Press "Enter" to skip to content

ïai shah ñion ki paid khappud lano yn sdang ka jingïakren

Ki paid khappud jong ka jylla Meghalaya haduh kine ki sngi ba mynta ki dang hap ban ïa kynduh beit ïa shibun ki jingeh kiba har rukom tang namar ba ym pat lah ban ïa pynbeit ïa pud u sam hapdeng ka Meghalaya bad Assam mynta la 47 snem kynthi ruh ba ka jylla Meghalaya ka la ïoh ïa ka jylla ba pura na ka Assam.
Baroh shi katta kaba pyni bor eh ka dei ka Assam namar tang shu sdang ka Meghalaya ban shna ïa ki surok bad lynti ha khappud la wan pynsangeh bad pyni bor beit da ki pulit ka Assam, kumba la jia dang ha ka Sngi Saitjain ha ka jingshna ïa ka surok PMGSY na Riangdo sha Athiabari.
Ka long ruh kaba sngewsangsot tang namar u pud u sam ngi la duh noh ïa bun ki mynsiem ba kordor namar ba mih bun ki jingïakynad haduh ba hap ban ïaleh pyrshah bad ban pyndonkam da ki ktang suloi kaba long ka jingeh shisha ïa ki paidbah ha khappud.
Lada phai sha ki jaka khappud ka Meghalaya lah ruh ban sakhi haduh mynta kiba bun ki shnong kim don satia ïa ki lynti ki synkieng kiba bit babiang bad don ruh ki shnong kiba hap ban pyndonkam da ki surok jong ka Assam namar ba ka sorkar Meghalaya haduh mynta kam pat lah ban shna la ki jong ki surok ban pynsuk ïa u paidbah ha ki jaka khappud.
Ka long ruh kaba sngewsangsot nalor ba ki paidbah ki ïa kynduh ïa ki jingeh ba dei na ka daw u pud u sam, hynrei haba phai ruh sha ki kam pynroi kiba bun ki shnong ha ki jaka khappud ki dang sahdien shisha ha ka liang ki kam pynroi.
Ynnai ïa kren ïa kata ka kam pynbeit pud pynbeit sam ba ka jylla ka la ïaid lynti mynta la saw phew hynniew snem tam, hynrei kaba kham sngewkhia shuh shuh ka long ba tang ki kam pynroi ba u paidbah u dei ban ïoh ruh kiba bun ki shnong ha ki jaka khappud ki dang shah ïehnoh bein haduh mynta.
Lada phai sha ki shnong ha ki jaka khappud, naduh ki shnong ba hap ha ki khappud ka East Khasi, Hills, West bad East Jaintia Hill, West Khasi Hill bad Ri-Bhoi District bad wat ha Garo Hills ruh ka long kumjuh. Kiba bun ki shnong ki hap ban sah ha ka jingsohsat bad ka jingeh kaba ym lah ban tip da mano mano ruh, hynrei lait noh tang kito ki paidbah khappud kiba la mad ïa ka jingdung u shiah ha ki kjat jongki.
Ki shnong ha khappud ki ia kynduh jingeh ym tang ba kim don ïa ki surok kiba bit babiang, hynrei naduh ka umbam ka umdih, ka pule ka puthi, ka koit ka khiah namar ba ka sorkar haduh mynta kam don satia ïa ka thong kumno ban kyntiew ïa ki paidbah ha khappud.
Ka long ruh kaba sngewphylla tang ban kyntiew ïa ki paidbah ha ki jaka khappud bad ban nym shah klun ïa ki jaka ki puta ha ki jaka khappud, ka sorkar Assam ka don ïa ka mat treikam ba kyrpang kumno ban kyntiew ïa ki paid khappud jongka bad ki da shim khia ruh ban wan rah ia ki skhim pynroi bapher bapher, hynrei haba phai pat sha ka sorkar Meghalaya la kut tang ka jingïakren bad ka kular khlem da lah ban pyntreikam da ki kam kumba leh ka sorkar Assam.
Hooid ki myntri rangbah kiba rim ki la ïakren bad ïa kynduh bad ki myntri rangbah ka Assam ban ïakren halor u pud u sam hynrei kane ka sorkar MDA haduh mynta wat tang shisien ruh ym pat don ka jingïarken pynbeit pud. Nalor kata dang shen hapoh ïing dorbar la pynpaw ba kam don ka jingïakajia khappud hynrei na ka por sha ka por ka Assam ka wan thombor bad khang ïa ki kam pynroi ka Meghalaya ha khappud.
Ka jingkylli ka mih ruh hangne, lada ki paidbah ha khappud ki dang shah iehnoh beiñ ha baroh ki liang jong ki kam pynroi mynta ba la ïaid lynti la sawphew hynniew snem tam, lano pat kin kiew ha ka roi kapar lada kum ka sorkar kaba long ka kmie kam phai ïa ki khmat ban peit kyrpang ha ki jaka khappud.
Kum ka sorkar kaba long ka kmie ka la dei ban phai khmat kyrpang noh ïa ki paidbah ha khappud kata ban peit kyrpang naduh ki jingdonkam ha ki lynti ki synkien, ki umbam ki umdih, ki bording ilektrik, ka pule ka puthi, namar lada ka don ka kam pynroi ha ki jaka khappud ka long ruh shi bynta ba ka sorkar ka lah ban ïada ïa u pud u sam bad kumjuh ruh ba ki paidbah kin dangroi ha ka ïoh ka kot, ka pule kaputhi bad ha baroh ki liang jong ki kam pynroi ba u paidbah u donkam.
Na ka por sha ka por ruh ka sorkar ka ju pynbna paidbah ba kan shim khia kyrpang na ka bynta ki paidbah ha khappud, hynrei kumba long haduh mynta kata ka thong ba la buh da ka sorkar ka la kut tang ha ka jingïakren bad khlem da leh da ki kam.
Ban roi jylla bad ka ri, ka sorkar ka donkam ban phai khmat kyrpang na ka bynta ki paidbah ha ki jaka khappud bad lada kum ka sorkar ka kloi ban kit ïa ka eh ka shon bad ka jingsahdien jong ki paidbah, ka la dei ruh ka por ban pynsted noh ka jingïakren ban pynbeit ïa u pud u sam jong ki ar jylla.