Press "Enter" to skip to content

Ka jingbate kam thymmai u Conrad

Hadien ka jingiehnoh u Bah Metbah Lyngdoh kum u Minister ka sorkar jylla,kadei ka kabu ïa u Myntri Rangbah ka jylla ban bate kam thymmai ha ka kynhun Myntri jong u. Ka jingbate kam, kam dei eh tang ban thung sa uwei u Myntri ha jaka ba thylli, hynrei ban bate kam ïa ka jingtreikam jong ki Myntri ka sorkar jong u kiba la bat ïa ki tnad treikam bapher bapher ha kine ki shi snem shiteng baladep.
Ka jingbate kam ha ka kynhun Myntri ne ka jingkylliang bat kam ha ki Myntri kam dei ka kam kaba la ju bynshet ha u Myntri Rangbah kum u khlieh duh jong ka sorkar. U Myntri Rangbah kum u nongïalam ba hakhmat, udei uba tip kano ka tnad treikam kababym treikam bha bad dei ma u ruh uba tip uno u Myntri uba treikam bha bad uno u bym lah ban leh bha. Dei namar kane ka daw ruh ba la ju ïohi u Myntri Rangbah duh jong ka ri India ha kine ki san snem baladep bau long Myntri Rangbah duh jong ka ri India, na ka por sha ka por u ju pynkylla ïa ki kam ne ki portfolio ba bat da ki Myntri ka sorkar jong u. Hynrei ha Meghalaya, ym ju kham ïohi koit ïa kane ka jingpynkylla, lait teng khat lano eh, kata ruh ka jingpynkylla kaba rit.
Ka sorkar MDA ba ïalam da u Conrad mynta ka la dap shi snem shiteng bad ha kine ki por kum u Myntri Rangbah khlem pep un lap beit kano ka tnad treikam kaba duna lane une u Myntri uba tbit treikam bad uba lah ban pynïaid shaphrang ïa ki kam. Shisnem shiteng kam dei shuh ka por kaba lyngkot bad ki soh kila dei ban paw, la ka long ki soh ba bha ne ki soh ba sniew.
Ha ka jingbishar jong kiba bun ba lang kaba u tnad treikam kaba dei ban hap pynkylla nongpeit nongjngoh, kadei ka Sports and Youth Affairs Department. Ki paidbah lehse kim lah ban ïohi kumno ka ïaid ka kam, hynrei kaei kaba ki lah ban ïohi kadei lyngba ki lad pathai khubor ba la pyni live telecast ïa ka dorbar jong ki MLA. Uwei napdeng ki Myntri uba la mih bha ka jingïakren ki paidbah, kynthup ruh ha ki Social Media, udei u Myntri ka tnad Sports, u Bah Banteidor Lyngdoh, ha kaba la ïohi ïa ka jingïarkhie ki paidbah haba don ka jingïakylli jingkylli bad ka jingjubab hapoh Assembly. Na ka jingjubab jong u Myntri ka tnad Sports, i kumba ka don ka jingtlot ha ka jingtreikam ne ka jingbym lah ban pynshai bha ïa kaei kaba ki MLA ne ki dkhot jong ka ïing ki kwah jingshai. Hato u Conrad un bujli noh d auwei ha jaka jong u Bah Banteidor?. Kan shong eh ha ka jinglap bad ïohi u Myntri Rangbah, ïoh lehse u Myntri Rangbah pat u lap ba u Bah Banteidor u biang ka jingtreikam, tangba um lah pynshai bha pat ha Assembly. Kata kan shong ha ka jingbishar jong u Conrad Sangma.
Kawei pat ka tnad treikam kaba ki paidbah ki ïakren bha ha kine ki sngi, kadei ka tnad pohïing ne ka Home Department, kaba la bat da u James K. Sangma, u hymmen jong u Conrad Sangma. Ha kine ki shisnem shiteng, ki la don ki jingjia kiba ka Assam la wan leh donbor ha sha Meghalaya. Ka jingjia kum sha Huhuapara,Malangkhona, West Khasi Hills District, nangta sha Balakhawa, Ri Bhoi District, Psiar bad Khanduli Jaiñtia Hills District, ki pynpaw ba ka tnad pohïing kam shym la lah ban ai jingïada ïa ki briew la jong. Haduh mynta la shi snem shiteng, ym pat don kano kano ka jingïakynduh bad ka sorkar Assam khamtam ha ki kyrdan kiba kham ha jrong na ka bynta ban ïapynbeit ïa u pud u sam. Wat lada hapoh jylla kam pat don kano kano ka jingjia kaban ktah ïa ka suk ka saiñ ne ka law and order problem, hynrei kine ki jingjia ki buh jingkylli ïa ka sorkar halor ka jingïapynbeit ïa u pud u sam bad ka Assam.
Hynrei ym tip pat, la u Myntri Rangbah u nud ne em ban wanrah ka major reshuffle ne ka jingkylliang kam kaba heh, ha kaba un ktah ïa ka kynhun myntri baroh kawei. Ne kan shu don tang ka jingpynrung ïa i katt katne ki tnad ba la ju bat u Bah Metbah Lyngdoh ha kiwei pat, da kaba ïapynbiang lang bad u Myntri iu ban sa rung thymmai ha ka jaka jong u Myntri uba la long u Speaker ka Meghalaya Legislative Assembly mynta. Baroh kan shong ha u Myntri Rangbah, namar ka bor baroh la ai ha u, tangba ha ka sorkar khleh khawlang kaba kum kane, u Myntri Rangbah un nym ïoh ka bor laitluid halade, hynre un hap ban kynjoh ktien lang ïa ki Party ba ïasynroplang ha ka sorkar.