Press "Enter" to skip to content

Ka akisiden kali bad da kumno ban kiar ïaka

Ka mynsiem ka pang bad ka dohnud ka mong bym lah shuh ban syrdep, haba ki ïing ki sem ki mad ia ka jingiap ba khlem dei por ki baieit ba thoiñ, khamtam lei lei haba ki ngat ne ïa tyngkhuh kum ha ki akisden kali. Ha kane ka jylla, kiba bun naki jingïap mynta ki wan ba kin mihpaw bha ha kum ki aksiden kali, kaba teng teng ka dei namar ka jingñiah thurmur da lade, ne don pat ruh na ka rukom niah thurmur ki nongniah.
Ka taïew mynta ka hap hapoh katta ka jingrakhe ia ka ‘road safety week’ kaba tnat pulit kaba dei khmih ïa ka kam ban pynïaid ïa ki kali, ka shim ïala ka sien jam ka jong ka ba kan ïaid kylleng sawdong ka sor ban phriang ïa ka khubor sha la ki paidbah da kumno ba kin nang ba kin sumar ïalade ha ka por ba ki ñiah ïaki kali.
Haba kren shaphang ka rukom ban ñiah ïa ki kali, ym lah ban khlem da buh ïa ka jingkylli, kiba bun na ki nongñiah ïa ki kali, nagno bad kumno sha ki la ioh ban bat haki ïa ka driving licence, namar wat hapdeng kiba la ïoh ban bat ïaka, hynrei ka rukom ñiah kali ka jong ki, kam kdew pat sha katta ka phang ba kidei kiba la ïoh hok shisha ïa ka licence ñiah kali ka jong ki.
Toi man la ka step don kiba bun ki briew ki bym pat ban nang ñiah ia ki kali, ki pynlut ïala ka por ka jong ki ban hikai, hynrei ngi tip ba kum kine ki briew kiba da ïaid da ka lynti ban shah hikai, suki pa suki ki nang bad ki kham tip ïa ki aiñ ki kanun ban ñiah iaka.
Hynrei, ha kiba bun ki aksiden, lehse don ruh ki nongñiah ba shu nang malum mala, pynban khlem jingtieng ne smiej ki shu kurup ruma la kum kiba nang eh, hynrei haba la bang lei lei sa ka rukom ban pynher sted, tang katta ki thung khohmoh ne ba kin thung bajli bad ki syllad shisha kat shaba shah, bad ha kaba kut, poi pat sha ka jingjia ba sngewsih wat haduh u pud sha ka lynti jong ka jingïap.
Kaba kham ima eh ïa ka rukom ñiah kali dei na ki khun samla kiba dang shu sdang ban khie, kaba haki, ka snam kumba ong ki riew tymmen ka dang khluit bha, katno tam lei lei haba ïoh ban rah ïa ki kali ba kham remdor, pynher jong ngi la kum ki bym lap lieng shuh, hynrei kaba kut, haba ym lah shuh ban teh lakam, poi beit beit sha ka aksiden.
Nalor ba pynher sted, trei ruh sa ka dih ka bam, ka leh shongshit tem pynheh bha ïa ki sur jingrwai, kaba da shisha ym tang ba ka wanrah ïa ka jingma ïa kiba shong ne ïa u nongñiah, hynrei wat ia ki briew kiba ïaid ha ki lynti ki syngkien, kaba teng teng shu shah syllad ei bad kylla dkoh ka kti ka kjat tang namar ka jingleh shongshit kaba shi khyllipmat ka wanrah pat ïa ka jynjar trah kaba shi rta ïa ki briew ba ïaid ba ïeng.
Hangne la donkam shisha ba ki bor ba dei khmih kin hap ban thaw noh ïa ki aiñ ki kanun, ba ka rukom ban ai ïa ka licence niah kali, kam dei shuh ban shu ai klumar ïaka, hynrei donkam shisha ban pyrkhing, ne haba ai ruh donkam ban da ïoh ïa ki kot ki sla naki skul ai jinghikai ñiah kali ba la ithuh daka bor ba dei khmih. Pynban lada shu ai kumba ai ha kine ki sngi kumba ai mynta, da lei lei yn nym lah satia ban tem ïa ki jingjia aksiden kiba sngewsih, bad kaba kut ka shu sah khana ei pateng ïa kaei kaba la jia baroh.
Shi ban ki lad jingpyrkhing ba la shim khia da ka tnat Pulit ka la lah ba kan kham teh lakam bha ïa ki briew shoh khawiang kiba mlien ban shang kylleng sawdong ka sor man la ka miet. Ka jinglah ban talasi bha ki bor pulit ryngkat bad ka kuna ba ki shaiñ, ka la teh bha ïa u lakam ïa kito ki riew shang miet ñiah kali pat ha ka por ba ki la shoh bha u khawiang, namar kiba bun na ki jingjia ha ki por mynmiet, lada wad bniah bha ïaka daw, dei namar ba ka jabieng kam treikam shuh, katba ka kali pat ka la her sted shaba palat u pud tad haduh bym lah shuh ban tehlakam ïaka, ha kaba kut, tynrah beit kat shaba poi.
Shuh shuh, ka aksiden ka kham jia ruh haba ïa beh ïa ka por, haba ong beh por, ka kynthup naduh ka beh kam beh jam, leit jingleit sha jngai, hangne ruh, kum ki briew, ban lait na ka jingma, kan kham bha ban mih kham kylluid ka por, khampher wat lada dei ban poi kham kloi, hynrei ha kaba kut, ka mynsiem ka ïoh ba kan shong palei bad ym don jingeh ban ïoh ban pyndep ïa ki kam ha ka por kaba la buh.
Kumta, ban lah ban kham tyngkan ïa ki aksiden kali, kaba nyngkong eh, donkam shwa ban ïa sdang nalade, da kaba long adkar bha ha ka rukom ban ñiah kali, kiar naka bam ka dih, kiar ruh na ka kren mobile bad kaba kham kongsan lei lei ka long ba wei haba la kiew ha ka kali haba thmu lei lei ban iah hi dalade, ka mynseim kan hap ban ïai long kaba palei, kaba pynleit jingmut shwa ban niah tikna ïaka tad haduh bña la poi ha ka jaka ba la dei ban ïeng, hadien kane la lah pat ha kaban phrang pat ïala ka jong ka bor jabieng sha ki kam kiba dei ban leh.
Ha kaba kut donkam ruh ban kohnguh, spel lyndet ruh ïa ki dak ki shin kiba juh kdew ha ka por ba ñiah ïa ki kali, namar teng teng kum ki briew, klet ïa kaei kaba la thoh ha shi lynter lynti, hynrei haba long adkar, kiei kiei kiba sñiew kham niar ba kin jia thala, toi kampher ba ha ka jinglong briew da shisha ym lah ban ïai biang, hynrei haba phikir, ki jingsñiew da lei lei kim juh kham wan thala ha ka jingim jong u briew.