Press "Enter" to skip to content

Ka dewlynnong ha Nongmahir, kawei pat ka jaka jngohkai ba khring bha ha Ri Bhoi

Nongpoh, Risaw 08: Ka Ri Bhoi District kaba la don lypa ki jaka jngohkai pyrthei kiab i tynand bad khring ha ïa ki paidbah, kum ka Pung Umïam, Kharsati Park, Lum Sohpetbneng bad kiwei kiwei. Mynta la mih sa kawei pat ka jaka jngohkai kaba khring bha ïa ki paidbah. Kata ka dei ka dewlynnong ha Nongmahir.
Ka dewlynnong haka shnong Nongmahir ka dei kawei naki jaka ba itynnad kaba la khring ruh ïa kiba bun ki nongwan jngohkai pyrthei naka jylla, nabar jylla bad wat nabar ka Ri India halor ka jingdon ka jaka kaba itynnad kaba ki nongwan jngohkai pyrthei ki ju sngewtynnad ban pynjahthiad ïalade bala ker sawdong da ka um hapdeng ka jingkynjah bad jingitynnad jong ka mariang sawdong.
Katei ka jaka ka jngai tang kumba 20 km eiei na Umsning, bad lah ruh ban poi sha katei ka dewlynnong ba itynnad da kaba shong ka lieng kynda, kaba dei ka jaka bala longtrai da ki shilok, ka kong Sebina Kharbuki bad u Bah Chesterfield Thangkhiew.
Kitei ki 2 ngut ki shilok ki don ruh haduh 9 ngut ki khun bad dala ka jong ka bor met bad ka jingtrei shitom khlem kano kano ka jingïarap naka sorkar kila lah ban pynkylla ïa katei ka jaka kum kawei naki jaka jngohkai pyrthei ba itynnad bala khring ïa kiba bun ki paidbah na kylleng ki jaka bad wat kiba naka ri Sepngi, khamtam ki riew ieid mariang kiba ju sngew tynnad ban peit ïaka jingitynnad jong ka mariang.
Haba kren bad u nongthoh khubor u Mawphor u Bah Chesterfield Thangkhiew u la ong ba haduh mynta ki briew ki wan ban tuid man ka sngi sha katei ka dewlynnong naka bynta ban peit ïaka jingitynnad jong ka mariang, ban wan shet lane bamkhana bad don ruh kiba wan sah namar ki don ruh ki iingbasa bala pynkhreh naka bynta ki nongwan jngohkai pyrthei kiba kwah ban sah ha katei ka jaka.
U la ong ruh ba u la sdang ïa katei ka kam mynta la kumba 5 snem eiei da ka bor met la jong ban pynitynnad bad sumar khuid ïaka khlem kano kano ka jingïarap naka sorkar, daka jingangnud ban pynkylla kum kawei naki jaka ba itynnad ba khring ïaki paidbah bad pynmih pisa naka bynta ban pyndap ïaka iing ka sem, ban pynleit skul ïaki khun bad kiwei kiwei ki jingdonkam jong iing.
“Ka long ruh kaba sngew tynnad ba katei ka jaka wat ki briew na bar ka jylla ki tip ban wan bad khmih ïa katei ka dewlynnong bad sahmiet ruh kiba la ai ka jingïaroh shikatdei ïa ka jingitynnad jong katei ka jaka bad dewlynnong” la ong u Bah Chesterfield da kaba bynrap ruh ba lyngba ka jingwan jong ki nongwan jngohkai pyrthei ka long ruh kum ka jingkyrshan ïa ki ba kin dang lah ban pynbha shuh shuh katkum ka jingdonkam ki paidbah ha kane ka juk ba mynta.
U la ong ruh ba lada jin ba ka sorkar kan don ka jingkitkhlieh naka bynta ban kyntiew iaka jaka jngohkai pyrthei katei ka jaka ka long kaba paka namar kum u rangbaah u donkam ka jingïarap naka sorkar naka bynta ban pynitynnad bad ban buh ruh khambun ki lieng naka bynta ban leit shaw bad leit buh ïaki nongwan jngohkai pyrthei ban poi sha katei ka dewlynnong.
Shuh shuh nalor katei ka jingitynnad jong ka jaka bad ki sawdong sawdong, bun ki briew ki ju wan ban pynlut por sha katei ka jaka ban lait naka jingkiw kiw kaw kaw haki jaka sor, namar katei ka jaka ka long kaba paka ban pynjahthiad ïalade.