Press "Enter" to skip to content

“U Blei um ju buh jingkynmaw shuh ïa ki pop jong phi baroh ! ”

weekly column
“Ki Symboh ka jingim”

Ka dkhot Bible mynta ka sngi:
“Na ba ngan leh isynei ïa ki jingleh bymman jong ki, bad ïa ki pop jong ki ngam ym kynmaw shuh” HEBREW 8:12
Haba don kano kano ka jingbymiaid beit ne mih ki jingeh ha ka jingim, ka jingpyrkhat ba nyngkong jongphi, “ Ni, kane te ka la jia imat dei na ka bynta ki pop kiba nga la leh”? Haba phi mad ïa ki jingkhia ka jingim ne phi pang phi shitom, hato phi ju pyrkhat lyngngoh, “ Ka pop aiu kein kaba U Blei u pynshitom ïa nga kumne mynta?” Lada ka jubab jong phi ïa baroh kitei ki jingkylli ka long “hooid”, phim shym la long marwei satia. Kum kane ka jingpyrkhat ka jur bha wat ha ka balang namar ba bun ki bangeit kim ngeit da shisha ba ki don ha kata ka jutang kaba thymmai. Ki ngeit mar khongpong ïa katei ka dkhot Bible bad pyrkhat ba U Blei um long uba dap da ka jingsynei na ka bynta ki jingbakla jong ki bad u long barabor uba bat bad kynmaw sah ïa ki pop jong ki.
Ka jingeh bad ka balang khristan ha kine ki sngi ka long ka jingngeit bymdei. U Jisu hi dalade u la batai ïa ka jutang kaba thymmai na ka bynta jong ngi ha ka jingkharawai U Trai kaba khatduh ha kaba u la ong, “ Na ba kane ka long ka snam jong nga, kaba ka jong ka jutang bathymmai, ïa kaba yn sa pynmih noh na ka bynta kiba bun, ïa kaban map ïa ki pop” (Mathaios 26:28). Ka kyndon kaba kongsan jong kane ka jutang bathymmai ka dei ka jingmap ïa baroh ki pop jong phi namar jong kata ka snam kaba la pynmih ka jong u Jisu Khrist, ka jingmap jong phi kam dei kata kaba sdien halor kiei kita ki kam babha kiba phi la leh, haduh katno phi la lah ban ai jingiarap pisa sha ka balang na ka bynta ki kam leh isynei, ne kano ka kynrdan nongialam kaba phi bat. Em, hynrei baroh ka sdien ha kata ka snam ba la pynmih noh ka jong u Jisu.
U Blei, u la buh ïa ka mat ba kongsan jong ka Jutang bathymmai- Hebrews 8:12- kum ka kyndon kaba khatduh ban pyni sha ngi ba ka dei ka kyndon kaba khatduh kaba la pynlong ïa ka Jutang bathymmai ba kan trei kam ha ka jingim jong ngi. Lada phim ngeit ïa katei ka kyndon kaba khatduh bad kaba kongsam tam, phin ym lah satia ban mad ïa ka jingkyrkhu kaba pura jong ka Jutang bathymmai. Ha kajuh ka por phi pynlong ruh ia ka ktien U Blei ka bymlar kam bad kyntait ïa kata kaei kaba U Jisu u la dep ban pyndep halor ka diengphna. Ka jutang bathymmai ka long ba U Blei, u long uba dap da ka jingisynei ïa ki jingbymhok jongngi baroh bad u la kular ban klet noh ïa ki pop jong ngi baroh bad ki kam palat hukum jong ngi baroh. Lada U Blei u ong ba u la klet noh ïa ki baroh, ka mut u la klet shisha ia ki baroh, U Blei um lah ban lamler! Kumta ngi dei kiei pat ban pynkynmaw ia kaei kaba U Blei u ong u ka dep ban klet noh ia ki ?
Hynrei kumno U Blei un klet ia ki pop jong nga?
U Lah namar ba U Long U Blei! Lada u la ong ïa kata, ka mut u la leh ïa kata. Phi tip ba ki pop kiba phi la leh la bun bun snem mynshuwa? U Blei u la dep ban map noh ïa ki. Um ju bat jingkynmaw shuh ïa ki ne pyllang ïa ki bad baroh ki jingbakla jong phi. Kam don kum kata ka pyrda thia-tar kaba heh (projector screen) ha bneng ban thad paidbah ïa baroh ki pop ba phi la leh- naduh ka sngi ba la kha pat ïa phi haduh ka sngi ba phin khlad noh, baroh ki jingbuh kynmaw ïa ki pop jong phi la dep ban pynduh noh da ka snam jong U Jisu mynba u la pyrta halor ka diengphna “ La pyndep” (Ioanis 19:30). Haba U Blei u peit ïaphi mynta ha u Jisu Khrist, U ïohi ba latap ïa phi da ka snam ka jong U Jisu bad phi long kiba hok ha u Jisu Khrist.
Dei tang u soitan, maphi halade, bad ki briew kiba ker sawdong iaphi kiba kwah ban wanrah bad pynkynmaw pat ïa ki pop jong phi baroh. Kumta lada phi shah ban khia da ki jingbakla jong kiei kiei kiba la dep, phet sha U Blei bad shaniah ha ka jingaiei jong U ! Balei? Namar ba u long uba dap da ka jingisynei ïa ki jingbymhok jongphi baroh, bad ïa ki pop jong phi bad ïa ki jingpalat hukum jongphi. Um ym kynmaw shuh ïa ki lano lano ruh. Kane ka dei ka kyndon kaba kongsan tam jong ka jutang bathymmai jong ka JINGAIEI! Kane ka dei ka ktien jong U!
Ka jingpuson mynta ka sngi:
Lada U Blei u la pynbna bad u la dep ban map ia ki pop, nga dei uei ban ialeh pyrshah ïa U ?
Ka jingduwai mynta ka sngi
Ko Pa, nga ainguh ïa me na ka bynta ka jingpynpaw kaba phylla ba me la map lut ïa ki pop jong nga baroh bad ki jingpalat hukum jong nga, bad ba ïa baroh kita ki jingbuh jingthoh ïa ki pop jong nga la dep ban pynjot noh ïa ki baroh da ka snam jong U Jisu. Mynta ka sngi, nga jied ban ngeit ba namar jong kaei kaba U Jisu u la dep ban pyndep halor ka diengphna, Me ïohi ïa ka pura, da ka hok ka jong u Jisu tang ba u hi. Ïarap ïa nga barabor ban ïohi ia Me ba me dei U Blei jong ka jingieit bad jingisynei bajem uba me long da shisha, bad ïarap ïa nga ruh ba barabor ngan lah ban wan da ka jingshlur hakhmat ka khet jingisynei jong me ban pdiang ïa ka Jingisynei bad Jingaiei- AMEN
Bad u la ong ruh: bad ïa ki pop jong ki bad ia ki jingpalat jong ki ngam ym kynmaw shuh ( Hebrew 10:17)

“Nga, ma nga hi, nga long uta uba pyndam noh ïa ki jingryngkang jong me na ka bynta ïalade hi; bad ngan ym kynmaw ïa ki pop jong me” (Issiah 43:25)

Ka Article ban bud: Haduh katno U Blei u la dep ban map …..?