Press "Enter" to skip to content

Ka Durga Mandir Nartiang

Lajan biang ka leh niam leh rukom kaba heh duh ha Durga Mandir, Nartiang ki riewngeit bad ka Kur Deshmukh kiba dei peit ïa kane ka kam leh niam leh rukom ki i suk i saiñ bad ki bun kam ha ka jingpynkhreh ïa ka sngi khraw jong ka Blei Durga ka la nang ïaid shaphrang. Kum ban shu pynkynmaw ha ka snem ba la lah (15.10.2018) shwa ka jingleh niam ïa ka Blei Durga ha katei ka Mandir ka la don ka jingthut na ka daw bym ïa hap jingmut ban shimti ïa ka kam Pandit da u briew ba la wanlam nabar ka shnong Nartiang. Une u Pandit u kyrteng u Swappon Bhattcharjee, u nonghikai skul ha Bholaganj East Khasi Hills. Kane ka jingwanlam ïa u Pandit Bhattacharjee ka la jia hadien ba la khlad noh u Uttom Deshmukhya (30 Lber 2017) bad u Moloy Deshrnukhya (19, Kyllalyngkot 2018).
Kumta ka la mih ka huri hura hapdeng ki arliang kawei kaba kwah ïa u Oni Deshmukh bad kawei pat ïa ka liang u Pandit Bhattacharjee. Khlem lah mut dur ïa ka jaka ba shait leh niam leh rukom ïa ka Blei Durga ka la kylla long pynban ka jingïashun bad ka jingbym ïa dei lok shuh hapdeng ki riewngeit arliang haduh ba ki la ïa kynrup, ïa shoh ïadat. Ki pulit bad bor synshar District ki la ïoh jingtip bad la kloi ban poi sha katei ka jaka bad la lah ban pynjem ïa ka jingïakhih jong kitei ki arliang. Ha kane ka jingkulmar mynsaw 19 ngut ki pulit bad 22 ngut ki paitbah. La tip ruh ba ïa ka jingkhang Mandir la khang 2 tylli ki tala da kitei ki arliang ki riewngeit kiba la ïa pait na ka daw bym ïahap jingmut ban thung pandit ne bamon kum ba shait ong ki pnar. Katei ka jingjia ba sngewsih ka la pynthut ha ka leh niam leh rukom jong ki riewngeit hindu haduh ba ka jingmudui ka la poi sha ïingkashari Heh. Ka Meghalaya High Court da ka jingtohkit bad bishar bniah ïa kita ki j ingdawa ba la wanrah sha ïing bishar bahalor (HC) ban bishar bad ha kata ka kot (appeal) la soi da ki 900 ngut ki trai shnong hindu na Nartiang ba ki ïa mon beit ïa u Oni Deshmukh (18) uba la hiar pateng (30th generation) na ka kur Deshmukh ba la wan ïalam da u Syiem Jaiñtiapur naduh ki por hyndai hynthai (Centuries ago). U Justice SR Sen u la hukum ba ka leh niamleh rukom ha katei ka Durga Mandir ka dei ban bteng biang khlem don jingthut kum ba la ïa mon ki trai shnong Nartiang bad ki reiwngeit hindu ban pynlong pandit beit da u Oni Deshmukh uba hiar pateng na ka jait Deshmukh.
Ka jingkylli ruh ka la mih na ki riewngeit (niam tre) kumno ba u Pandit na shabar shnong Nartiang un tip ïa ka kñia ka khriam jong ka niam tre jong ki pnar bad ïa ka niam hindu jong ka Nartiang. Kum ban shu ong noh, ka leh niam puja ha Nartiang ka ïapher bak ly bak na ka rukom leh niam puja kiba shabar Nartiang. Namar ka Niam tre jong ki Pnar ka ïa snoh lang bad katei ka leh niam leh rukom ki Hindu ha Nartiang. Ki Pnar Niam tre Nartiang ki long ruh ki riewngeit Hindu jong katei ka Blei Durga Mandir kiba ki Syiem Jaiñtia ki la sdang ïa ka naduh 500 snem mynshuwa. Ïa u blang ba ki pom ki da pyndeng da ka mask ne ka jingtap khmat ha ka dur briew kaba mut ha ki por ki Syiem Jaiñtia mynhyndai hynthai ki kñia da u briew u ba wan aiti hi da lade ïa la ka jingim. Ïa kane ka rukom kñia briew la pynsangeh noh ynda la wan synshar ki dohlieh (East India Company 151h March 1835) Ka Blei Durga jong ki riewngeit Nartiang kam dei kum ki blei thaw kiba ngi shait ïohi kylleng ka Ri, hynrei ka dei ba la shna da ka dieng lakait. Ha khlieh ka lakait ki tah syndur saw ki sieh da ki syntiew bun rong na khmat, bad ai rong saw ïa ka shyntur ki pynphong jaiñ sari lieh ba thoh da u border saw bad tap na jrong da ka jaiñ lieh, ki da pyndeng syngwiang syntiew ïa ka da uba itynnad bha. Ïa ka sari la weng noh shuwa ban pynngop ïa ka Blei ha wah. Shwa ban leit on ïa ka Blei sha wah ki da ïa shad mastieh ïa tem ïa rwai ïa tem ksing bad shakuriaw ha phyllaw Mandir ki da ïa siat da ki Suloi sha suiñ, sa bud ka ïaid proseshon. U Pandit u bah ïa ka Blei ha la ki tyrpeng haduh ynda la poi ban pynngop ïa ka ha ka wah Myntang ka Iynti ka bym da jngai na Durga Mandir. la ka sari ba pynphong ïa ka Blei la weng noh ha shuwa ban pynngop ïa ka ha wah.
U Syiem Dhan Manik jong ka hima Jaiñtiapur (Mynta ka hap ha Bangladesh) ynda u la sah katto katne snem ha kane ka jaka na ka daw ka jingshit palat u la kwah ban pynkynriah noh ïa ka Nongbah Lyiur sha wei pat. Ha ka jingïaid jong u na kawei ka jaka sha kawei pat, namar ba u kwah pynïar pynheh ïa ka hima la jong u la lap ba ka shnong Nartiang ka long kaba pyngngad bha bad ïohi ba bun ki hali bajyrngam ki um ki wah ki khlaw ki btap u la ïap bieij shuh shuh. Te kumta u la pynlong ïa ka Shnong Nartiang ka Nongbah Lyiur (Summer Capital) jong ka Hima Jaiñtiapur kumba 500 snem mynshuwa. Ban suk ka Ieit ka wan jong u ha ka por lyiur na Jaiñtiapur sha Nartiang u la thaw ka ïing sah (Palace) jong u ha Nartiang, ban dup ïoh shong thait bad ban pyntrei kam pynheh ïa ka shnong bad Elaka jong u. Ïa ki dak ki shin jong ka ïing Syiem kum ki jingker kynroh (Fort) ka gate (Tok) dang lah ban ïohi ha Nartiang haduh mynta. Katba nangïaid ki por ka Hima Lyiur Nartiang ka nangkhlaiñ nangïar bad ban kham pynïajan, pynïadei jingmut, ïa ki raïot namar ba une u Syiem u la long Hindu lypa u la thaw ïa ka Durga Mandir ha ka jaka ïing Syiem (Palace) ha kata ka por ka dang long kaba rit ba thaw da ki dieng sning (teak wood) bad tap da u phlang. Ki Pnar kiba bud ïa kane ka niam jong u kim da tip bha ïa ka leh niam leh rukom hindu bad kim don uta u pandit ban leh niam leh rukom. U Syiem Dhan Manik u la wan lam ïa u Pandit ne Bamon na Jaiñtiapur, U ne u Pandit u dei na ka jait Deshmukh. Bad kane ka jait Deshmukh ka la neh syndon ha Nartiang bad ki la poi kha poi man bad ki Pnar. Naduh kata ka por haduh kine ki sngi ki Pandit ba leh niam leh rukom ha katei ka Durga Mandir Nartiang, ki dei ki ba la hiar pateng na katei ka jait Deshmukh. Ka Hima jong ki Syiem Jaiñtiapur ka long kaba heh bha ka sdang naduh Jaiñtiapur (mynta ha Bangladesh) ter ter sha Khanduli, Karbi, Nagoan, Kamakhya bad sha kiwei kiwei ki jaka kiba ym lah kynmaw shuh. Ka Hima Jaiñtiapur barim jong ki Syiem Jaiñtia ka kham heh ban ïa ka Jylla Meghalaya baroh kawei. Ïa kane ka bynta yn sa bteng pat.
La noh synñiang bad u Michael Shylla uba long u Director barim jong ka Ministry of Information & Broadcasting, Photo Division New Delhi.