Press "Enter" to skip to content

150 snem yn dap ka Tura ka nongbah ba 2 ka jingheh ha jylla

Tura, Nailur 20 : Ka nongbah jongka West Garo Hills ka Tura, kawei na ki nongbah ba la rim bad wan ba ar ka jingeh ha ka jylla kan rakhe ia ka jingdap 150 snem ha ka taiew ba ar jong u Nohprah mynta u snem.
ïa kane la rai da ka Steering Committee ha ka jingïalang kaba la long mynta ka sngi ha DRDA Hall, Tura. Ha kane ka jingrakhe la rai ruh ban jer kyrteng thymmai ïa ki katto katne ki jaka kiba pawnam ha ka nongbah Tura. Ha ka jingshisha ïa kane ka jingrakhe la dei ban pynlong naduh u 2017 hynrei ym shym la lah ban pynlong na kiba bun ki daw bym lah kiar khamtam ka jingpynkylla Deputy Commissioner ba khah khah ha katei ka District bad poi artat sa ka election MLA ha u 2018. Ha kane ka jingialang ba mynta ka sngi la rai ban pynlong da ki prokram bapher bapher ban rakhe ïa kane ka jingdap 150 snem ka nongbah Tura. ïa kane ka jingrakhe la rai ban pynlong namar ka jingthrang hi naduh u Myntri Rangbah u Conrad K Sangma, ka MP Tura ka Agatha K Sangma bad u MLA ka North Tura u Thomas A Sangma uba dei ruh u Chief Adviser jong u myntri rangbah ka jylla.
Haba pynïaid ïa ka jingïalang u DC ka West Garo Hills u Ram Singh u la ong kane ka jingrakhe ïa kane ka jingdap 150 snem ka nongbah Tura kan long ka jingrakhe ban sah jingkynmaw namar yn kynmaw burom ruh ïa kito baroh kiba la noh synniang ban pynlong ïa kane ka nongbah kumba ka long mynta. U la ïathuh ba u la ïoh jingtip ba mynshwa ka nongbah Tura ka long kaba khuid ba suba, ki wah duit ki sngur khlir khlir bad ka dap da ki dieng ki siej ba pynjyrngam ïa ka hynrei ha kine ki khyndiat snem ki wahduit ki la dap da ki jakhlia bad ka la duh ruh ïa ki jingjyrngam ba itynnad. Kumta u la banjur ba ha kane ka jingrakhe donkam ban ïai ban bad pynkynmaw ïa ki paidbah ïa ka jinglong itynnad ba mynshwa jong ka nongbah Tura. Halor ka jingtyrwa ban pynkylla kyrteng u ong ka long kaba biang eh hynrei donkam ban da bishar bniah bha da baroh ban jer kyrteng ïa ki dong da ka kyrteng kaba ia mynjur lang bad ka dei ban long kaba kit jingmut.
Na ka liang ka DC ba rim ka Tura ka L.R Sangma ka la ai jingmut ba dei ban sdang noh kloi ïa kane ka jingrakhe da kaba ym donkam ruh ban thung bun ki committee namar kane kan shu pynbijai ei ïa ka por. Ka la ai jingmut ban sdang shwa da ka jingiakob dro ne thoh dur bad aiti beit ha ka tnad Art & Culture. Nalor kane kiwei ki nongïashim bynta ki la ai jingmut ban pynlong da ki kynja seminar ne ki jingïathir jingmut ha ki skul bad ki college. La ai jingmut ruh ba ka jingrakhe ka dei ba long halor ka nongrim ban phai sha ka Mynnor, Mynta bad ka Lashai.
La ai jingmut ruh ba ïa ka kyrteng Tura lah ban pynkylla biang sha ka kyrteng rim jongka kum ka Dura. Kumjuh ruh ban pynsah nam ïa ki jingtei ba rim kum ka jaka sah u DC, ka Christian Mission Girls School. Bun ruh kiwei kiwei ki jingai jingmut kiba ka committee kan sa shong pyrkhat biang shwa ban pynkhreh ïa ka prokram.

3 sngi yn ia kynduh