Press "Enter" to skip to content

Da ki spah ngut poi ki paidbah haka jingïakop khwai ñiut ha Iewmawlong

Ka jingkhwai kaba phylla tam bad sien ba nyngkong haka Ri India

Nongpoh, Nailur 20: Da ki spah ngut ki paidbahna kylleng ki jaka ka thaiñ Nongpoh naduh ki longkmie longkpa, ki samla bad ki khynnah kkynthei bad shynrang mynta ka sngi kila mih ban leit khwai sha kawei ka jingïakop khwai kaba phylla bad kham pher ka ba ym pat ju jia koit haka jylla bad lah ruh ban ong haka ka Ri India hi baroh kawei, kaba dei ka jingïakop khwai ym da ki dohkha hynrei da ki ñiut kaba long ruh shibynta ban jingpynsngewthuh paidbah naduh ki khynnah, ki samla bad ki rangbah halor ka jingma ba khraw lada bret pathar ïaki ñiut bad lada ym leh bad bud katkum ka kyndon jong ka Solid Waste Management.
Ïa katei ka jingïakop kaba long ruh kum ka tamasa khwai ñiut la pynlong da ka ophis u Assistant Engineer, District Urban Affairs Unit, Ri-Bhoi District kaba dei hapoh ka State Urban Infrastructure Development Initiative Programme (SUIDIP) kaba la pynlong haka shnong Iewmawlong bad ïakatei ka jingïakop khwai la pynlong ha ka nala kaba don ha katei ka shnong mar pyrshah bad ka Iew Nongpoh.
Ha katei ka sngi ka jingïakop khwai la sakhi ruh da ka jingdon lang u Bah E Kharmalki Director ka tnad Urban Affairs, Shillong, ka Kong W Passah CBS PMAY, W. Shadap Field Co-ordinator, P Kharkongor Community Organizer SIPMIU, Bah A Kharkongor Rangbah Shnong ka Iewmawlong, Bah CB Syiem bad kiwei kiwei ki riew rangbah bad ki nongïalam ka Nongpoh Town Committee.
Ha katei ka sngi khnang ban lait naka jingpyndonkam ïaki plastic bad ban pynmih bujli pat haka jaka jong ka plastic la thung ruh ïaki sla lamet haka shnong Umbuda haka jaka ba don ki iing baduk bala shim bynta lang da ki khynnah skul jong ka St. Paul’s Higher Secondary School bad Alpha English Higher Secondary School ban long ruh kum ka jinghikai ban lait naka jingpyndonkam ïaka plastic.
Ka jingthmu jong kane ka prokram ka long ban ai jinghikai ïaki paidbah ba ki dei ban sngewthuh halor ka jingma kaba khraw naka jingbret pathar ïaki ñiut ki ñier, ki jaboh jabaiñ, ki plastic, ki bitor plastic bad kiwei kiwei kiba long ka jingma ïaka mariang.
Haba kren ha katei ka sngi naka liang u Director ka tnad Urban Affairs u la pynpaw ka jingsngewkmen kaba khraw ba kane ka dei ka sien kaba nyngkong bad ka dei ruh ka jingïakop kaba kham phylla kaba la sdang na Nongpoh kaba ym pat ju don ba leh ha kano kano ka jaka.
U la ong ruh ba kaladei ka por ba ki paidbah ki dei ban sngewthuh halor ka jingma jong ka plastic kaba la kynrei ha kylleng ki jaka bad wanrah ruh ka jingisih bad ka jingjot ïaka mariang bad ka sorkar mynta kala pynkhreh da ïaka mang tyngka ban buh ïaki kali kit ñiut ban kit ïaki ñiut bad bret haka jaka ba dei ban bret.
Ha kaba ïadei bad katei ka jingpynlong ïa katei ka jingïakop khwai kiba bun naki paidbah naduh ki longkmie longkpa, ki riew rangbah kila ai ka jingïaroh ïaka tnad Urban Affairs kaba la shimkhia ban pynlong kum katei ka jingïakop khwai kaba phylla kaba long ruh kum ka jinghikai ïaki paidbah ba ki dei ban sngewthuh shai ïaka jingdonkam ka khuid ka suba bad kiar naka jingpyndonkam ïaka plastic.
Kum ka jingpynshlur ïaki paidbah ba kin kiar naka jingpyndonkam plastic naka liang ka ophis jong tnad Urban Affairs, Ri-Bhoi District kala sam ruh ïaki khusnam sha ki nongjop, ha kaba ïaka nam ba nyngkong la rah da u paidbahIaishanbok Kleiñ, naka shnong Maswsyntai u bala ioh ruh ban khung ïaka song pisa kaba long T.7000/- lem bad ki tynrai dieng, haka kyrdan ba ar la ioh da ka Wanrihun Ranee bad khur ruh ïaka song pisa kaba T.4000/ lem bad ki tynrai dieng bad haka kyrdan ba lai la rah da u Rickson Mawphniang bad khur ïaka song pisa kaba long T.3000/ lem bad 7 ngut ki consolation prize kiba la ioh mar T.500/- bad mar T.100/- ïa baroh kiba la wan ban shim bynta ha katei ka sngi.