïa ka hok ba ki dei ban ïoh.