Press "Enter" to skip to content

Ha ka By-Election Shella, lah ban mih bun ngut ki kyrtong

Shillong, Nailur 21 : Ka elekshon na ka bynta ban jied ïa u MLA ba thymmai ka Shella Constituency kan long ha ka 21 tarik u Risaw mynta ka snem. Ka jingïañiew vote pat kan long ha ka 24 tarik.
Ka jingthep kyrteng kan sdang naduh ka 23 tarik mynta u bnai, kaba dei artad ka sngi ban pynbna paidbah. Ka tarik ba khatduh ban thep kyrteng kadei 30 tarik. Ka jingpeit bniah ïa ki kyrteng kan long ha ka 1 tarik u Risaw bad ka tarik ba khatduh ban weng kyrteng kadei 3 tarik.
Ka elekshon ha Shella ba la pynbna da ka Election Commission jong ka ri India la hap ban pynlong namar ka jingkhlad noh u Dr. Donkupar Roy, uba la mihkhmat na kane ka Constituency naduh u snem 1988. Kumta kane ka elekshon kan pynmih ïa u MLA ba thymmai hadien 31 snem.
Katkum ki khubor ba la ïoh la sngewthuh ba kin don bun ngut ki kyrtong ban ïamih ïakhun ha kane ka elekshon. Ka UDP kaba la long trai ïa kane ka Constituency la bun bun snem, ka la rai ban pynïeng ïa u khun jong u Dr. Donkupar Roy, u Balajied Kupar Synrem. Ka PDF kaba wan ba ar ha ka elekshon ba ladep, kam pat rai ïano yn pynïakhun. Ka Congress kaba la ju long borabor ka nongïakhun ba ïajan bad ka UDP naduh ki snem baladep, kan hap jied napdeng ki 3 ngut ki kba kwah ban ïakhun.
Kine ki long u Bah Wilfred Khyllep, Retd IAS, Kong Grace Mary Kharpuri, MDC bad u Bah Bantyngshaiñ Rnga, uba long u kyrtong jong ka Seng ha ka elekshon MLA 2018. Ka BJP ruh kaba la pynrung dkhot bha ha kylleng kan ïakhun ha kane ka elekshon, namar ba ka vote ki bar jylla ka bun bha ha Shella bad ha ka elekshon MP ba dang shu dep, ka BJP ka la lehbha na Shella. Ka NPP lada ka sngap ïa ka sur ki trai shnong na Shella, ka lah ban pynïeng kyrtong wat lada kadei ka paralok ba jan eh jong ka UDP ha ka sorkar MDA.
Nalor kine kin don ruh ki kyrtong shimet ne ki Independent Candidate bad uwei na kine la sngewthuh un dei u Bah Komen Laitmon, uba dei u President jong ka HSPDP Shella, uba la mut ban mih ïakhun ha u 2018. Hynrei namar ba la don noh ka jingïatreilang hapdeng ka UDP bad HSPDP shuwa ka elekshon, u Bah Komen u la sangeh noh bad kyrshan ïa u Dr. Donkupar. Mynta la sngewthuh ba u lah ban mih ïakhun hadien ka jingpynbor kiba bun ki paidbah, khamtam ki samla bad ki longkmie.
Ka ECI, kala pynbna ïa kane ka tarik elekshon ryngkat bad ka elekshon ha ki artylli ki jylla jong ka ri India, ka Maharashtra bad ka Haryana. Ka Shella ka kynthup lang ha ki 63 tylli ki Assembly Constituency kiba don ha ki 17 tylli ki jylla jong ka ri India.
Kane kan dei ka sien kaba nyngkon ba ka Seng BJP kaba bat ïa ka bor synshar ne ïa u Narendra Modi bad u Amit Shah ba kin ïalam ïa ka Seng ha ka elekshon hadien ka jingjop kput ha ka elekshon Lok Sabha mynta ka snem.