Press "Enter" to skip to content

Shano jah ka jubab halor ka jingtohkit tuid um jaboh ha Elephant Falls

Shillong: Ha ka 8 tarik mynta u bnai, ka um ha Kshaid Elephant Falls, Upper Shillong, ka la dap da ka um jaboh, ha kaba ka la kylla rong stem kum ka um eit. Kane ka jingtuid um jaboh, ka la pynlong ïa u Myntri ka tnad pynroi Sor bad u MLA ka Mylliem u Bah Hamlet Dohling, ban hiar jurip sha katei ka Kshaid kaba khring da ki spah ngut ki nongshang pyrthei ha ka shi sngi shi sngi.
Hadien ka jinghiar jurip u Myntri, na ka liang ka DC ha ka 10 tarik pat ka la phah sa ka jingtohkit kaba khambniah bad ïa kane ka jingtohkit, la ïalam da u Bah PT Passah, Magistrate uba long ruh u BDO jong ka Mylliem C&RD Block.
Ha katei ka sngi, ki ophisar kiba leit ki kynthup naduh na ka tnad Tourism, Meghalaya State Pollution Control Board, PWD, Forest, Water Resources, na ka tnad Pulit kumjuh na ka San Shnong Youth Welfare Organisation, ka kynhun kaba pynïaid ïa katei ka jaka jngohkai pyrthei.
Na ka liang u Magistrate, Bah PT Passah ryngkat u Bah James Lamurong, Engineer na ka Meghalaya State Pollution Control Board, Bah ML Lawai EE Water Resources, Bah S Nongkynrih Tourism Officer, M Lyngdoh AEE PWD kumjuh u Bah EB Kyndiah DySP Crime bad kiwei kiwei ryngkat ki heh shipai ki la leit ban jurip sawdong katei ka len shipai.
Ki jaka kiba ka kynhun ka leit ban jurip ki kynthup naduh ki jaka ba pyntuid ïa ki um jakhlia ba mih na ki ïingsah, ka skul, ki jaka ai jingsumar, ki jaka treikam, ki jaka bam, ki jaka ba tei ïa ki septic tank bad wat ïa ki paiñkhana jong ki shipai bad jong ki nongbylla kiba don ha katei ka jaka. Haman ki jaka ba ka kynhun ka leit ban jurip ka shim ruh khyndiat ka um ban test kynthup na ki wah kiba ïaid lyngba jong katei ka len shipai bad tuid pat sha Elephant Falls.
Ha ka jingjurip kaba la neh bun kynta bha, ka kynhun ka la leit ruh ban peit ïa wahrit kaba tuid lyngba ka jaka jong ka Veterinary bad poi pat sha jaka jong ki shipai. Hadien ba la dep ka jingjurip ïa ki jaka jong ki shipai ka kynhun ka la leit run ban jurip lang ïa ki jaka jong ka tnad Veterinary kaba don ha syndah hangtei hi.
Kane ka kynhun ka la leit jurip ïa ki jaka jong ki shipai bad ruh jong ka Veterinary halor ki jingjia ha kine ki khyndiat sngi ba ka kshaid Elephant Falls ka la stem hi kmur da ki jaboh jabaiñ kiba wan tuid na ki bynta ba shaneng jong ka wah.
Ha kitei ki sngi ba katei ka kshaid ka kylla rong, na ka liang ka Pollution Control Board ka la dep ruh shim ïa ka um na katei ka kshaid na ka bynta ban test.
Hynrei shiphew sngi ki la ïaid ki paidbah ki sah ha ka lyngngoh mano ba donkti ha kane ka jingpyntuid u m jaboh ha katei ka Kshaid. “Ngi kwah ban tip mano ba donkti ne ha kano ka dur ka um ka la kylla rong ha kane ka jaka jngohkai ba pawnam”, la on gong uwei u rangbah bym kwah ban pynpw kyrteng, uba la buddien bha ïa kane ka jingjia.
Une u rangbah, u la ïathuh ba naduh mynshuwa ki la ju don ki jingtohkit kiba kum kine haba don ka jingtuid um jaboh ha kane ka Kshaid, hynrei ym ju ïoh jingtip pat mano ba donkti, namar ka sorkar kam ju pyntip ïa ka jinglap ka jingtohkit.
Katto katne ki samla sumar mariang (environmentalists) ki la ong ba ka pyrthei mynta ka ïabeh ïa ka jingkhuid bad ka sorkar ruh ka buh da ka kuna kaba heh ïa ki briew kiba pynjaboh ïa ki surok, ki lynti ki syngkien bad ïa ka mariang. “Kan don jingmut aïu ban tohkit bad ym lah pat ban pyntip mano ba donkti. Hato yn pynpaw paidbah tang haba ngat ki rit ki ria”, la ong uwei na ki dkhot kane ka kynhun.
Kine ki samla ki la pynpaw ba lada ka sorkar kam pyntip paidbah mano ba donkti ha kaba pyntuid um jaboh, kan long kum ka jingpynshlur ruh ïa kiwei ban leh kumjuh, namar ba kam don kano kano ka jingpynshitom ïa kiba donkti.