Press "Enter" to skip to content

Thmu ka Sorkar ban khot ïa ka ‘All party Meeting’ ban ïakren halor ka MRSSA

Shillong, Nailur 20: Ka Sorkar Meghalaya Democratic Alliance (MDA) ka don jingthmu ban sa khot noh shen ïa ka jingïalang jong baroh ki seng saiñ pyrthei ka Jylla (All Political Party meeting) ban pan ïa ki jingai jingmut bad jingpynsngew halor ki jingtyrwa ba ïadei bad ka jingthmu pynkylla thymmai ïa ka Meghalaya Residents Safety and Security Act, 2016, ka ban tehlakam ïa ka jingrung kyrthep ki bar jylla bad mynder ri hapoh ka Jylla.
Haba pyntip ïa kane, u Symbud Myntri Rangbah ka Jylla Bah Prestone Tynsong ula ong ba bun na ki kynhun sengbhalang kila dep ai ïa ki jingai jingmut jong ki sha ka Sorkar Jylla bad ban pynlong ïa ka jingïasyllok bad ki, kam da idonkam shuh.
“Namar kata, ngin sa pynlong ïa ka jingïasyllok bad baroh ki seng saiñ pyrthei kynthup ruh ïa baroh ki MLA ba kin ïa ai jing mut lang halor kane ka kam” ula ong haba pyntip ba hadien bala pyndep ïa kane, ka Sorkar kala wanrah ïa ka Amendment Bill hapoh ka Cabinet ba kan ai ka jingmynjur. U ong ba ka Sorkar ka lah ruh ban mynjur ïa kane ka Amendment ha ka dur jong ka Ordinance.
U Bah Prestone u ong ba ka jingbym pat lah pynlong ïa ka jingïasyllok bad baroh ki kynhun ka dei kawei na ki daw ba ka Sorkar Jylla kala rai ban nym pat wanrah ïa ka Amendment Bill jong ka MRSSA 2016 ha ka Dorbar Synrai ba dang shu dep jong ka Iingdorbar Thaw Aiñ ka Jylla.
“Ngim kwah ba ïa ka Amendment Bill yn hap ban phah sha ka Select Committee. Lada phah sha ka Select Committee, ïa kane ka Bill yn hap ban wanrah biang ha ka Iingdorbar ha u snem ban wan” ula ong.
Lah ban kdew ba ki kynhun Sengbhalang hapoh ka shatei jong ka Confederation of Meghalaya Socïal Organizations (CoMSO) kala ai jingmut ïa ka jingdonkam ban pynrung lang ïa ki kyndon jong ka Inner Line Permit (ILP) ha ka jingthmu pynkylla thymmai ïa ka MRSSA-ka ban khang ïa ka jingrung kyrthep ki bar jylla bad ki mynder ri hapoh ka Jylla.
Ka Khasi Students’ Union, ka FKJGP bad kiwei kiwei ki kynhun kiba dawa pyntreikam ïa ki lad pyrrkhing ïa ki mynder, kila dep ïakynduh ïa ka Sorkar Jylla halor kane ka kam.
Haba kylli, u Bah Prestone ula ong ba ki kynhun Sengbhalang bapher bapher kila pynsngew ïa kijuh ki jingsngew ba ka Amendment ka dei ban ïasyriem kum ka ILP.
“Ka Sorkar Jylla ruh kala mynjur ban pynrung ïa ki kyndonjong ka ILP ha ka amendment jong ka MRSSA, 2016 ban pyn thikna ïa ka jingshngaiñ jong kaJylla bad ki nongshongshnong jong ka” ula pyntip haba ieng skhem ba ka Amendment kam mut eh tang ka jingpyrrkhing jong ka Sorkar hynrei ka Sorkar ka kwah ruh ba ki Khlieh Nongsynshar kin iadon bynta lang ha ka Act da kaba pynthikna ba ka Aiñ kan treikam haduh ki shnong ki thaw.