Press "Enter" to skip to content

Pynbor ka CoMSO ïa ki Minister ban pynrung kyndon ILP ha ka MRSSA

Shillong: Hadien ka jingïakynduh bad u Myntri Rangbah, u Conrad Sangma bad u Myntri kam pohïing, u James Sangma, ka Confederation of Meghalaya Social Organization ( CoMSO) ha ka sngi ba ar ka la ïakynduh sa ïa ki katto katne ki Myntri ka sorkar jylla ban pynbor ïa ki ba kin ïakren ban pynrung ïa ki kyndon ka Inner Line Permit (ILP) ha ka Meghalaya Residents Safety and Security Act (MRSSA).
Kane ka kynhun ki Sengbhalang jong ka jylla, ka la leit ia kynduh ïa u Myntri Rangbah Symbud, u Bah Prestone Tynsong, ïa u Myntri ka tnad PHE, u Bah Samlin Malngiang, Myntr ka tnad pynroi Sor, u Bah Hamlet Dohling, u Myntri ka Koit ka Khiah, u Bah AL Hek)  bad kumjuh ruh ïa u Bah Metbah Lyngdoh, Parliamentary Party Leader ka UDP .
Katkum ka kyrwoh ba la phah da ka Seng, la ong ba ka CoMSO ka la ïakynduh khnang ïa kine ki nongïalam ban pynkynmaw bad dawa ba ki dei ban kyrshan ïa ka jingthmu ban pynrung ïa ki kyndon jong ka Inner Line Permit ha ka Amendment jong ka MRSSA . Ka kynhun ka la ban jur ruh ba ka sorkar ka dei ban pyndep noh ïa kane hapoh u bnai Risaw mynta ka snem.
Ka Seng ka ong ba ka jingïakynduh ka long kaba sngewtynnad ha kaba ïa ïakren bha ïa kane ka kam. “Ngi khmih lynti ba ngin ïoh ïa kaei kaba ngi angnud, khnang ban lah ban khanglad ïa ka jingwan rung kyrthep ki mynder sha kane ka jylla”, la ong ka kyrwoh, ba la phah da u Chairman ka CoMSO, u Bah Robertjune Kharjahrin.