Press "Enter" to skip to content

Pynlong ‘Special Nutrition Camp’ ka Dept AHS jong ka MLCU ha ka shnong Laitmawroh EKH

Shillong, Nailur: Ka Department jong ka Allied Health Sciences, Martin Luther Christian University kala pynlong ïa ka ‘Special Nutrition Camp’ ba saw sngi kynthih naduh ka 16 tarik mynta u bnai hapoh ka shnong Laitmawroh, Khatarshnong Block, East Khasi Hills District, shibynta jong ka “Rahtriya Poshan Maah”lane ka “National Nutrition Month” ha ryngkat ka jingïatreilang bad ka National Service Scheme (NSS) jong ka University.
Ka jingthmu ba kongsan ha kaba pynlong ïa kane ka ‘Nutrition Public Campaign’ lane ka ‘Poshan Abhiyaan Jan Andolan’ kalong ban pynshai paidbah halor ka jingdonkam ban bam ïa ki jait jingbam kiba tei ïa ka koit ka khiah, ka jingïaleh pyrshah ïa jingsngaid palat pud, ka jingktah ïa ki khynnah kiba la sdang khie samla lyngba ka bam ka dih bad halor ka jingdonkam ban kyntiew bad pynpaw pyrthei ïa ki jait jingbam ba la pynmih da ki nongrep jong kito ki thaiñ.
Ha ka 17 tarik mynta u bnai la ïoh ban pynlong ïa ka prokram aijingsumar (Health Camp) da ka jingthmu ban ïarap ïa kito ki briew kiba dun ha ka liang ka ïoh ka kot hapoh ka imlang ka sahlang da kaba pynlong ka jingeksamin ei, ka jingsumar khmat bad ka jingai dawai ei sha kumba 70 ngut ki nongshong shnong kiba la wan ïashim bynta ha katei ka camp.Nalor kata la pynlong ruh ïa ka jingleit jngoh kaba ha man la ki tyngkong ïing da ki samla pule ban wad jingtip ha kaba ïadei bad ka bam ka dih kaba man la ka sngi ka jong ki.
Ha ka 18 tarik la pynlong ïa ka jingpynshai paidbah da kaba pynshong nongrim halor ki kaiphot lyngba ka health camp bad katei ka jingleit jngoh sha ki tyngkong ïing.Ha kane ka prokram la pynsngewthuh sha ki nongshong shnong halor ki jingmyntoi lyngba ki jingbam bala pynmih da ki trai shnong jong ka thaiñ, halor ka jingktah na ka jingkha bun khun, halor ka koit ka khiah jong ki khynnah kiba la sdang khie samla namar ka jingbym biang ka bam ka dih, ka jingdonkam jong ki longkmie kiba dang kham khynnah ïa ki jingbam kiba tei bad kiwei kiwei.ïa kine baroh la pynshai ha ka rukom jong ka jingïalehkai skit, phawar bad drama.
Katba ha ka 19 tarik Nailur 2019, kaba dei ka sngi pynkut ïa ka camp, na ka liang ka Department kala plie ïa ka ïa ka jaka na ka bynta ban pynlang um ha ka jingïadon lang u Rangbah Shnong, ki dkhot ka Dorbar, ki nongshong shnong ki staff bad ki samla pule jong ka AHS Department, MLCU.