Press "Enter" to skip to content

Noh synñiang ka APSTA sha ka tnad sumar ïa ki khunlung ha Robert Hospital

Shillong: Ka All Primamry School Teachers Association (APSTA) ka la ïai bteng ïa ki kam ïarap bad leh isynei na ka bynta ka bit ka biang ki jaka sumar kiba don ha ka jylla.
Ha ka sngi ba ar, ka Seng ka la leit ai jingïarap ïa ka Dr. H. Gordon Roberts Hospital, kaba don ha Jaïaw. Ka Seng ka la leit ai jingïarap ïa kane ka Hospital ab la shakri da ki phew phew snem hadien ba ka la ïoh jingtip ba kane ka Hospital ka don ka jingthmu ban thaw ïa ka Neonatal Intensive Care Unit (NICU) bad Paediatric Intensive Care Unit (PICU).
Ka jingïarap ka long da ka pisa Sanphew hajar tyngka na ka bynta kine ki kamra sumar ba kyrpang ïa ki khunlung.
ïa kane ka pisa la aiti sha u Medical Superintendent kane ka Hospital, u Dr R Nongrum da i Kong L Tiewsoh, Assistant Secretary ka APSTA ha ryngkat ka jingiadonlang ki nongialam ba kynthup ia u Tbn S Nongrang, President, u Bah FC Shullai lem bad ki dkhot kane ka synjuk ki nonghikai skul.
Ha ka jingialang ba lyngkot ba la pyniaid da u Dr R Nongrum la pynlong jingduwai sdang da ka kong C Daribha Synrem, Cultural Secretary ka APSTA. U Bah KW Marbaniang, Administrative Officer ka Dr H Gordon Roberts Hospital, Shillong ha ka jingkren pdiang burom u la ai khublei ïa ki nongialam bad ki dkhot ka APSTA.
“Ka jingïarap jong phi ka la long ka jingkyrkhu bakhraw ïa ka Hospital bad ka long ka jingai mynsiem ïa ngi ba ngin nang ïai trei bha ha ka kam ban ai ka jingshakri ïa kiba pang ba shitom kiba donkam ia ka jingsumar”, u la ong.
Haba ïathuh ba ka Dr H Gordon Roberts Hospital ka la don ruh ïa ka School of Nursing, u la ong, “Ngi thmu ban pynmih ïa ka tnad jingsumar kaba long kyrpang ïa ki khunlung kiba don jingshitom kata kiba hapoh 1 ne 2 bnai hapoh ka NICU bad kiba la palat ia ka 1 bnai ne 2 bnai pat ha ka PICU. Kane ka jingiarap jong phi kan long ka jingkyrkhu kumba phi la noh synniang na ka por sha ka por ha ki kam ba bha”.
Haba ai jingkren ha kane ka jingïalang, u Bah FC Shullai u la ong, “Na ka liang jong ngi, ngi seng ia ka APSTA halor ka nongrim ka jingtip briew tip Blei. Ngi la ïa trei tyngeh na ka bynta ka bit ka biang ki nonghikai kiba la shah shitom naduh ka por ba ki nonghikai ki dang hap ha ka jingpeit ka KHADC bad ngi la ïakhun ban ioh bynta na ka sorkar jylla”.
Da kaba ïathuh lyngkot shaphang ka rai ban wan ai jingïarap ïa ka Hospital halor kane bynta ban thaw ïa ka jaka ai jingsumar ba paka ia ki khunlung, u bah FC Shullai, u la ong, “Ngi na ka liang ka APSTA ngi ju noh synniang sha kiwei pat ki jaka ai jingsumar bad ngi la ïakynduh ïa u bah KW Marbaniang, uba la ïathuh ba ki pynlong ïa ka Concert ban pynmih pisa na ka bynta kane ka jingthmu”.
“Ngi da ka mynsiem ïarap ngi la wan mynta ka sngi ban ïarap bad ngim don jingleh shiliang khmat ïano ïano bad ngi ai kane ka jingnoh synniang namar ka Hospital ka don ka jingthmu bad ka thong ban ai ka jingsumar ba kham paka ïa ki khunlung. Ngi khmih lynti ba kan long ka jingkyrkhu ia kiba donkam ka jingsumar bad ngi duwai ha U Blei ba un ai bor ia ka Hospital ba kan nang lah ban ai shuh shuh ka jing-shakri”, u la ong.
U Dr R Nongrum u la ong, “Kane ka dei ka jingai kylluid mynsiem jong phi ban trei kham bha shuh shuh da ka jingieid.Na ka bynta ka jingbha ngi dei ban ia kit lang ia ki jingeh. Ngi pdiang ki jingai jingmut bad ngi donkam ia ka pisa ban tei ia ka Neonatal Intensive Care Unit (NICU) bad ka Paediatric Intensive Care Unit (PICU) sumar ia ki khyllung kiba donkam ban sumar”, u la ong.
“Ha kaba pyniaid ia ka Hospital ngi ïakynduh shibun ki jingeh teng teng ki mashin ki sniew bad teng teng ka bor ding ilektrik kaba ym long ban duh bad haba sniew ki mashin ngi hap ban phah pynbiang kyrkieh kyrkieh bad kam long ban ieh”, u la ong bad pynpaw ba kane ka jingnoh synniang jong ka APSTA ka nang ai mysiem ia ki bor pyniaid bad nongtrei ka Hospital.
Shwa ban pynwai ia kane ka jingialang la ai jingkren khublei na ka kong Ibarikha L Sawkmie, Vice Principal ka School of Nursing ka Dr H Gordon Roberts Hospital Nursing School bad jingduwai pynwai na u Tbn S Nongrang, President ka APSTA.