Press "Enter" to skip to content

Hapoh 24 kynta ba shah weng, thung biang ïa u Faleiro kum u Secretary ban peit ïa ka NE

Paw pyrthei ki kynrum kynram hapoh ka AICC

Shillong, Risaw 8 : Ki dak ki shin jong ka jingkynrum kynram hapoh ka All India Congress Committee (AICC) ka la paw tyngkreiñ mynta namar tang hadien 24 kynta ba la weng ïa u Luizinho Faleiro kum u AICC Secretary ba dei peit ïa ka Tripura, mynta ka sngi la pynkylla biang ïa ka rai bad pynskhem biang ïa u kum u nongkhmih ïa ka Tripura bad kiwei kiwei ki jylla kane ka thaiñ shatei lam mihngi ka ri India kynthup ïa ka Meghalaya.
Ha ka jingpynkylla biang ïa ka rai ka President jongka AICC ka la pynmih ka hukum ba ïa u Gourav Gogoi la thung kum u Secretary ban peit ïa ka Sikkim bad Manipur nalor ka West Bengal bad A & N Island kaba u dei peit mynta.
“U Luizinho Faoleiro un dang bteng kum u General Secretary ban peit ïa ka Tripura bad kiwe kiwei kiwei ki jylla kane ka thaiñ” ong ka kyrwoh na u General Secretary ka AICC u KC Venugopal.
Ha ka jingshisha dang ha ka Sngi Lah U Blei ka AICC ka la thung ïa u Gogoi kum u Secretary ban peit ïa ka Tripura bad Manipur da kaba weng noh ïa u Faleiro. Kane ka jingweng ïa u Faleiro ka long halor ka nongrim jongka jinghiar shuki u President ka Tripura Padesh Congress Committee uba dei ruh u Syiem ka Tripura u Pradyot Kishore Deb Burman namar ka jingïapher jingmut bad u Faleiro.
U Pradyot u la ai ka jingujor shaduh ka President jong ka AICC ka Sonia Gandhi halor ki kynrum kynram jongka Congress da kaba u kynnoh ba ki nongïalam ka AICC kim ju sngewthuh ne shim khia ïa ka jingsngew jong ki paid kane ka thaiñ shatei lam mihngi ka ri India bad kane ka la ktah jur ïa ka Party hi ha kane ka thaiñ kaba dei kawei na ki thaiñ ba ka ju synshar ha ki por ba mynshwa.
U la kynnoh jur ba u Faleiro lem bad u Dr C.P Joshi kim ju wan sha ka jylla ban ïakren bad ïa phylliew jingmut bad ki nongïalam hynrei ki shong beit ha Delhi bad sngap ïa ka jingai jingmut jong kiwei kynthup ïa ki MLA ka BJP. U la kynnoh ba kane ka jingleh bym salia jong ki nongialam ka AICC ka la nang aibor ïa ka BJP bad ïoh ban bat wat ïa ka jingsynshar ruh.