Press "Enter" to skip to content

Shah ujor sa u Dy CEM ba rim sha ka Lokayukta ba bamsap 3 klur

Shillong, Nailur 20 : Ki nongtih RTI na ri lum Garo ki la ujor sa ïa u Deputy Chief Executive Member (Dy.CEM) ba rim jongka Garo Hills Autonomous District Council (GHADC) u Augustine Marak uba dei u MDC na ka Silkigre Constituency, South Garo Hills hadien ba la lap ba ka don ka jingpyndonkam bakla ïa ka pisa kaba 3 klur tyngka kaba dei na ka bynta ki skhim pynroi pynpar.
Kine ki arngut ki nongtih RTI ki long u Wilnath T Sangma bad u Nilberthy Ch Marak bad ki la ai ïa kane ka jingujor sha ka Lokayukta mynta hi ka sngi.
Ha kane ka jingtih RTI la lap ba ïa ka pisa ba 2,62,28,150 klur tyngka la dep sei hynrei ïa ki dak treikam jong katei ka skhim pat ym shym la don ei ei ruh em.
Kane ka pisa ka dei kaba la ai jingïarap kyrpang Special Assistance Scheme da ka sorkar pdeng sha ki District Council bad ka GHADC ka ïoh 107.71 klur. ïa kane ka skhim la mang na ka bynta ki project pynroi pynpar ban pyntreikam da ki MDC, EM, Dy CEM, CEM bad Chairman jong ki Council sha ki constituency jongki.
Hynrei kumba ka long pat ha ri lum Garo ïa katei ka pisa la shu ïasei na ka Council khlem da pyntreikam pat ïa ki project da ki katto katne ki MDC. Ha ka jingujor sha ka Lokayukta, kine ki 2 ngut ki nongtih RTI ki la pynpaw ba une u MDC u la pynkhreh 50 tylli ki project na katei ka skhim bad ïa kine ki project la aiti sha ki 9 ngut ki kontraktor kiba dei ki briew jongu hi. Lajan ïa baroh kine ki project la dep pyllait pisa beit 100 % katba ka kam pat ym shym la trei ne sdang.
Kawei na ki project ba la dep sei lut ïa ka pisa ka dei ka jingtei ia ka Shopping Complex ha Karukol kaba shongdor 95 lak tyngka hynrei ka pisa la dep sei katba ka kam ym pat paw dak. Nalor kata kawei ka community hall ruh kaba ha Bibragre kaba 9.50 lak tyngka , ka jingshna ïa ka nala ha ka shnong Alokpang kaba 47,50,000 la ai sha uwei u kontraktor. ïa kine ruh la ïathuh ba ka pisa la dep sei katba ka kam pat ym pat sdang satia.
Ha katei ka jingujor la jer kyteng ruh ïa ki kontraktor bad arngut ki nongtrei jongka GHADC kiba la kynnoh donkti lang.
Kitei ki arngut ki nongtrei jongka GHADC ki dei u Sectional Officer bad u Superintendent Enginner Civil Work jongka GHADC. U Augustine u dei u MDC jongka GNC bad u dei ruh uwei na ki nongïalam seng bhalang ba ïakhih na ka bynta kata ka jylla Garo.