Press "Enter" to skip to content

Ïalam sumar ka VASU ïa palat 40 ki Nong Mahendraganj bad Ampati sha Guwahati

Shillong, Nailur 16: Ka sengtrei monsngewbha-ka Voluntary Association for Social Upliftment (VASU), kaba dei na Assam, kala ïalam hynne ka sngi nyngkong, ïa 40 ngut ki nong Mahendraganj bad Ampati ba ngat ha ka jingpang khniang sniewdoh sha Guwahati ban ïoh ïa ka jingsumar.
Ka VASU kaba pyntreikam ïa ka Skill Development Programme ha Ri-lum Garo, kala shim ïa kane ka jingkitkhlieh namar ka jing ïohi ba ka Sorkar Jylla kam shimkhia satia ïa ka jinglynshop ki khniang sniehdoh ha kine ki artylli ki jaka. Ka VASU ka dei ka kyn hun kaba pynsaphriang ïa ka khubor halor ka jinglynshop ki khniang sniehdoh dang shen ha Mahendraganj.
Ka CEO ka VASU ka Shabnam Mohan Raj hynne ka sngi kala pyntip ba ïa kine ki 40 ngut ki briew ba don khniang sniehdoh yn sa examin da ki doktor Dermatologists jong ka Guwahati Medical College (GMC) Hospital lashai ka sngi (sngi ba-ar). Ka pyntip ba 27 ngut na kine ki briew ki dei na Mahendraganj bad 13 ngut ki dei na Ampati.
Ka Shabnam ka pyntip ba hynriew ngut ki dkhot ka VASU kila shim wai ïa ka bos ban kit ïa kine ki nongpang sha Guwahati bad kila pynbeit ruh ïa ki jaka sah na ka bynta jong ki. Ka pyntip ba ka VASU kala shimkhia ba kine ki briew kin ïoh ïa ka jingsumar bad kala lum sakhi ruh ïa ki um na ki 6 tylli ki Shnong na ka bynta ban phah leh test.
Lah ban kdew hangne ba ha ka 16 tarik Nailar, ha ka jingleit iuhkjat ha Mahendraganj, ka Shabnam kala lap ïa bun ngut ki briew kiba kot da ki hajar ngut, kiba ïoh ïa u khniang sniehdoh ha ki shnong ba sawdong ka Mahendraganj. Kala shon ruh ïa bun tylli ki dur bad pynsaphriang ïa ki jingtip bad ki Heh Ophisar ka Sorkar Meghalaya bad ruh bad kiba bun ki paralok jong ka da ka jingthmu ban pynïoh ïa ki lad jingiarap na ka bynta kitei ki paidbah.
Hadien ka jingmih khubor shaphang une u khniang sniehdoh, u Deputy Commissioner ula byrngem pynban ban ujor da ka ejahar pyrshah ïa ki briew kiba pynsaphriang ïa ka khubor khlieng tyngab halor une u khniang sniehdoh.
Ka Shabnam ka ïathuh ba hadien ka jingmih khubor shaphang une u khniang sniehdoh, u Deputy Commissioner Ram Kumar ula phone ïa ka bad bthah ba kan ïathuh sha ki Lad Pathai khubor ba ka khubor halor u khniang sniehdoh ha Mahendraganj ka dei tang ka khubor khlieng tyngab bad ba kam shym la don satia kaba kum katei ka jingjia.
“Haba nga kyntait bad kdew ba ki don bun ngut ki briew kiba la ngat ha une u khniang sniehdoh, ula byrngem ïa ka ban leh da kaba tyngeh kat kum ki lynti jong ka Aiñ” ong ka Shabnam haba kyntait ruh ïa ka jingpynmih khubor jong u Deputy Commissioner ha ka 24 tarik Nailar ba ula dep kren ïa ka bad ba kala dep pynshai ba kam don satia ka jinglynshop jong une u khniang sniehdoh.
“Ka jingthmu jong ngi hi ka long ban pynlong ïa ka Health Camp ha Mahendraganj da ki doktor Dermatologists bad ban ai jingsumar ïa ki briew hynrei namar ka jingbyrngem jong u DC, ngi la sheptieng bad hap kynran dien noh” ong ka Shabnam.
Lah ban kdew hangne ba ka Sorkar Meghalaya kala kala kheiñ ïa kane ka jinglynshop u khniang sniehdoh ha Ri-Lum Garo ba ka dei kaba ju don ha ki briew ka thaiñ’ bad ïa kane la pynpaw shisyndon hapoh ka Ïingdorbar Thaw Aiñ ka Jylla, U Myntri ka koit ka khiah Bah A.L.Hek ula ong ba une u khniang sniehdoh u dei uba don beit ha ka thañ bad sot ruh ïa ka kaiphod jong ka jingtohkit bala leh da ka Tnad ka koit ka khiah.
Hynrei ka Shabnam kala ong “Ka Sorkar kala pyrshang ban pyni ïa kane ka jingjia kum kaba ju long barabor. Ka kyntien bala pyndonkam ka thew ba kam don satia ka lynti. Lada ka dei shisha kaba ju jia barabor, dei ban shim ïa ki sienjam ba kyrpang ym ban shu ieh kumto”.
Ka Shabnam ka ïathuh ba ka Sorkar Jylla kala phah ïa ka kynhun ki Doktor sha Mahendraganj kiba khmih pynban na ka jing wan shim dawai ki briew lyngba ka OPD ha Mahendraganj CHC kaba long tang lai bnai kata naduh u Jylliew haduh Nailar 2019. Kat kum ka kaiphod, ki don haduh 313 ngut ki briew ba ngat ïa une u khniang sniehdoh ha u Jylliew, 359 ha u Naitung bad 207 ha u Nailar.
Haba buh jingkylli ïa ka jingshaniah jong ka Tnad ka koit ka khiah tang ïa ka jingkheiñ jong ka lai bnai, ka Shabnam ka ong ba lada khmih ïa ki thup jingthoh ba shisnem eiei, ka jingkheiñ ka lah ban kot da ki hajar ngut.
Ka Shabnam kala kdew ruh ba bun na ki briew ba ngat ha une u khniang sniehdoh kim shym la leit satia ban shah sumar ha ki CHC bad naamr kata, ban shaniah ha ki jingkheiñ ba ïoh na ka OPD kam dei satia ka jingkheiñ ba lah ban pyni shai ïa ka jingdon jong ki briew ba ngat ha une u khniang.
Namar ka jingkynthoh ka kynhun ki Doktor ba ka jingngat ïa u khniang sniehdoh ka dei ruh namar ka jingleh sih bad ka jingia sum ha ki pung ba jaboh, ka Shabnam kala buh jingkylli ïa ka Sorkar halor ka sienjam lada don, kat kum ka Swatchh Bharat Abhiyan bad ka National Rural Health Mission (NRHM).
Khlem da pynbunktien, ka Shabnam ka ong ba ka jingkynthoh ba ki briew ki sum ha ki pung ba jaboh ka dei ka bym shisha bad pynshai ruh ba bun ki longïing ki don ïa ki pung um (tube well) bad ba ki nongshongshnong ki pyndonkam ïa ka um na kine ki pung ban sum.
Ka Shabnam kala kynthoh tyngeh ruh ïa ka jingkam ka Sorkar Jylla ba kane ka jinglynshop u khniang sniehdoh ka dei kaba ju jia hadien ka jingshlei um bad ong bad ka jingdon jong ki briew ba ïoh ïa une u khniang sniehdoh kala don wat hashuwa ka jing shlei um.
Ka Shabnam kala buh jingkylli ruh la ka MLA ka thaiñ ka Dikkanchi D Shira ka tip ne em ïa kane ka jingjia hapoh ka Consti-tuency jong ka “Lada kam don jingtip, balei ba kam don jingtip haba da ki hajar ngut ki briew ha ka Constituency jong ka, kila mad ïa ka jingeh”. Halor kine ki jingkylli baroh, ka Shabnam ka pyntip ba ka VASU kan ïai bteng ban leh ïala ka jing ka kam na ka bynta ka bit ka biang jong ki nongshongshnong tad haduh ba ki bor sorkar kin kyndit thiah.