Press "Enter" to skip to content

Ba kwah tih mawshun ka M/s Star Cement Ltd. na ka shnong Brichyrnot

Ha u Risaw, 2019 khot pynsngew paidbah ka MSPCB

Khliehriat Nailur 20: Katkum ka jingpyllait khubor u Member Secretary jong ka tnat Meghalaya State Pollution Control Board (MCPCB) Shillong ha ka 18 tarik mynta u bnai la ong ba ka M/s Star Cement Meghalaya Ltd, Lumshnong, East Jaiñtia Hills District kan pynlong ïa ka jingpynsngew paidbah ne ka Public Hearing ha ka 19 tarik u Risaw 2019 ha ka shnong Brichyrnot, East Jaiñtia Hills District, ban pynsngew halor ka jingthmu jong ka Star Cement ban khlong ïa u mawshun na kawei ka jaka kaba don ha shnong Bri Shyrnot.
Katkum ka shithi la ïathuh ruh ba ka par mawshun jong ka company Star Cement kaba don ha shnong Brishyrnot ka don ka jingheh kaba 42.051 Hecter. La ong ruh ba ha kaba ïadei bad ka mariang,ka Company ka la dep ban aplai ïa ki syrnot (Environental Clearance) na ka tnat Ministry of Environment Forest & Climate Change, New Delhi.
Kumjuh ruh na ka liang ka ophis jong u Deputy Commissioner jong ka East Jaintia Hills District,u la dep ban ai jingbit ban pynlong ïa kane ka jingpynsngew paidbah ha shnong Brishyrnot ka ban long ha ka 19/10/2019.
La bthah ruh ba lada don mano mano ba kwah ban ïa shimbynta ha katei ka Public Hearing ki lah ban wad jingtip bniah ne pule ïa ki kaiphod na ki jingthoh (Summary Environmental Impact Assesment Report) kaba ki la ban ïoh na ka ophis u Deputy Commissioner East Jaintia Hills District, Ophis jong u Chief Conservator of Forest, Ministry of Environment & Forest, Govt. of India-North Eastern Regional Office, Lumbatngen Shillong, na ka ophis u Secretary Jaiñtia hills Autonomous District Council Jowai, na ka Ophis Librarian, District Library, Mynthong Jowai bad na ka ophis jong ka Meghalaya State Pollution Control Board, Lumpyngngad, Shillong.
Kumjuh ruh ki kaiphod kiba ïadei bad ka mariang lem bad ki kot ki sla (Documents) ha kaba ïadei bad katei ka project ban khlong mawshun na Brichyrnot, ladep ban thep ha ka website:www.megspcb.gov.in/Public Hearing.html.
Ha kaba ïadei bad kane ka project jong ka Compant Star Cement, Lumshnong na ka liang ka tnat Meghalaya State Pollution Control Board ka pdiang sngewbha ruh ïa kino kino ki jingaijingmut (Suggestion), ki jingkynthoh (Comments) bad ki jingpyrshah (Objection) na baroh ki nongshong shnong jong ka thaiñ bad ïa ki jingthoh lah ban pynpoi sha ka ophis jong ka Meghalaya State Pollution Control Board ‘ARDEN’ Lumpyngngad, Shillong-793014 bad dei ban pynpoi ha lane shuwa ka 18 tarik u Risaw 2019.
Ïa ka prokram ban ai jingpynshai ym pynïaid da ka ophis jong ka MSPCB bad kino kino ki jingthoh,ki jingkynthoh ym ym pdiang shuh hadien ka jingpynsngewpaidbah.
Ki tyllong khubor ki ïathuh ba na ka liang ka Dorbar Shnong Brichyrnot ka la dep phah ïa ka shithi ba ai jingkyrshan ne ka ‘No Objection Letter’ kaba la dep ban pynpoi sha ka ophis u Deputy Commissioner,East Jaiñta Hills Distrct myn ha ka 9/8/2019.
Ka Dorbar Shnong Brichyrnot ka pdiang ïa kane ka jingthmu ka M/s Star Cement Ltd. ba khlong ïa u mawhun na ka par kaba don hapoh shnong kaba ladep thied da ka kompeni kaba heh kumba 42.051 hektar. Ka Dorbar Shnong ka ong ba kane ka project jong ka Star Cement kan long kawei kaba lah ban ai jingmyntoi ïa ki nongshong shnong ha kiba bun ki liang.
“Kumta ngi kyrshan bad ngi la ai ruh ïa ka shithi No Objection Letter’ ban ailad ïa ka company ban khlong ïa u mawshun na katei ka par kaba don ha shnong Brichyrnot,” ong u kyrwoh na ka Dorbar Shnong.