Press "Enter" to skip to content

Ryngkat u DC pynlong ka NEICORD ïa ka jingkynduh ïa ki paidbah ha Kynrud

Shillong, Risaw 06 : Ka North East India Committee on Relief & Development (NEICORD) kaba dei ka seng kaba ju pyntrei ïa ka Integrated Tribal Development Project (ITDP) ha ki san tylli ki shnong jong ka thaiñ Kynrud ha West Khasi Hills District ka la pynlong ïa ka jingkynduh lang ïa ki paidbah ne ka Stakeholder Coordination Meeting ha Kynrud ha ka 3tarik u Risaw.
Ha kane ka sngi la don lang ruh u Deputy Commissioner ka West Khasi Hills District, Bah T Lyngwa, u Block Development Officer (BDO) ka Mairang Block Bah V.Swer, General Manager ka NABARD u S Rohila, District Development Manager (DDM) ka NABARD, West Khasi Hills District u U Bezbaruah, iLead District Manager West Khasi Hills Th. Tunglut, u Executive Director ka NEICORD u Guithuilung Daimei, ki Rangbah Shnong bad baroh ki nongrep jong ka ITDP.
Na ka liang u Kongsan haba kren ha kaei ka sngi u la ai mynsiem ïa ki nongrep ba ka kam rep ka dei kawei ka lad kamai kaba khraw ban kyntiew ïa ka ïoh ka kot bad ruh ba ka dei kawei na ki jait kam kaba ki dkhot jong ka ïing ki lah ban shim bynta baroh. Hadien ba la wai ka jingïalang la ïoh ruh ban leit peit ïa ka jaka rep jong i Bah N. Lyngkhoi ha ka shnong Nonglang.