Press "Enter" to skip to content

ïoh ka India da ki jet thma Rafale yn kham khlaiñ ïa ka Pakistan bad China

Bordeaux, Risaw 8: Ha ka sngi ba ka India ka rakhe ïa ka sngi ki shipai suiñ, u Myntri ïada ri, u Rajnath Singh, ha ka sngi ba ar, u la leit pdiang ïa ka Jet thma Rafale ha nongbah Bordeaux ha France.
U hehduh ki shipai suiñ, u Air Chief Marshal Rakesh Kumar Singh Bhadauria, u la ong ba ka jingïoh ka India ïa kine ki jet thma kan kham pynkhlaiñ ban ïa ki jet thma ka Pakistan bad China. “Lada ngi pyndonkam ïa ki ryngkat ki SU-30 bad kiwei kiwei de ki jet thma, kan kyntiew shibun ïa ka jingkhlaiñ kit air thma jong ka ri”, la ong u Air Chief Marshal.
U Singh, uba la leit jngoh ba lai sngi ïa ka France, u la pdiang ïa kane ka jet thma ha Dassault Aviation, kaba dei ka jaka shna liengsuiñ thma jong ka France. Ha kane ka jingshimti ïa ka Rafale, la pynlong ruh ïa ka jingle niam puja, kaba dei ka sngi ba ka ri India ka pynkut ïa ka jinglehniam Puje ki Hindu.
Ha shuwa jong kane, u Singh, u la ïakynduh ïa u President jong ka France, u Emmanuel Macron bad ïakren halor ka jingïadei bad ka jingïajan ba khambha shuh hapdeng kine ki artylli ki ri.
U Singh, u la ong ba kane kadei ka sngi ban sah kynmaw ïa ka ri, khamtam ïa ka Indian Air Force, ha kaba ki shipai suiñ ki la nang ïoh shuh shuh ïa ki tiar ïaleh ban ïada ïa ka ri. “Ym lah ban len ba kane kadei ka sngi ban sah kynmaw ïa ka ri baroh kawei”, u la ong.
Kane kadei ka Rafale jet ba nyngkong eh ba ka India kan ïoh, kaba long shi bynta na kiba bun tylli ki Jet ba ka thied ha ka dor Sanphew phra hajar klur tyngka. Kiwei pat ki jet yn ïoh ha u snem 2022.
Hadien baladep shimti ïa kane ka Jet, u Singh, u la shong ha kane ka jet kaba la pynher da u Pilot jong ka France.