Press "Enter" to skip to content

La pyngngam um ïa ka blei Durga ha West Jaiñtia Hills, ryngkat ka jingïada ïa ki wah

Jowai, Risaw 08: Ka jinglehniam Durga Puja ka la long kaba shongkun ha ka sngi ba khatduh bad baroh ki puja committee ki la pyrshang katba lah ban ïada ïa ki um ki wah na ka jingjakhlia ha ka jingpyngngam um ïa ka blei Durga.
Kumba ju long manla u snem ki riew ngeit Niamtre ha Nartiang ryngkat bad ki riewngeit niam Hindu ha kylleng ka ri ki la pynlong ïa ka Durga puja ha ki 4 sngi 4 ïa. Ka leh niam ha Nartiang ka long kaba kyrpang bad kaba khampher haba ia nujor bad kiwei pat, namar ba ha katei ka shnong ïa ka blei la shna da ka pashor ym kum ha kiwei ki jaka da ka dew byrtha.
Ïa kane ka jinglehniam Durga Puja ha Nartiang la pynlong ym tang ia ki riewngeit ka Raij, hynrei ïa ka ri Khad ar Dalloi baroh kawei khnang ba kan ïoh iaka koit ka khiah bad ban roi ban par kyrhai.
Ha Jowai la leit pyngngam ïa ka dur blei Durga ha wah Myntdu, ha ka jaka bala tip kum ka Khyllem. Ka Sarbajanin Durga Puja Committee, Jowai ka la kah da ki jar bad ki skhen ban bat ïa ki blei ha kawei ka jaka bad lashai ka sngi kin shim ïa kiba tam bad ban bret sha ka jaka ba dei ban bret.
Katba ha Nartiang la thaw ïa ka blei Durga ha ka dur jong ka pashor bad kam don jingktah eiei ïa ka um ki wah, namar ba ïa kane la ïalam lynti naduh ki por mynshuwa ban nym ktah ïa ka mariang hadien ba la pynngam um ïa ka blei.
Ha Jowai naduh ki rangbah, longkmie bad khynnah ki la ïashimbynta ha kaban leit pyngngam um ïa ka blei Durga sha Wah Myntdu naduh Iawmusiang.
Haba phai sha ka lehniam puja ha Nartiang, ka shnong kaba dei tang maka ba ki riewngeit Niamtre kidang pyndep ïa ka niam Hindu ka la long kaba shongkun ha kaba ki paidbah ki la wan ban shimbynta shitrhem ban ainguh aidem ia ka blei.
Shuwa ban rah ïa ka blei Durga la don ka jingshad mastieh kaba ïalam da u Dolloi ka Elaka Nartiang u Hepsing Dhar ryngkat bad ki pator bad ki lyngdoh jong ka Elaka bad hadien la leit pyngngam um ïa ka blei ha ka jingïalam khmat u Pandit Oni Maskut Deshmukh uba rah ïa ka blei Durga haduh wah Myntang.
Kum shu pynkynmaw hangne, ka lehniam Durga Puja ha Nartiang ka dei kaba wanrah u Syiem Jaiñtia, kaba ka shnong Nartiang, u syiem ula jied kum ka jaka sah pyngngad ha ka por Lyuir, katba ha ka por Tlang pat u syiem u shong u sah ha Jaiñtiapur, Bangladesh.
Ka lehniam Durga Puja ha katei ka shnong ha Durga Temple kam dei kaba dang thymmai, hynrei ia kane ka jingleh niam Durga Puja ha katei ka shnong la pyndep da ki khun ka Niamtre ha Nartiang naduh mynshuwa ha ka por ka jingshynshar ki syiem.
La leh niam ha ki ar tylli ki temple ha Nartiang kam duna ïa ki hajar snem bad ka don ruh ha ka khana naduh kulong kumah ha ka kitab niam Hindu bad kane ka Temple ha kane ka shnong dei kaba la paw ha kylleng naba la ngeit ba ka lbong jong ka blei Sati ka kurim jong u Shiva ka hap ha Nartiang ha ka por ba u Vishnu ula pom lyngkhot ïa ka met jong ka Sati da ka Sudarshan ka tiar ïaleh jong u kaba la pharia ïa ka met ka phad jong ka bad ka la hap ha ki 53 tylli ki jaka.
La ngeit ruh ba ka lyngkhot met jong ka Sati ka hap ha Khamakhya Temple, Guwahati bad ha Nartiang kaba pynïeng ïa ka temple bad naduh kata ka por la leh ia kane ka jingleh niam ha katei ka shnong.