Press "Enter" to skip to content

Kloi u President ka RPI Megh ban pynsngew ha u National President halor ka CAB

Shillong, Risaw 08 : U President ba thymmai jong ka Republican Party of India (A), Bah James Sylliang uba dei ruh u MDC barim ka Mawhati u la ong ba lada ki paidbah kynthup ïa ki sengbhalang ki wan ban syllok lang halor ka ishu Citizenship Amendment Bill, u long uba kloi ban pynsngew pat sha u President Rangbah jong ka party, u Ramdas Bandu Athawale ba un kren ha ka sorkar pdeng.
U Ramdas Athawale nalor ba u bat kum u President jong ka RPI (A) u bat ruh kum u Myntri ka tnad Social Justice and Empowerment ha ka sorkar National Democratic Alliance (NDA) hapoh ka jingïalam jong u Narendra Modi kum u Myntri Rangbahduh ka Ri.
Watla katei ka ishu CAB kadei kaba la khluit bha ha ka jylla hapoh hapoh ka jingïalam jong ki sengbhalang bapher bapher hynrei na ka liang u Bah James haba kren bad ki lad pathai khubor u ong, ‘Haduh mynta ym pat don mano mano ruh ba wan ban syllok ne ïa kren bad nga halor kane ka bynta. Lada jia Nga long u ruh uba kloi ban rah ïa katei ka ishu bad u President Rangbah ka party, u Athawale lada ka don ka jingkwah jong ki paidbah.
Ha kawei pat ka liang, u Bah James u la ong ruh ba hadien ba ka party ka la dep ban pynskhem ïa ka Central Executive Committee kin sdang noh ïa ka jingtreikam kynthup ïa ka jingjied ïa ki nongkitkam ha baroh ki distrik.
Katkum ka jingong jong u, nangne shakhmat na ka liang ka party ha Meghalaya kin buddien lang ïa ki skim jong ka sorkar pdeng kiba wan lyngba ka tnad Social Justice and Empowerment kaba dei ka tnad kaba bat da u National President.
Na ka byna ban pynkhlaiñ pat ïa ka party, u Bah James ula ong ruh ba mynta ki dang pynkhreh ban ïa kren bad ki riew rangbah kynthup wat ïa ki nongmihkhmat kiba rim bad kiba thymmai ruh ban don bynta lang ha katei ka party. Haba pynshai halor ka nongrim treikam jong ka seng, u Bah James u la ïathuh ba ïa ka party kaba u don bad shimti kum u State President kadei kaba la tip ha baroh kawei ka Ri India. La ïathuh ruh ba ha kane ka thaiñ shatei lam-mihngi jong ka Ri ruh dang shen ka party ka la ïoh ban thaw ïa ki shnat treikam ha baroh ki jylla.
U la ong ruh ba mat treikam kaba hakhmat eh jong ka party kadei na ka bynta ka bit ka biang jong ki trai ri trai muluk bad dei na kane ka daw ka la ïoh mynta ban bsuh khlieh jan ha baroh ki bynta jong ka Ri India kynthup ha kane ka jylla..