Press "Enter" to skip to content

Dawa tohkit ki Sengbhalang ïa u Secretary Elaka Sutnga ba kynnoh nongpynthud iaka roi ka par

Jowai, Nailur 16: Ka kynhun jong ki 8 tylli ki sengbhalang kila ujor sha u Chief Executive Member jong ka Jaiñtia Hills Autonomous District Council (JHADC) Ma Thombor Shiwat ban dawa tohkit ïa u Secretary Elaka Sutnga u Mekit –hi Sutnga halor ka jingmana bad maham ïaki sengbhalang kim bit ban tuklar ïa kino kino ki kam hapoh ka Elaka.
Kine ki sengbhalang ba kynthup ïaka JSM, HYC, MPUF, HYNF, EJNC, JNC, HANM bad NEIPF kila ujor sha u CEM ban dawa tohkit ïa une u Secretary Elaka Sutnga halor ka jingkynnoh ïaki sengbhalang ba ki dei ki langïong jong ka imlang ka sahlang kiba pynthud bad long dieng pynkiang ïaka roi ka par jong elaka.
U Leningstar Rymbai President jong ka JSM, ula ong ba kane ka jingong u Mekit-hi Sutnga kalong kaba bakla namar ba kim ju khanglad ïaka jingpyntreikam ïa kino kino ki kam pynroi kumjuh ki skhim sorkar ha kano kano ka jaka ne elaka.
Ula kynnoh ba une u secretary ula pynkheiñ ïaka hok ban kren, ka hok iaid ban ieng ban iaid lait luid bad ban pynsngew ïaka khia ka shong jong ka imlang shalang bad ula pynkhein ruh ïaka kyndon aiñ hok longtrai (Fundamental Rights) katkum ka Article 19 jong ka Constitution ka Ri India ha kaba ula khang ïaki sengbhalang ban rung ban mih hapoh ka shnong kiba hap hapoh ka elaka Sutnga.
Une u Secretary Elaka u pynbna paidbah ba ula khang ruh ïaki khun ka shong, ka elaka ban ïasoh ha kino kino ki seng bad khang iaki Waheh Shnong ïasnoh ha ki kynhun sengbhalang.
Une u secretary Elaka ula khang pyrshah ïa baroh ki sengbhalang ban kren ïa kino kino ki mat kiba ktah ïaka iap ka im jong ki paidbah ka Elaka kaba dei kawei pat ka jingpynkein ïaka hok bad ka mon laitluid
Ha kaba dei bad kane ka jingthmu set ïaka syntur jong ki sengbhalang, kila dawa na u CEM ban shimkhia ban tohkit bad ban pynshitom ïa une u secretary namar ka jingpynkhein ïaka hok ban im, ban kren bad ban iaid ban ieng katkum bala pynkup bor da ka riti synshar ka ri.
Kine ki nongialam sengbhalang kila suba jur ba ka don kaei re kaei sha lyndet halor kane ka jingkren laplah u secretary elaka Sutnga namar ba ki sengbhalang kila suba sniew ia u ba kane ka elaka ka don jingthmu ban wanrah ïaki kharkhana saiñ rnga dewiong (coke) bad kala dep mynjur ruh ban ai NOC sai rnga dewiong sha uwei u briew ha katei ka elaka.
Kila kynnoh ruh ba hadien ba ka Moolmylliang kam don Waheh Shnong mynta la shisnem, ka elaka Sutnga kala shim ïaka bor halade bad kala NOC ban seng iaka kharkhana sain rnga dewiong khlem ka jingtip u paidbah nongshong shnong.
Ki sengbhalang kila kynnoh ba kane ka Elaka kadei kaba jyllei bha ki kam sniew naduh ka kam die kyiad beaiñ, ka jingiakhalai beain bad kiwei kiwei ki kam sniew kiba ktah iaka imlang ka sahlang.
U Secretary ka Elaka ula pynduh ïaka hok ki nongshong shnong khamtam kiba nud ban kren pyrshah ïaki kam bakla jong u.
Kine ki 8 seng kila kynnoh ba u secretary ka elaka ula shim bad pyndonkam bakla wat ïaka bor Dolloi.
Halor kane ki 8 seng kila dawa na u CEM ban weng mardor ïa u secretary elaka Sutnga namar ba ula ïuhroit iaka hok u paidbah.