Press "Enter" to skip to content

Ban ïakhun pyrshah ïa u Drok : Pynlong ka Seng KSU da ka jingïaid paidbah ha Smit

Shillong, Nailur :Ka Khasi Student’s Union (KSU), Smit Unit ryngkat ka ka Smit Taxi owners/Driver Association ha ka jingïatrei lang bad ka Meghalaya Aids Control Society ka la pynlong ïa ka jingïaid paidbah ban pyrshah ïa u drok, bad ban pynshai paidbah ïa ki jingsniew ba mih na une u jait jingdih pynbuaid ba shyrkhei.
La sdang ïa ka jingïaid paidbah na Lumkynsai Presbyterian L.P School, Smit, da ka jingïashim bynta jong ki spah ngut ki khynnah skul kiba don ha Shnong Smit ryngkat bad ki dkhot ka K.S.U Smit Unit bad ki dkhot ka K.S.U Eastern Area Unit bad la pynkut ïa ka jingïaid paidbah ha Sawlad Smit, ha kaba ka la don ka jingbatai bniah halor ki jingsniew ki ba mih na une u jingdih pynbuaid.
Ha Sawlad Smit ryngkat ki khynnah skul bad ki dkhot ka KSU ki kmie ki kpa ruh ki la shim bynta lang ban sngap ïa ki jinghikai na ki riew shemphang.Ha kane ka jingïalang ba la pynïaid da u Samla Michael Lawai President ka KSU Eastern Area Unit, la ïoh ïa ka jingaihikai bad ka jingkren pdiang sngewbha na u Samla Kheinkor Kharryngi President ka KSU Nongkrem Circle bad Secretary ka KSU Eastern Area Unit ha ka jingïadon lang ki nongïalam ka KSU Central Body, u Samla Lambok Marngar President, Samla Vincent Makri Executive Member bad Samla Raymon Kharjana, Environment Secretary ki ba dei ruh ki Incharge ka KSU Eastern Central Area Unit, ki nongmih khmat na ka Meghalaya Aids Control Society Bah Alexander Kharkongor, Assistant Director, Dr. Lyngdoh, Deputy Director, Sexual Transmitted Infectious Disease, Sordar ka Shnong Smit Pyllun Bah Marbat Kharbangar, Superintendent of Police Shillong City, Bah Stephan Rynjah, B.D.O ka Mawryngkneng C & R.D Block, Bah Ronnie Wahlang bad kiwei kiwei.
U BDO Bah Ronnie Wahlang ha ka jingkren jongu u la ong ba ka jaidbynriew jong ngi ka la shah lynshop ha kane ka jingsniew namar ka jinglyngkar ka shongkha shongman ka ba pynmih ïa ki ïing ki sem kiba synjor bad ki khun ki kti ki ba laitlan. Ula ong ba ka jingbeh than ki kmie ki kpa ïa ka spah pyrthei haduh ba kim don por shuh ïa la ki khun ki kti, ka pynlong ia ki khun ban ïoh lad ban mad ïa kum kine ki jait jingsniew. Ula ong ruh ban khanglad ïa u drok ba un ym shynshar ïa ka imlang sahlang jong ngi ki kmie ki kpa ki dei ban shim khia lang ym tang ki bor shong bor thaw bad ki bor sorkar.
Na ka liang u SP ka Shilong City u Bah Stephan Rynjah u la pynsngew ïa sha ki khynnah skul, ki khun samla, ki kmie ki kpa ïa ki jingsniew bapher bapher ki ba ki la shem ha kane ka jylla jong ngi kiba mih na ki briew ki ba la ngop ha kane ka jingdih, bad u kyntu jur ha katei ka sngi khamtam ïa ki khynnah skul bad ki samla ba kim dei ban mad da lei lei ruh ïa kine ki jait jingdih namar kan ïalam sha ka jingkyrni.Nalor kata u la kyntu ïa ki kmie ki kpa ba ki dei peit bha ïa ki jinglong jingman ki khun ki kti khang ban ïada ïa ki na kane ka jingsniew. U SP u la pynsngewthuh paidbah ruh halor ka NDPS Acts bad kyntu ïa ki nong synshar shnong ki seng bhalang bad ki paidbad ban ïatreilang ryngkat bad ki bor ka aiñ ban rat dyngkhong ïa kane ka jingsniew.
U Bah Alexander Kharkongor ha ka jingkren ula ban jur ba ka jingdih ïa ki drok ka ktah ïa ka jingmut jingpyrkhat jong u briew ha ka ba ki briew kim lah shuh ban don ïa ka bor pyrkhat ka ba biang bad pura.Ula ong ruh ba ka jingdih ïa kine ki jait dawai ka pynkyrni ruh ïa ki briew haduh ba kan ïalam ruh sha kiwei pat ki jait jingpang khamtam ka HIV AID namar ka jingsam lang ïa ki thyrnia bad ki para ba ïa dih lang.
Katba na ka liang u Samla Lambokstar Marngar, President KSU Sengkmie ha ka jingkren u la ong ba ki khynnah skul bad ki samla ki dei ban don ka thong ban poi sha kliar jong ka nam ban rah ïa ka burom ka jaid bynriew namar ba bunsien ka dei ka jingmut jingpyrkhat jong ngi kaba ïalam ïa ngi ban poi sha ki jingsniew.
Ula ong ba ki samla ki dei ban long ki nongmuna ïa ka pateng ka ban wan, namar lada ka jaidbynriew jong ngi ka la dap da ki samla kiba la ngop ha kane ka ahor jong kane ka ka jingsniew, kalong kaba eh ban ïakren ïa kiwei ki bynta ban kyntiew bad ïada ïa ka jaidbynriew. U la kyntu lang ïa baroh ban ïasnohkti ban tehlakam ïa ka imlang sahlang kaba thymmai na ka bynta ka lawei ki samla.
Na ka liang u Sordar ka Dorbar Shnong Smit Pyllun u la ong ba ka Dorbar Shnong Smit Pyllun ka la ïaleh ban khanglad ïa kane ki jingsniew bad u la ïathuh ruh ba ka Dorbar hi baroh kawei ka la khang ban die ïa ki kynja jingdih kiba sniew hapoh u pud u sam ka shnong. U la kyntu ruh ïa ka bor jong ka aiñ ban kham pyrkhing bad ban pynshitom da kaba kham tyngeh namar u ong kumba la ïohi ba bun na ki briew kiba die ïa utei u jait jingsdih (Drok) bunsien ki shah set along tang katto katne sngi. Nalor kata ula ong ruh ba na ka liang ka Shnong kan ai ïa ka jingtrei lang bad ka bor ka aiñ halor kane ka phang.
Ha kaba ïadei bad kane ka prokram na ka liang u samla Banjoplang Lyngdoh Mawlong, Presidet KSU Smit Unit, u la pynpaw ka jingsngewnguh ïa baroh kiba la kyrshan ban pynlong ïa kane ka program kaba shongdor, khamtam ïa ki khynnah skul kiba la shim ka rai ban ym ktah ïa kine ki jait jingsniew bad ban ïatreilang ban rat dyngkhong ïa ka.
Kane kalong katkum u kyrwoh lyngba u samla Banshainam Nengnong, General Secretary, KSU, Smit Unit.