Press "Enter" to skip to content

Ka Mawkhar SC kum ka nam lahduh ha ka First Division

Mynta ka Imson SC pyrshah ïa ka Nongkrem SC

Shillong, Nailur 16: Ka Mawkhar SC ka la ïoh ban bat ïa ka nam kum ka lahduh ha ka lympung ïalehkai First Division ba la pynïaid da ka Shillong Sports Assiciation
Ha lyndet jong kane ka nam lahduh ka la wan hadien ba ka la lah ban pynliem noh ïa ka Mawlai SC da 4-2 kol ha ka jingïalehkai kaba la long mynta ka sngi nyngkong ha madan JN Stadium, Polo Shillong.
Haba phai sha ka jingïalehkai dei ka Mawlai kaba la pynkhih jar nyngkong lyngba u Basuklang Bina ha ka minit kaba 28, katba ka Mawkhar ka la ïoh ban thep ïa ka kol pynïakhaid ha ka minit kaba 36 da u Aibiangmame Nongneng, bad hashuwa ban kut ka jingïalehkai jong ka kylla step u Restorewell Marbaniang u la ïoh ban pynkhih jar ha ka minit kaba 43 kaba dei ruh ka kol kaba ar na ka bynta ka Mawkhar.
Ha ka kylla miet ki rangïalehkai jong baroh arliang kila ïakhun tyngeh ban ïoh thep kol bad ha ka jingïakhun tyngeh ka Mawkhar ka la ïoh ban thep sa ïa ka kol kaba lai kaba la wan lyngba u Defender Pyngrope ha ka minit ba 55.
Watla ka Mawlai ka la shah thep kol biang hynrei ka la pyrshang ban ïakhun tyngeh ban pynphai kylla bad dei ha ka minit kaba 78 ka la ïoh ïa ka penalty hadien ba u rangïalehkai dien ka Mawkhar u la pynhap jubor ïa u rangïalehkai ka Mawlai hapoh ka area kol bad u Oversharp Iawphniaw uba la wan ban bahkhlieh na ka bynta ka penalty u khlem pynlehnohei bad pynrung suk ïa ka bol hapoh ka jar.
Ha ka jingïakhun kaba la sdang ïakhaid bha ka Mawkhar ka la ïoh ban thep kol biang ha ka 90 minit lyngba u Banehskhem Khongsdam. Lyngba kane ka jingjop ka Mawkhar SC ka la ïoh ruh ban kiew sha ka lympung ïalehkai ba kham heh jong ka SSA ka Shillong Premier League.
Ha ka miej ïakheiñ poiñ ka Mawkhar SC ka la khur 17 poiñ na ki phra sien ki jingïakhun jop san sien, ïakhaid ar sien bad shah rem noh tang shisien katba ka Mawlai SC kala mad ïa ka jingshah rem kaba nyngkong eh ha ka Mawkhar ha kane ka lympung bad na ki hynñiew sien ki jingïakhun ka la jop lai sien, rem shisien, ïakhaid lai sien bad khur 12 poiñ.
Ka jingïalehkai mynta ka sngi kan long hapdeng ka Imson SC pyrshah ïa ka Nongkrem SC ha ka por 3:00 baje janmiet.