Press "Enter" to skip to content

ïoh khusnam bar ri ka lanot ha kti ki mafia khaïi dewiong tuh

Shillong, Nailur 16 : Ka nongtrei seng bhalang kaba la long ka shem lanot ha ka kti ki mafia khaïi dewiong tuh, ka kong Agness Kharshiing ka la ïoh ïa ka khusnam na bar ri syndon kaba la tip kum ka 11th International Hrant Dink Award ha ka jingïalang kaba la long ha Lutfi Kirdar International Convention and Exhibition Centre, Istanbul ha ka Sngi U Blei.
ïa ka kong Agness la bom la tied haduh ba kam tip briew shuh ha kumba 40 ngut ki mafia khaïi dewiong tuh tang namar ba ka ujor halor ka jingjur palat ka jingtih bad khaïi dewiong beaiñ ha ka jylla ha ka por ba dang khang tih bad khaïi dewiong ka NGT. Ka la shah jied ban
ïoh ïa kane ka khusnam na ka Award Committee na ki dkhot ka Emma Sinclair -Webb bad ka nongïoh khusnam International Hrant Dink Award 2018 ka Murat Celikkan.
Haba kren ha katei ka jingïalang ban pdiang ïa ka khusnam ka kong Agness ka la ong “ Ki paidbah ki la dei ban kren ïa kaei kaba dei ban kren, ïarap ïa kito kiba donkam ka jingïarap khamtam ïa kito kiba shah thombor bad shah ïuhroit ki hok long briew man briew jongki namar lyngba kine yn jop ïa ka jingsniew. Da ka jingïatrei lang ngi lah ban wanrah ïa ka jingsuk ha kane ka pyrthei khnang ba yn pyndap ïa ka mynsiem ki khyllung khynnah da ka jingieit ym da ka jingsheptieng”.
Ka kong Agness kaba long ruh ka Chairperson jongka CSWO ka la kren pyrshah ruh ïa ka jingbamsap ha ki polisi treikam jong ka rep ka riang kaba wanrah ka jingduk jingkyrduh bad kren ruh halor ka jingïeng ialeh pyrshah jong ka ïa ka jingkhaïi dewiong beaiñ ha ka jylla.Wat hapdeng kiba bun ki dieng pyngkiang ka ïai bteng ban ïeng ïaleh na ka bynta ban ïada ïa ki hok jong kiba duk ba kyrduh, ki longkmie, ki khynnah bad kino kino ki jingeh ba ki paidbah ki ïa kynduh.
ïa kane ka khusnam Hrant Dink Award la ai shisien shisnem da ka Hrant Dink Foundation ban kynmaw ïa ka sngikha jong u Hrant Dink u nongthoh khubor ba pawnam ka Turkey.