Press "Enter" to skip to content

Khlong biang ki pulit ïa ka met ba suba shah pynïap ha ka jingbeh ksuid

Shillong, Nailur 21 : Ki pulit ki la khlong biang ïa ka metiap jong u Sengra Marak, 32 snem ka rta ha ka 20 tarik mynta ubnai hadien ba la suba ba ka jingiap jongu ka dei namar ba la jur ka jingmynsaw na ka jingshah bom na kita ki briew kiba kam ki nongbeh ksuid namar ki kynnoh ba u shitom na ka jingpang khie ksuid.
Une u Marak u dei uba la shitom la kham slem bha bad u la khlad noh dang shen hadien ba ki trai shnong ki la tied la bom ïa u ha ka kyrteng ban beh ksuid namar ki kynnoh ba u pang khie ksuid. Kane ka jingjia ka la jia ha ka shnong Dobakkol kaba hap hapoh ka Bajengdoba Police Station, North Garo Hills haka 14 tarik mynta u bnai bad ha ka step kaba bud hi une u briew u la khlad noh na kane ka pyrthei.
La ïathuh ba une u briew u shitom na ka jingpang khie shoh bad namar ba jur ka jingshit lehse u la kren kulmar hynrei ki nongkyndong kiba dang ngeit biej ki kynnoh beit ba u pang khie ksuid kumta ha ka jaka ban ïalam ïa u sha hospital ki la sumar hi da ki rukom sumar tynrai ‘ojha’ da ki kynbat dawai ban beh ïa u ksuid.
Ha ka por ba sumar la pynthiah ïa u nongpang hapoh ka musari ban ïohi ba uta u mynsiem ksuid u mih katba dang sumar ïa u da kaba tied ba bom ïa ka met jongu. Wat la utei u nongpang u tlot bha hynrei ki bom ki tied beit ban beh ïa u ksuid. Nalor ka jingtlot sa ka jingmynsaw na katei ka jingtied jingbom, utei u briew u la khlad noh ha ka step Sngi U Blei 15 tarik.
Ki trai shnong pat ki kam beit ba une u briew u iap kumba ju iap hi ki para briew ym dei satia na katei ka jingshah bom haba beh ïa utei u ksuid na u. Hynrei haba ki pulit ki la ïohi ïa ki video bad ki dur jong u Sengra shwa ba un iap ki la suba ba kam dei ka jingiap pang hynrei kadei ka jingiap na ka jingmynsaw jur kumta ki la tohkit bad khlong biang ïa ka metiap.
Wat la ym don ba ujor ejahar na kiba haïing ne ka baieit jong u Sengra uba la dep ïa pynbeit bad ka ban ïathoh noh shen hynrei ki pulit ki la shim hi ïa ka jingtohkit da lade.
“Ki pulit ki la pyndep ïa ka post mortem ha ka jaka tep hi ïa u Sengra hadien ba la dep khlong ïa ka met jongu bad ki dang ap ïa ka kaiphod shwa ban ïaid shakhmat ïa kaei kaba dei ban leh”, pynpaw u SP jongka North Garo Hills u Billy Graham Marak.