Press "Enter" to skip to content

Sdang ka thma ktien hapdeng kiba pyrshah bad kyrshan karkhana saiñ dewiong beaiñ ha Shallang

Nongstoiñ, Nailur 20: Hadien ka jingmih jong ka JAC ki nongkyrshan karkhana saiñ dewiong ha Shallang kiba la pynpaw ruh ha ki kot khubor, ka Synjuk ki Nongsynshar Shnong Ri Lyngngam Umdang Area lem bad ki Sengbhalang bapher bapher jong ka District kum ka HYC, WKSU, HNYF, KSU, FKJGP, HANM bad kiwei kiwei ki Sengbhalang kiba pyrshah ïa ka jingpynieng beaiñ ïa ki karkhana Saiñ dewiong (Coke Factory) ha Shallang bad ha kiwei ki jaka ba marjan, ki la pynrem ïa ka jingbalia siang sdieh lyngba ka kynhun JAC ki nongkhaïi dewiong ka thaiñ Shallang, kumba la paw ha ki kot khubor.
Ka kyrwoh na ki nongïalam ka Synjuk ka ong ba kitei ki karkhana beaiñ ki ieng khlem jingïoh jingbit na ki bor synshar bad khamtam na ki paidbah nongshong shnong.
“Ka jingdon kitei ki karkhana ka dei beit ka jingiuhroit bad ka jingtim ïa ki paidbah. Ki paidbah nongshong shnong ki hap ban kit da la ka met la ka long ïa ka jingtim ka ban wan ha ki. Ka jingieng kitei ki karkhana ka dei beit tang ka jingjot ïa ka dong ka thaiñ mynta bad hadien habud”, ong ka kyrwoh ba la phah da u Bah K.Rashir Chairman bad Bah R.Ryntong Secretary.
“Ka Synjuk ka don ban ong ruh ba lada kitei ki karkhana la pynieng da ka jingleh bor bad ïaid lait na ki paidbah, kan eh aiu ban pynbiej ba kim don jingktah. Hynrei ha lyndet pat ka jingthmu ka long beit tang ban kamai saph. Lada kitei ki karkhana ki wanrah jingmyntoi kumta kumba kynthoh ka JAC kyrshan karkhana saiñ dewiong beaiñ, ngi kwah ban buh jingkylli nangno la wanrah bad kit ïa uta u dewiong, ki jongno bad la wanrah na ei. Hato jong u paidbah, hato na ka thaiñ Shallang??. Ka jubab ka long EM, namar nawei la wanrah bad marwei la wanrah”.
Shuh shuh, “Ïa kano kano ka karkhana ne kaei kaei kaba wanrah jingsniew bad buh jingma ïa ka koit ka khiah, ka ïap ka im ki paidbah, ngim lah ban pdiang, namar ha ngi ka jingkoit jingkhiah bad ka jingim ba palei ba shisur shi dur ka dei ka Spah. Ngi kren da kaba shai ba ngim lah ban ïa peiñ ïa ka jingim bad ka myntoi shimet jongno jongno. Ngi la ïoh ïa ka mariang ba itynnad bad ngi kwah ruh ban ïada ïa ka na ka bynta ka lawei ki pateng ban wan”.
“Lada phi pynbna ba kam don jingktah, ngi kwah ruh ba phin ai ka kular ba skhem ba lada don phin shim jingkitkhlieh ba pura ba ka tdem kan ym sniew bad ki briew kin ym pang lymne ïap. Lada ka sniew yn pynkhuid, lada pang yn pynkhiah bad lada ïap ruh yn pynim. Lada long haduh katta, te ngi ruh ngi don jingshaniah”.
“Kyntang ïa wai, ka Synjuk ki Nongsynshar Shnong bad ki Sengbhalang, ngi kyntu ïa ka tnad Pollution Control Board jong ka Jylla, ka tnad peit khlaw (Forest) bad ka KHADC, ba kin sngewbha ban ym ai jingbit klumar khlem da sngap ïa ka sur jong ki paidbah, ki ban hap ban shong bad bam ïa ka tdem kaba mih na ki karkhana. Ka Synjuk ka kyrpad ruh na kitei ki tnad sorkar ban pyndonkam ïa la ka atiar, ym ban long tang ki Syrngiew nongai jingbit khlem da tih tynrai”.
“Ka Synjuk ka kyrpad ruh kyrpang ïa ka District Council, kaba long kum ka Stieh ïada ba la buh kyrpang na ka bynta ka Jaidbynriew, ba kan da thie da tai sani bha da kaba buh shakhmat ïa ka saiñ pyrkhat kyrpang na ka bynta ka Jaidbynriew, ym ban noh shilliang ïa ka tara jur, khnang ban ym wan rah ka jingbabe ïa ki pateng ki ban bud”.