Press "Enter" to skip to content

Kem ka ANTF ïa ki Nongkhaïi droks ba bret heroin ha Pomlum

Shillong, Nailur 20: Ki Pulit ka Anti Narcotics Task Force (ANTF) bad ki Pulit ka Mawngap Police Station, kila ïoh ban kem ïa lai ngut ki Nongkhaïi droks kiba dei ki trai jong u droks bala shu bret ha ka thaiñ Pomlum ban lait na ka jingngat ha shrip.
Ïa une u droks ba khia haduh 298.16 gram bala thep ha ki pla, la bret ki artylli ki jaka ha Pomlum-kawei ha dukan sha bad kawei ha rud surok myn ha ka 17 tarik u Nailur. Hapoh ka 60 kynta jong ka jingtohkit, ki Pulit kila ïoh ban kem noh ïa ki trai jong une u droks.
Kine ki laingut ki dei u Kitborlang Ryntathiang uba dei u Nongniah taxi kamai, u Rishan Pyngrope uba dei u nongkhaïi khutia (middleman) bad u Rinku Saikia ba ju khot sin u Roy ne Babu uba dei u Nongshalan (supplier).
Kat kum ka jingïathuh ka Superintendent of Police ka East Khasi Hills Kong Claudia A Lyngwa, i ïathuh ba ha ka 17 tarik ka kynhun ka ANTF bad ki Pulit ka Mawngap Police Station kila ïoh tam ïa u droks heroin ba 298.16 gram-bala shu ieh ha ki pla ha rud surok bad ha kawei ka dukan ha Pomlum, 7 Mile Upper Shillong.Na ka dukan sha la ïoh kurup ïa u droks heroin u khia haduh 111 gram bad na rud surok marjan hi bad kane ka dukan sha u long 187 gram.
I ïathuh ba ka kynhun ANTF kala pynlong ïa ka jingtalasi kali ha kane ka sngi ha Upper Shillong hadien ka jingïoh jingtip ba ki don ki nongkhaïi droks ba mut pynïaid iew ïa u droks ha 7 Mile. I ong ba kane ka jingtalasi kala pynlong ïa ki trai jong une u droks ban ieh noh ïa u droks ha kine ki jaka tang ban lait na ka jingshah kem.
Ha ka jingtohkit, ki Pulit ANTF kila ïohksai ïa ki trai jong une u droks tang na kawei ka Local Taxi ML05-G-7902 kaba la pyndonkam ban wanrah ïa u droks ha Pomlum. Ka ANTF kala thwet ïa kane ka kali kumba 48 kynta eiei haduh ba kin da ïohkem ïa u nongniah uba la tip kyrteng u Kitborlang Ryntathiang ba 27 snem na Lumparing Kynjatphutbol.
I kong Claudia i ïathuh ba u Kitborlang ula ïalam lynti ïa ka kynhun ANTF sha ka jingïohkem ïa u nongkhaïi khutia (middleman) u Rishan Pyngrope ba 29 snem na Lumparing Kynjatphutbol bad une pat ula lam lynti sha ka jingïohkem ïa u nongshalan (supplier) u Rinku Saikia ba 25 snem, uba dei na Nongrim Hills, Shillong.
I Kong Claudia i ong ba ïa kine ki laingut ki nongkhaïi droks la ïoh ban kem tang hapoh ka 60 kynta hadien ba pynïasnoh ïa baroh ki sakhi bala ïohksai ha ka jingtohkit. I ong ba ki Pulit kila kurup noh ruh ïa ka Local Taxi bala pyndonkam da kine ki runar.
Ïa kine ki Nongkhaïi droks la register case ha Mawngap Police Station kat kum ka case nombor 27(09)2019 bad la pynngat ruh ïa ki hapoh ka kyndon 21(C) jong ka NDPS Act.
I Kong Claudia ila ai ka jingiaroh ïa ka jingtrei shitom jong ki Pulit ka Mawngap Police Station bad ka kynhun ANTF namar ka jingseisoh ka jingtohkit, kaba lam sha ka jingïohkem sa ïa kawei ka kynhun nongkhaïi droks hapoh nongbah Shillong. I ïathuh ba ka jingtohkit mynta ka dang ïaid shakhmat ban lapksai shuh shuh ïa kiwei pat ki nongkhaïi droks ba ju iadonbynta lang bad kine ki laingut.