Press "Enter" to skip to content

La plie ïa ka Football Training Center ha ka Shnong Barato

Jowai, Risaw 08: Ka Chaphrang Iong I Sports Club Barato, ryngkat ka jingïatrei lang bad ka Northeast Indian Goal, ha kane ka 5 tarik mynta u bnai ki la plie paidbah ïa ka “Football Training Center” ha madan phutbol ka Chaphrang Iong I Sports Club Barato, ha ka shnong Barato West Jaiñtia Hills District.
La ïathuh ruh kane ka long ka history ba nyngkong duh ha ka thaiñ jong ka Elaka Shiliang mynta ban don ïa kum kane ka Training Center na ka bynta ban pyntbit ïa ka sap ïalehkai phutbol jong ki riew ieit phutbol.
U Ma A. Shadap (MDC) ka 12-Barato Mukroh Constituency haba kren kum u kongsan ula ïaroh ïa ka Club kaba la ïaleh shitom ban wad ki lad ki lynti ban pynïoh ïa ki riew ieid football ka thaiñ ïa kum kane ka center kaba donkam bha ban kyntiew ïa ka sap jong ki khynnah ha ka liang ka jingïalehkai phutbol.
Ha ka juh ka por u kyntu ïa ki kmie ki kpa ki khynnah ba kim dei ban khanglad ïala ki khun ban wan shah hikai ha kane ka Center namar kumba long mynta ka phutbol ka dei kawei na ki lad ïohkam ïoh jam bad u la kyntu ruh ïa ki nongïalam ka Club ba kin trei shitom ban pynkiew ïa kane ka Center bad ban ai ka jingshakri kaba hok sha kiba wan shah hikai.
Na ka liang u ma M. R Pyrtuh COO ka NEIG ula batai bad pynshai ïa ki paidbah shaphang ka NEIG ba la seng ïa ka ha u snem 2018, kaba la long khlieh da u ma Kyrmen Shylla, u Cabinet Minister jong ka sorkar jylla ba mynta, kaba don ka thong ban pynkiew ïa ka football ha baroh kawei ka Northeast khamtam eh ïa ka jylla Meghalaya, shi bynta ban ai jinghikai ïa ki khynnah naduh 7 snem haduh 16 snem ka rta.
Ïa ka jingïalang la pynïaid da u Ma Lucky Lamare u Chairman jong ka Club, la ïoh ruh ki kyntien kyrkhu kyrdoh na u waheh shnong Barato uba long u Adviser ka Club, la ïoh jingbatai lyngkot halor ka jingthmu jong ka Club ban buh ïa kane ka Football Training Center da u Ma Sarlangki Dkhar Secretary jong ka Center bad la pynphuh pynphieng shuh shuh ïa kane ka prokram da ki jingïaleh phutbol jong ki khynnah skul naduh ki 7-10 snem bad 12-16 snem na kylleng ki skul kiba don hapoh jong ka Elaka Shiliangmyntan.