Press "Enter" to skip to content

Plie u Myntri ka tnat Pule Puthi ïa ka Jubili Rupa jong ka Unitarian English School Nongtalang

24 Klur mang ban tei ïa ka Residential skul ha Umladkhur

Jowai, Risaw 04: U Myntri ka tnad Pule Puthi u Ma Lahkmen Rymbui ula ong “Ha u bnai Nohprah yn buh mawnongrim na ka bynta ban tei ïa ka residential skul ha ka shnong Umladkhr kaba la tip kum ka Eka lavya model residential ha ka jingmang pisa kaba T.24 crore.”
“Ka Nongtalang Higher Secondary School kan ïoh T 3.75 crore na ka bynta ban tei ïa ki kamra skul thymmai,” la ong u Ma Lahkmen Rymbui haba kren kum u kongsan ha ka plie pyrda ïa ka jubili rupa jong skul Unitarian English School Nongtalang.
Ïa kane ka skul kaba pynïaid daka Balang Unitarian la sdang naduh u snem 1995 bad mynta ka don haduh klas VIII.
U Ma Lahkmen haba kren shuh shuh ula ïathuh ba ka sorkar mynta ka la thaw ïa ka committee ban khmih biang ïa ki syllabus jong ki skul ha baroh kawei ka jylla. Ula ai jingmut ba yn hap ban pynlong skul 6 sngi ha ka shitaiew bad ha ka Sngi Saitjaiñ u khynnah ulah ban leh kano kano ka kam kaba u sngewtynnad bad ïa kane ruh yn ai mark.
U khynnah ulah ban leh kano kano ka kam wat la shabar jong ka syllabus, hynrei u nonghikai u hap ban ai marks bad u khynnah u hap ban buh jingthoh ïa ka kam kaba u leh bad ai ïa ka project report jong u. U Ma Rymbui ka kam jong u khynnah skul kadei kano kano kaba u lah ban ïoh jinghikai na ki kpa lane ban leit lang bad ki kmie ki kpa ha ka jingtrei jong ki.
Kane ka long na ka bynta ban hikai ïa ki khynnah ban sngewsarong ïa kano kano ka kam kaba ki trei bad ha kane ka dur u khynnah un sngewthuh ïa ka sap kaba kyrpang jong, ong u ma Rymbui.
Ula ïathuh ruh ba ka post matric scholarship jong ki khynnah ka don bun bynta, kaba duna eh T.15 hajar bad kaba heh duh T.35 hajar. Ka jingthmu kalong ba ki kmie ki kpa kin ym ïoh daw shuh ban pynpep skul ïa u khynnah bad ha ki snem ban wan ka sorkar ka la buh ka thong ai kot ei ïa ki khynnah skul naduh klas 1 haduh 10 bad ïa kine ki kot hadien bala kut u snem ki khynnah ki pynphai sha skul khnang ban ïoh pyndonkam kiwei pat ki khynnah..
Ha kaba ïadei bad ka National Education Policy, ka sorkar jylla ka pyrshah ïa ka jingtyrwa ka NEP halor ka bor jong ki SMC bad ka bor pyniaid ka skul. Ka sorkar Jylla ka ieng ha ka nongrm ba ka bor pynïaid iaki skul kan neh hi ha ki nongseng jong ki skul bad ka bor jong ka SMC kan long kum ki nongai buit bad nongpyniaid ïa ki kam ka skul.
U long biang ba ka sorkar jylla ka pyrshah ïa ka 3-language formula bad ula ong bay m dei ban pynbor ïa ki khynnah ki skul ban tep ïa kiwei pat ki jait ktien.
Kiwei kiwei kiba kren ki kynthup ïa u local MDC Holando Lamin, Dr S. Dhar dkhot jong ka Paresnts committee, Secretary Shnong D. Myrchiang.