Press "Enter" to skip to content

Ki jingsniew ka mobile ha kane ka juk mynta!

Hato ki khun samla jong phi ki pynbor ïaphi ban ai sngewbha sngi kha da ka Mobile Phone? Ne phi pyrkhat bad phi ai mobile ïa ki khun samla jong phi naka daw jong ka jingshngaiñ ban tip shano ki leit shano ki wan ne shano ki don? Lehse kane ka sngewbiang bha! Hynrei hato phi ju pyrkhat pat kaei ka ban jia na ki jingsniew kiba mih na ka daw jong ka Mobile Phone sha ki samla (teenagers) Lada ngim tip ka long kaba donkam ban ngin pyrkhat sani bha halor kiei ki jingeh kiba lah ban mih sha ki samla na ka daw jong ka jingkyrni palat jong ka jingpyndonkam ïa ki Mobile Phone.
Kat kum ka jingwad bniah la ong ba 78% na ki khynnah ba hapdeng ka rta 12 haduh 17 snem ki don ia ki Mobile Phone bad 1 na ki 4 ngut ki don ïa ka Internet Connection. Kumta ka long kaba donkam ban peit bniah ïa kiei kita ki jingmih kiba ktah ïa ka jingim jong ki samla na ka jingpyndonkam ia ki mobile phone.
Hooid kam don ka jingartatien bad ki mobile phone ki long ka tiar ba donkam eh ha ka imlang sahlang bad ha ka trei ka ktah, khamtam ban wanrah ia ka jingpynïasoh ha ka por kaba donkam. Hynrei kane ka jingstad teknoloji kam shu wan tang kumta hynrei ka don da kawei par ka dor kaba heh ba ki kmie ki kpa kin hap ban pyrkhat arsien bad ban tip ïa ka jingshisha.
Ki khynnah samla ha kine ki sngi ki kyrni haduh katta katta ha ka jingpyndonkam ïa ki mobile phone bad ngim lah ban len ïa ka jingshisha bad kane ka jingjia kala pynlong ia ki Meiieit-Paieit ban lyngngoh lyngngaiñ ïa kane ka juk mynta bad bun ki ong ba ka mobile ka la pynjot ïa ki samla kane ka juk mynta. Shisha ki khynnah samla ki pynlut shibun bah ka por ha kaba kren paralok bad ruh thoh sha ki paralok (texting) ha ka jaka ban leh ia ki kam kiba donkam ne khamtam eh ban pynlut por ha ka jingpule jong ki.
Ka jingiohlad ban pyndonkam ia ki Mobile Phone ka la pynlong ruh ïa ki khynnah ban pynjlan shuh ia ka por ialehkai jong ki ha ki por baroh nalor ka por kaba kila ïoh lupa ban ïalehkai ha ki Land Game ha ki Computer. Ka jingiohlad jong ki khynnah ban pynlut shibun ka por ha ki Game ba bun jait ka wanrah ïa ka jingkylla kaba khraw ha ka jingim jong ki bad ki don bun ki khynnah kiba la kyrni haduh katta katta ha kine ki jait jingialehkai haduh ba kim lah shuh ban im khlem kine ki Game. Ka jingkyrni ïa ki Game ha kine ki sngi ka long hi thik kum ka jingkyrni ha kiwei pat ki jingmlien ba sniew jong u drok bad kiwei pat ki kam kiba ktah ïa ka jingiaid beit jong ka rukom im jong ki.
Bun na ki khynnah kiba la ngop bad shah teh ha kitei ki jingialehkai Game ki kylla long domriang bha ka jingim jongki bad kim ju kwah ïano ïano ban pynthut ïa ka jingialehkai jongki. Ka jingkyrni ha ki jingialehkai Game ha kine ki sngi kam dei satia tang ia ki khynnah teenagers hynrei wat ki briew kiba la heh bad la rangbah ruh bun ki ngop ha ki jingteh mraw jong katei ka jait Game. Bun ki ieh noh wat ïa ki kam ki jam ruh bad ki pyndep tang kaei ka ban kyrshan ïa ka jingim jong ki, bad ki jied ban pynlut khambun ka por ha katei ka Games.
Wat ki khynnah skul ruh la sakhi da kiba bun ki kmie ki kpa bad ruh ki nonghikai ba ki la hiar shisha ha ka jingpule jongki na ka daw jong ka jingkyrni eh ha kitei ki Game. Ka jingma kaba khraw ka ap ïa ki khynnah kane ka pateng mynta na ka jingroi palat jong ki Mobile Phone. Kumba ka long mynta la ïohi ba ka Smart Phone ka pynlong tipsngi ïa kiba bun bah ki khynnah rit namar ba da ki ïam ne dakait katno katno ruh tang shu ïoh ia ka Mobile ki la shongkhop bad sngap jar, hynrei ka long pat ka jingriam kaba khraw namar ba katba ki nangsan ryngkat bad ka Mobile Phone khamtam kito kiba iohlad wat ban plie ïa ki Internet ruh ka kyllalong kumba injek da ka bih ha ka jingim jong ki.
Kumta ki nonghikai skul ha kine ki sngi ki kyrpad jur ia ki kmie kpa ba kin ym ai Mobile phone sha ki khun jong ki namar ba ka dei ka atiar kaba ïalam sha kiei kiei kiba ym lah ban iathuh lypa, hynrei kiba bun ki ki jot noh ka bor pyrkhat briew jong ki. Ki kam sniew baroh ki saphriang stet bha na ka jingiohlad ban pyndonkam ïaki smart phone da ki khynnah rit kiba dang hapoh ka rta. Kumta ka long ka jingmaham kaba khraw ïa ki kmie ki kpa bad kin long kiba stad ba ba kin ym mad ïa kiba bun ki jingeh bymlah ban batai lypa.