Press "Enter" to skip to content

Thung Lecturer ka MPSC da ki Master Degree kyntait ïa ki PhD bad NET

Shillong, Nailur 16 : Ki samla wad kam kiba la biang ka kyrdan jingpule kila noh mynsiem haduh katta katta haba ka Meghalaya Public Service Commission (MPSC) ka la kyntait ïa ki bad thung da kiba dang kham rit kyrdan ha ki post lecturer ha ki College sorkar bapher bapher hapoh ka jylla.
Kumba ka paw na ka jingthung kam ba dang shen ka MPSC ka la kyntait ïa kiba la pass ïa ka PhD bad NET bad thung kam pynban da kiba dang pass ïa ka Master Degree.
Ha kane ka jingthung kam Lecturer ym shym la pynlong ruh ïa ka Written Test watla da ki spah ngut ki samla ki la thep aplikashon na ka
bynta kitei ki post.La thung ïa ki da kaba pynlong tang ka Personal interview, aptitude, general awareness bad subject/work knowledge. Ym shym la buh ïa ki video camera ban ring ïa ka interview ban pynshisha ba kam don ka jingleh thok leh shukor wat la ka don ka hukum ba dei ban buh da ki video camera ha baroh ki interview jong ka MPSC khamtam ha kiba kham long kynrum kynram kum kine ki rukom interview.
ïa ka result la pynmih ha u Jymmang 2019. Hadien ka result kiba bun kiba ïakhun ïa ka interview ki la sngewdiaw namar kiba ïoh ki dei ki Master Degree katba kiba la pyndep ïa ka PhD bad NET kim shym la shah jied. Kum ka nuksa na ka bynta ka English Lecturer ki don 140 ngut kiba thep bad kiba la jied ban ïaleh interview ki long 117 ngut. Na kitei la thung 6 ngut, 2 ki dei kiba la pass ia ka PhD bad NET, 1 iba pass tang ka NET bad 3 ki dei kiba khlem pass PhD ne NET ruh.
Kane ka kam ka la nang kyllaiñ khamtam hadien ba kiba bun ki la ïoh jingtip ba iwei iba la pass bad shah thung ha katei ka post lecturer ha ka English i dei iba dang rit kyrdan bha bad la kynnoh ba i dei i khun ruit jong u Chairman ka MPSC.
Hadien ba la mih katei ka result ki don ki samla ba thep kam kiba la wad jingtip bniah na ka MPSC da ka RTI bad la pynpaw ba ka jingpynhiar ïa ka kyrdan jingpule ban thep kam ka dei ka rai jongka Commission haka jingïalang jongka kaba la long ha ka 29 tarik Risaw 2018.
Ha katei ka jingïalang ba la pynïaid da u Chairman ka Commission u L.M Sangma la pynpaw ruh ba la rai ban weng noh ia ka kyrdan PhD na ka bynta ka post lecturer. Hynrei la kynnoh ba kane ka jingrai ban pyndam noh ïa ka kyrdan PhD ka lah ba long tang ban ïoh leh buit tuh ha ka jingpynrung kam. Nalor ha ka kyndon jong ka MPSC la pynpaw balada ki samla ba thep ïa kitei ki post kim pat pass ïa ka PhD ki dei ban pass ia ka NET da kaba ïoh 55 % ki mark. Kane ka kdew shai kdar ba kito kiba la shah thung kiba khlem pass PhD ne NET ruh ki dei kiba la thung beaiñ da ka MPSC. La sngewthuh ba kine ki samla ba thep kam ki la leit ai shithi wat shaduh u myntri rangbah ka jylla ba un peit bad shim khia ïa kane ka kam khnang ba kan ym ktah ïa ka pule puthi ha ka jylla.