Press "Enter" to skip to content

Ka jingpynduh ïa ka plastik ha ïewduh

L. G. Laloo

Ka jingbret pathar ki briew ïa ki mar plastik ka la wanrah shisha ïa ka jingisaitmet kaba khraw ha kylleng sawdong. Wat lada don la ki thliew ïing naduh u ba riewspah haduh uba duk, naduh u khynnah haduh u rangbah ki pyndonkam ïa ka, hynrei na ka jingbym don ka awarness programme naduh ba sdang ka la pynlong ïa baroh ban bret bad pynsatah ïa ka mei mariang baroh kawei. Namar ba ka plastik ka dei ka mar ka bym pyut kumta kat shaba bret ka wanrah ïa ki jait pa ki jait ki problems kiba ktah ïa ka imlang sahlang bad ka pynjot ïa kiei kiei kiba ka mei mariang ka preserve na ka bynta u khun bynriew. U Prime Minister Narendra Modi ha ka jingkren jong u ha ka Independence Day u la buh target ba ka 2 tarik jong u bnai Risaw, ka sngikha jong u Mahatma Gandhi kan long ka sngi jong ka jingsdang ka jingïaleh ban pynduh ïa ka Plastik. Ban shu kren te kaba suk hynrei lah ma ban pynduh haba ïa ka tynrai ba pynmih (Industries) ym lah ban khang. Nalor nangta kumba ka long mynta, kat shaba phai la ha ïew ha Hat, ha shnong ha Thaw bad ha ïing ha sem la dap da ki mar Plastik suda bad wat ïa ki jingbam kai bad ki umsoh ne umdih ruh la packed ha ki plastik. Kumta ka jingthmu ban pynlong Plastik-free ïa kano kano ka jaka kam long kaba suk, ka lah pynban ban long kum ka scheme pynkynriah nongbah jong u Md.Bin Tuglak hyndai. Ha kaba ïadei bad ka jingpynlong plastik free zone ïa ka Iewduh, ki Seng Bhalang, ka Sorkar,ka KHADC ne ka Municipal ki la dei ban pyrkhat khia shuwa namar ba katba ki karkhana shna plastik ki dang ïai bteng ban pynmih plastik kan long kaba eh ym tang ïa ka Iewduh ne ka Jylla hynrei ha ka Ri India hi baroh kawei ban pynduh ïa ka. Haba puson ïa ka jingkren jong ki MDC halor kane ka mat lah ban ong ba ka long ka jingkren laplah kaba ym don jingmut bad kaba pynpaw ba tangba ki long ki Nongmihkhmat kin shu bulldoze ïa ki paidbah khlem da thir sani bha bad khlem wad ïa ki lad kumno pat ban wanrah jingmyntoi na ka. Ha ngi ki paidbah lada ka dei ka kam plastik ne ka kam pom dieng ne kam tih dewïong ne kam synshar ne ka kam thung Syiem ne kano kano ka kam haba ngi jied ïa ki Nongïalam kum ki MP,MLA, ne MDC, ngi khmih lynti ba kin long kiba stad, kiba don ka vision bad kiba lah ban wanrah ki jingmyntoi ïa u Paidbah. Hynrei wat hadien 47 snem ba ngi la ïoh ïa la ka jong ka Jylla ngim pat poi shano shano ruh namar ka paw ba ngi jied ïa ki khlieh bula kiba ym don ka jingïohi jngai bad kiba buh pynban ïa ngi bad ïa ka lawei jong ki longdien jong ngi ha ka jingartatien. Baroh ngi tip bad ngi ïohi ïa ka jingsaphriang ki plastik jot naduh ki pla song jingsong haduh ki plastik sopïing, ki syntex jot, ki borti jot, ki dabor jot, ki byrni khaw, ki byrni cement bad kiwei kiwei kiba ym lah shuh ban jer kiba mih tang na ki dong jong ka Sor bad khapsor jong ka Shillong man la ka sngi khlem pat kren ei ei ïa ka Jylla baroh kawei. Ki MDC bad u Syiem Mylliem kiba peit ïa kane ki la dei ban ïohi ba ym tang na Iewduh ba mih ka Plastik hynrei ha kylleng sawdong jong ka Sor bad ba lada khang ha Iewduh lah pat ban ïoh nawei nawei wat na shabar ka jylla ruh. Ki la dei ruh ban ïohi ba hangno hangno la ha ïew ne ha ki dukan shnong ki nongthied ki pan pla plastik khamtam haba thied doh ne dohkha. Ki kren ïa ka environment hynrei kim ïohi pat ba ka jingbha kaba kongsan halor ka jingpyndonkam da ka plastik ka long ba ïa ka jingjyrngam jong ka mariang lyngba ki khlaw ki btap la pynneh bad pynsah. Kim tip ba kane ka dei ka jingshisha kaba tang kito ki briew kiba ngam sha ki lawbah lawkyntang ki mad bad ki ïohi ba ka jingsloit lyngkhuid bad ka jingleh be-ijot u khun bynriew ïa ka Mei Mariang, lait tang ha kaba bret pathar ka la duna shibun. Mynta pat ka jingleh jong ki kum ki nongïalam ha kaba declare Plastik free zone ka thew da kumwei pat. Ka paw kumba ki ong indirectly ban pom lut ïa ki sla bad ban pynsynlen ïa ka mariang na ka bynta ban song jingsong ha ki ïew, khlem pyrkhat ba lada pyndonkam da ki sla (lamet) ban song jingsong ha baroh ki ïew jong ka Meghalaya, tip keiñ kaei ka ban jia ïa kane ka Jylla tang hadien saw, san bad hynriew bnai.
Ha ka jingshisha kum ki nongmihkhmat shuwa ba kin kren sha ki paidbah bad ban pynshai ïa ka jingthmu ban pynlong Plastik-Free-Zone ïa ka Iewduh ki la dei ban don ka jabieng kumno ban pynkylla ïa kane ka issue, sha ka employment generation issue namar ha kane ka juk jong ka Science & Technology ym don jingeh ban wad lad kumno ban recycle ïa ki Plastic. Lada ki Scientist na Japan ki lah ban pynmih bording na ki jakhlia ha Marten don jingeh aïu ban buh kawei ka recycle bin ha Meghalaya? Ka jingbret satah ïa ki plastik ka long ba shisien ba la pyndonkam kim ïaid kam shuh bad kaba sah ka long sa tang ban recycle ïa ki ha kawei pat ka dur. Kumta lada lah ban pyndonkam biang ïa ki ha kaba pynmih da kiwei pat ki jait mar lane da kaba pyndonkam ha kaba siang rong surok bad lada don lei lei sa ka incentive ïa ki nongtam plastik, yn ïohi ba ki wah, bad wat ka dam Umiam ruh kan khuid hi na ki plastik.
Kane ka long tang ka jingai jingmut namar ym lah da lei lei ban pynduh jait ïa ka plastik la na Iewduh ne nangno nangno namar kam dei kabashu rep hynrei kaba pynmih da ki karkhana jong ka Ri hi. Hooid lah ban song jingsong da ki kotkhubor hynrei kine ki kham sniew ban ïa ka plastik. Ka sisa bad ka carbon kaba pyndonkam ban shon ïa ki dak ka long kaba sniew haduh katta katta bad kaba long bih ruh kaba ki ju pyndonkam ban pdem ha ka kiad ba kan kham khor. Kumta ban solve ïa kane ka problem, ka la dei ka por ba ki samla kiba la pass ïa ki kyrdan engineer bapher bapher ban form ki kynja Cooperative Society ne ki Joint Venture Society ban wad ïa ki lad ki lynti dalade hi kumno ban check ïa kane ka menance. Ka Sorkar NDA naduh ki por jong ka jinglong PM u Late Atal Behari Vajpayee haduh mynta ka dang ïai pynshlur ïa ki Samla ban lap ïa kiei kiei kiba thymmai (innovative inventions) bad kam hesitate ban finance lada ka PR (Project Report) ka biang. Kumta kumba ka ktien ka ong “Haba don ka mon, don ka lynti’ ki samla shynrang ne kynthei ki la dei ban pyrkhat khia na ka bynta ka lawei jong ki hi ym ban shu long sah ki pressure group namar lada ma ki ki shong ha ka shuki ha ka lashai la shisngi kajuh ka jingeh kaba ki mad mynta kan repeat ha ki ruh.