Press "Enter" to skip to content

Bym ai Audit Report u Waheh Shnong, mudui ki paidbah ka Khliehtyrshi sha ka JHADC

Shillong, Risaw, 08: Ki paidbah nongshong shnong jong ka shnong Khliehtyrshi kaba hap hapoh ka Elaka Jowai jong ka West Jaiñtia Hills District ha u bnai Nailar mynta u snem ki la mudui sha u Chief Executive Member (CEM) ka Jaiñtia Hills Autonomous District Council (JHADC) u Ma Thombor Shiwat ban tuklar halor ka jingbym lah jong u Waheh Shnong ka Khliehtyrshi ban ai ïa ka Annual Audit Report kaba shi sien shi snem ha ki samoi treikam jong lai snem kynthih.
Ka samoi treikam ba lai snem jong ka Executive Committee jong u Waheh Shnong barim u Ma Kitbok Rymbai ka la kut ha ka 15 tarik, Nailur, 2019.
U Bah Wanbun Dkhar bad ki katto katne ki nongshong shnong jong ka shnong Khliehtyrshi ha ka jingïakren bad ki lad pathai khubor mynta ka sngi Baar ki la kynnoh ba ka Executive Committee jong u Waheh Shnong u Ma Kitbok Rymbai, kam shym la ai satia ïa ka Annual Audit Report wat haba ki ju khot pynlong ïa ka Dorbar shi sien shisnem.
Une u rangbah u la kam hadien ba ki paidbah nongshong shnong kim shym la ïoh ïa ka jubab kaba shai halor ka Annual Audit Report ki la mudui sha u Dolloi ka Elaka Jowai, u Ma Puramon Kynjing.
“Ha ka sngi ba u Dolloi u la pynlong ïa ka jingtohkit ïa ki dkhot jong ka Executive Committee ym shym don satia wat tang ki Auditors ha ka list ai jingpynithuh ïa ka Sanad Waheh Shnong jong u Dolloi sha ka District Council katkum ka Waheh Shnong Act, 2015,” la ong u Bah Wanbun.
“Hadien kine ki ujor, u Dolloi ka Elaka Jowai u la thmu pynban ban khot pynlong da ka Dorbar na ka bynta ban jied da u Waheh Shnong uba thymmai ha ka 13 tarik u bnai baladep, watla ka samoi treikam jong u Waheh Shnong uba rim kan kut ha ka 15 tarik, Nailar, 2019,” ong u Bah Wanbun bad bynrap, “kane ka dei ka jingïaid lait jong u Dolloi ïa ka aiñ JHAD (Establishment of Elaka and Village and Election, Appointment,. Powers, Functions and Jurisdiction of Dolloi/Sirdar and Waheh Shnong) Act, 2015, khlem da ïasyllok shwa bad ki bor synshar jong ka Jaiñtia Hills Autonomous District Council.”
“Ha ka dorbar kaba la long ha ka 13 tarik u bnai baladep, ki paidbah kiba la khmihlynti ban ïoh jingpynshai halor ka jingkheiñ jingdiah jong ka Dorbar Shnong, hynrei kaba phylla ha kane ka sngi ka long ba u Dolloi ha ka jaka ban ai pynshai halor ka jingtohkit ïa ki dkhot ka Executive Committee halor ka Annual Audit Report hynrei u la aiti pynban ha ka Executive Committee bathymmai ban leh ïa kaba donkam ïa kaba kum ki paidbah ngim mynjur,” ula ong.
“Ha kane ka jingïalang, u Dolloi u la pynbna ruh ban pynlong pat ïa ka jingjied ïa u Waheh Shnong ha ka 21 tarik mynta u bnai ha kaba ma ngi ki paidbah ngim pat ïoh jingshai eiei halor ka Annual Audit Report,” ong u Bah Wanbun bad bynrap, “katba ngim pat ïoh jingpynshai halor ka jingkheiñ jingdiah ngim ym shah hi ruh ba ka Executive Committee kan pynlong ïa ka Dorbar ban jied ïa u Waheh Shnong bathymmai.”
Na ka liang jong ki nongshong shnong ki la dawa ïa ka JHADC ba kan thung da ka jingtohkit kaba laitluid halor kane khnang ban pynpaw pyrthei lada don kano kano ka kam bamsap.
Haba kylli u Bah Wanbun u la ong, “kane ka jingdawa tohkit na ka JHADC ka dei namarba ngi suba ka don ka jingpyndonkam bakla ïa ka pisa namar ha ka dorbar kaba ju long shisien shi snem kim ju pynsngew satia ka jingkheiñ jingdiah jong ka shnong.”