Press "Enter" to skip to content

Da ka ophis thymmai ba 141 klur yn tei ka KHADC ha Mawlai, yn kyrshan ka MHA

Shillong, Nailur 29 : Namar ka jingkhapngiah palat ka ophis treikam kaba mynta kaba don ha Garikhana, na ka liang ka Khasi Hills Autonomous District Council ka la pan jingïarap na ka Ministry of Home Affairs khnang ba kin ïoh ban tei noh da ka ophis kaba thymmai kaba la tyrwa ban pynieng ha Mawlai Mawroh.
Ïa katei ka jingtyrwa, ka Council lyngba u Deputy Chief Executive Member ba dei peit ïa ka tnad Finance, Bah Pynïaid Sing Syiem, la pynsngew ha u G Kishan Reddy, Myntri Khynnah ka tnad Home Affairs jong ka sorkar pdeng ha ka sngi Thohdieng ha nongbah Delhi.
Katkum katei ka jingtyrwa, ka Council ka la pan ïa ka jingkyrshan pisa kaba haduh kumba 141 klur tyngka ei ei na ka bynta katei ka ophis thymmai kaba la thmu ban tei lai mala (G+3) ha katei ka jaka ba thymmai.
Na ka liang u Bah Pynïaid u la ïathuh ba ha katei ka jingïakynduh ïa utei u Myntri Khynnah ki la pynpaw ruh ba ka ophis kaba don mynta nalor ba ka khapngiah, kawei pat ka jingeh ka long ba kam biang ka jaka pynieng kali khamtam haba ka jaka ba ka don ruh kadei ha pdeng jong ka nongbah.
“Ka jaka ba mynta ka don tang kumba ar akar hynrei ki don pat haduh kumba 800 ngut ki nongtrei kynthup ïa ki Executive Member, ki MDC, ki ophisar, ki Judge bad kiwei kiwei. Katei ka jingkhapngiah ka buh jingeh ruh haduh katta katta haba don ki paidbah kiba wan ban kynduh haduh ba ka la pynthut wat ïa ka rukom treikam ruh. Kumta la donkam kyrkieh ban pynkynriah noh ïa kitei ki lai tylli ki tnad treikam jong ka Council, kata naduh ka Executive, Legislative bad Judiciary sha ka jaka treikam kaba thymmai kaba kham kylluid kaba don ha Mawlai Mawroh
La pynpaw ruh ba ki kwah ba katei ka ophis thymmai kan don lut ïa ki jaka sah jong ki nongtrei, ka MDC Hostel, Guest House, Convention Centre nalor kiwei kiwei.
U la ong ruh ba na ka liang u Myntri Khynnah mardor hi u la shimkhia da kaba phah mardor ïa kitei ki kot ki sla ba u ai sha u Joint Secretary ka tnad MHA ba dei peit ïa ka thaiñ shatei lam-mihngi jong ka Ri. “Ka jingkynduh ïa u Myntri Khynnah ka long kaba sngewhun namar u la ai ka jingkular ba un shimkhia bad ban leh kloi halor katei ka jingtyrwa ba ka Council ka pan,” la ïathuh shuh shuh u Bah Pynïaid da kaba pynpaw ruh ka jingsngewnguh ïa ka sorkar NDA ba ïalam da u Narendra Modi kumjuh ïa u Myntri ka tnad Home Affairs ka sorkar jylla kiba shimkhia ïa katei ka jingud jong ka Council bad kynthup ïa u Myntri Rangbah kumjuh ïa u Symbud Myntri Rangbah kiba ju don bad kyrshan ïa ka Council ha kiba bun ki khep.