Press "Enter" to skip to content

Khang tala ki Trai khyndew ïa ka Tynhiang Sub Centre

Nongstoiñ, Risaw 8: Ki trai khyndew kiba la aiti ïa ka khyndew jong ki ban shna ïa ka Sub Centre ha shnong Tynhiang, West Khasi Hills, ki la khang tala noh ïa katei ka jaka sumar, namar ka jingshah weng kam jubor jong uwei u samla u ba dei ruh u trai khyndew u ba trei kum u Chowkidar ha katei ka jaka sumar.
Katkum ka khubor ba la ïohlum mynta ka sngi, la ïathuh ba kane ka jingleit khang tala da ki trai khyndew ka la jia naduh u bnai ba la dep. La ong ba ha ka jingshisha ki trai khyndew kiba la ai sngewbha ïa katei ka jaka, na ka bynta ban tei ïa katei ka sub centre bad ki la ïasoi ruh ïa ka soskular bad ka sorkar lyngba ka tnad jong ka koit ka khiah ha u snem 1992, ba kino kino ki kam kiba lait kum ka Post Chowkidar, dei ban ai bad thung beit da ki trai ba ai jaka, khlem da pynrung sha ka District Selection Committee.
Hynrei tang namar ka jingshah weng kam jubor jong uwei u samla u ba dei ruh u trai khyndew, u ba la trei ha katei ka sub center kum u chowkidar ha ka jaka jong u kñi jong u u ba la khlad noh, u la ïoh ïa ka shithi thung kam shipor ïa u. Hynrei shwa ban kut katei ka por, u la ïoh pdiang ïa ka phone call na ki bor ba halor ba u dei ban sangeh noh ban leit trei. Hadien pat u la ïoh pdiang syndon sa ka shithi pynsangeh kam na katei ka tnad bad la thung bujli da uwei pat ha ka jaka jong u.
Kumta ha ka jingbitar ïa kane ka rai kaba kyndit, u ne u samla ryngkat bad ki trai khyndew kiba la ai sngewbha ïa katei ka jaka, ki la khang tala noh syndon bad ym don shuh ba nud ban leit sha katei ka Sub Centre.
Kane ka jingshah khang tala noh kane ka jaka sumar, ka la pynkhuslai jingmut ïa ki paidbah jong ki hynniew tylli ki shnong ba kynthup ïa ka shnong, Proiñ, Rimardon, Tynhiang, Porla bad kiwei kiwei ki shnong ba marjan. Ka jingktah ka long khamtam eh ïa ki longkmie kiba dei ban leit ai injekshon ïa ki khunlung jong ki bad kumjuh ruh ki longkmie ba armet.
Haba tih bniah shuh shuh halor kane ka jingjia, la lap ba ka daw baroh ka dei tang namar ka jingleh donbor jong ki briew kiba don ha ka bor, tang ban pynhun ïa ka jingkwah kwah ki briew la jong khlem da pyrkhat shuh ban knieh wat ïa ka hok jong kiwei pat. Kumta ki nong pynbor ban khang tala ïa katei ka sub centre, ki dei ban shim ka jingkitkhlieh.
Na ka liang ka KSU Mawshynrut Circle, ka la pynpaw ka jingsngewkhia halor kane, namar ka ktah ïa ka ïap ka im ki paidbah. Ka seng ka kyntu ïa ki bor ba halor jong katei ka tnad ba ki dei ban pynbeit noh mardor halor katei ka kynduh kynram, na ka bynta ka jingmyntoi jong kiba bun khamtam u kup shilliang u snem shilliang u ba donkam ïa ka jingïarap na ka tei ka sub centre.